Ezayi 17 - ALA KA KUMA

Kirayakuma, Damasi dugu kosɔn

¹ Kirayakuma nin sinna Damasi dugu ma. «Damasi tena kɛ dugu ye tugu, a bena kɛ tomo le ye.

² A dafɛduguw mɔgɔw bena boli k'u lakolonw to kudayi. O dugu nunu bena kɛ begɛnw layɔrɔ ye, hali mɔgɔ si tena u tɔɔrɔ.

³ Dugu barikaman tena sɔrɔ Efarayimu mara la tugu, masa tena sɔrɔ Damasi fana. Sirikaw tɔɔ min bena to, olu bena mafiɲɛya i ko Isirayɛlidenw tɔɔ. Masaba, Setigi le ko ten!

⁴ O loon na, Isirayɛlidenw ka nɔɔrɔ bena ban, u ka nafolo bena tunu.

⁵ A bena kɛ i ko suman tigɛtuma, suman bɛɛ be cɛ ka ban cogo min na. A bena kɛ i ko erefaw ka kɔkɛnɛ a suman tigɛnin kɔ.

⁶ Isirayɛlidenw tɔɔ bena kɛ i ko olivu minw be to yiri kan a deenw bɔnin kɔ. A deen tɔɔ be to suun kan cogo min na kelen kelen a sanfɛbolow kan, o cogo kelen na, olu bena kɛ ten. A tɔɔ bena to bolo nunu kan, deen naani, walima duuru.» Masaba, Isirayɛli ka Ala le ko ten.

⁷ O loon na, adamaden bena filɛli kɛ a Danbaga faan fɛ, a ɲaa bena la Isirayɛli ka Ala kan.

⁸ A ye sɔnnikɛyɔrɔ minw sigi, a ɲaa tena bɔ olu si fɛ tugu. A bolo ye joo minw dilan, ani wusulan jɛniyɔrɔw, walima *Asera jaaw, a tena o si filɛ.

⁹ O loon na, mɔgɔw bena boli ka dugu barikamanw lakolon to, i n'a fɔ iviw ni amoriw bolila k'u ka duguw to cogo min na Isirayɛlidenw natuma na jamana kɔnɔ. Yɔrɔ bena kɛ dusukasiyɔrɔ ye.

¹⁰ Aw ɲinɛna aw Kisibaga Ala kɔ, aw m'aw hakili jigi aw tangabaga barikaman la. Aw ye nankɔw labɛn joow ye, ka sɛnɛfɛnw dan yen siya wɛrɛw ka joow sɔnni kosɔn.

¹¹ Aw y'u dan loon min na, o loon kelen na, aw y'a kɛ o falenna. Aw ye min dan sɔgɔma, aw y'a kɛ o feerenna. Nga bɔnɛ loon na, o suman be tunu. Fura te o bɔnɛ nin na.

Juguw boliko

¹² Ee! Jamaba mankan ye! Mankan nin be i ko jiba mankan! Siya wɛrɛw ŋunuŋunukan be i ko jii woyokan!

¹³ U mankan be i ko jiba mankan. Nga Ala b'u bagabagara, u be boli ka taga fɔɔ yɔrɔjan, i ko fɔɲɔ be suman bugu ta cogo min na, i ko sanfɔɲɔ be gwangwan ta cogo min na.

¹⁴ Suu mana ko, siranya lo! Yanni dugu ka gwɛ, u te yen tugu! O le bena kɛ an tɔɲɔbagaw niyɔrɔ ye. Mɔgɔ minw be benna anw kan, o le bena kɛ u niyɔrɔ ye.