Ezayi 19 - ALA KA KUMA

Kirayakuma, Ezipiti kosɔn

¹ Kirayakuma nin sinna Ezipiti ma. Masaba filɛ sankaba teliman dɔ kan, a be nana Ezipiti jamana la! Ezipitikaw ka joow be yɛrɛyɛrɛla a ɲa, Ezipitikaw jaa tigɛra.

² A ko: «Ne bena Ezipitikaw sun ka bila ɲɔgɔn na. Balimaw bena ɲɔgɔn kɛlɛ, teriw bena ɲɔgɔn kɛlɛ. Duguw bena ɲɔgɔn kɛlɛ, maraw bena ɲɔgɔn kɛlɛ.

³ U hakili bena ɲagami, ne bena u ka kolatigɛninw cɛn. U bena taga jotigiw ni filɛlikɛlaw, ani sukɔrɔw welebagaw ni lagwɛlikɛlaw fɛ.

⁴ Ne bena u don kuntigi farimanw bolo, masacɛ fariman dɔ bena u mara.» Matigi, Masaba, Setigi le ko ten!

⁵ Jii bena ban ka bɔ Nili baa kɔnɔ, baji nin bena dɛsɛ, ka ja!

⁶ Kɔbolow jii kasa bena bɔ, Ezipiti kɔɔw jii bena jigi fɔɔ ka ja. Burukuw ni biinw bena fɔnsɔn,

⁷ Nili bada la biinw bena ja. Fɛɛn o fɛɛn be falen Nili bada la, o bɛɛ bena ja, ka tunu, hali foyi tena to!

⁸ Mɔnikɛlaw bena ŋunan, minw be dulon fili Nili jii la, olu bɛɛ bena kasimisɛnw kɛ. Minw be to ka jɔɔ fili jii la, olu bena fasa.

⁹ Jese ɲanaman baarabagaw jigi bena tigɛ, fanidanbagaw hakili bena ɲagami.

¹⁰ Jesedanlaw dusu bena cɛn, baarakɛlaw bɛɛ fari bena faga.

¹¹ *Tanisi dugu ɲamɔgɔw ye nalomanw dama le ye, Ezipiti masacɛ ladibagaŋanaw be ladilikolon di. Aw be se k'a fɔ masacɛ ye cogo di ko: «Ne ye lɔnnikɛla deen ye,» ko: «Ne ye fɔlɔfɔlɔ masacɛw dɔ deen ye»?

¹² E ka lɔnnikɛlaw be min? Masaba, Setigi ye koo min labɛn Ezipiti jamana kama, u k'o fɔ i ye, waasa bɛɛ k'a lɔn.

¹³ Tanisi dugu ɲamɔgɔw kɛra nalomanw ye, Manfisi dugu ɲamɔgɔw ka miiriyaw ye fuu ye. O ɲamɔgɔ nunu le be Ezipiti jamana ɲagamina.

¹⁴ Masaba ye ɲanamini bila u la. U b'a la ka Ezipiti yɛlɛmayɛlɛma a ka kokɛtaw bɛɛ la, i ko dɔrɔtɔ be yɛlɛmayɛlɛma a ka fɔɔnɔ kɔnɔ cogo min na.

¹⁵ A mɔgɔ te Ezipiti tugu min bena jamana ɲako kɛ. Ɲafɛmɔgɔw, walima kɔfɛmɔgɔw, mɔgɔbabaw, walima fantanw.

¹⁶ O loon na, Masaba, Setigi ben'a bolo kɔrɔta u kama Ezipitikaw bena kɛ i n'a fɔ musow, ka to ka yɛrɛyɛrɛ siranya fɛ.

¹⁷ Zuda mara ka koo bena kɛ Ezipiti siranyako ye. U mana Zuda mara koo fɔ, Ezipiti be yɛrɛyɛrɛ. Bari Masaba, Setigi ye koo dɔ latigɛ u kama.

¹⁸ O waati la, dugu duuru bena sɔrɔ Ezipiti jamana na minw bena Kanaan mara mɔgɔw ka siyakan fɔ. U bena kali k'u yɛrɛ kɛ Masaba, Setigi taw ye. O dugu nunu cɛma, kelen tɔgɔ bena wele ko Tiledugu.

¹⁹ O waati la, sarakabɔyɔrɔ bena labɛn Ezipiti jamana cɛma, kabakuru be lɔ jamana daan na Masaba tɔgɔ la.

²⁰ O bena kɛ taamasiɲɛ ye min b'a yira ko Masaba, Setigi be Ezipiti kɔnɔ. N'u kulera Masaba nɔfɛ u tɔɔrɔbagaw kosɔn, a bena kisibaga bila ka na u fɛ k'u dɛmɛ, k'u bɔsi.

²¹ Masaba ben'a yɛrɛ yira Ezipitikaw la. O waati la, olu fana bena Masaba lɔn. U bena sarakaw ni boɲafɛnw d'a ma. U bena dajuru ta a ye, u bena o sara fana.

²² Ni Masaba ye Ezipiti tɔɔrɔ ka ban, a bena lafiya d'u ma. U bena u ɲaa sin Masaba ma, a bena sɔn u ka daalili ma k'u kɛnɛya.

²³ O waati la, siraba bena bɔ Ezipiti ka taga Asiri. Asirikaw bena na Ezipiti, Ezipitikaw bena taga Asiri. Ezipitikaw ni Asirikaw bena batoli kɛ ɲɔgɔn fɛ.

²⁴ O waati la, Isirayɛlidenw bena kɛ sabanan ye ka fara Ezipiti ni Asiri jamana kan. O bena kɛ duba sɔrɔyɔrɔ ye diɲɛ kɔnɔ.

²⁵ Masaba, Setigi ye min koo fɔ ko: «Hɛrɛ ka kɛ Ezipitikaw ye, ne ka mɔgɔw. Hɛrɛ ka kɛ Asirikaw ye, ne bulonɔ. Hɛrɛ ka kɛ Isirayɛlidenw ye, ne niyɔrɔ.»