Ezayi 15 - ALA KA KUMA

Kirayakuma, Mowabu kosɔn

¹ Kirayakuma nin sinna Mowabu ma. Suu kelen kɔnɔ, bɔnɛ benna Ari dugu kan, Mowabu mara la, a halakira pewu! Suu kelen kɔnɔ, bɔnɛ benna Kiri dugu kan, Mowabu mara la, a halakira pewu!

² Dibɔnkaw tagara sɔnnikɛyɔrɔ la ka kasi! Mowabuw be kasira Nebo ni Madaba koo la. Bɛɛ kuun linin lo, bɛɛ bonbosi lira.

³ Mɔgɔw ye dusukasifaniw don ka to bɔlɔnw na. U bɛɛ be kasira boonw sanfɛ, u ɲaji be woyora forobayɔrɔw la.

⁴ Ɛsibɔnkaw, ni Eleyalekaw be kulera, u kulekan be mɛnna fɔɔ Yasa! O la, mowabuw ka kɛlɛdenw be kulera, u jaa tigɛninba!

⁵ Ne dusu tɔɔrɔnin lo mowabuw koo la. Bolibaga dɔw ka bɔ u cɛma sera fɔɔ Sowari, fɔɔ Ɛgilatiselisiya. Mɔgɔw kasitɔ be yɛlɛla Luwiti kulu kan, kulebabaw be cira Oronayimu sira kan.

⁶ Nimurimu jiyɔrɔ kɛra dusukasiyɔrɔ ye. Yiriw jara, binkɛnɛ tununa, o si kɛnɛ te yen tugu.

⁷ U bololafɛn tɔɔ minw tora, u b'olu tara ka taga fɔɔ Soleyiriw kɔɔ kɔfɛ.

⁸ Kasikan ye Mowabu jamana lamini. Kasikan sera fɔɔ Ɛgilayimu, kasikan sera fɔɔ Elimu kɔlɔn daa la.

⁹ Dibɔn kɔji bɛɛ kɛra joli ye. Masaba ko: «Ne bena bɔnɛ wɛrɛ lase Dibɔnkaw ma: Mowabuw minw sera ka kisi, mɔgɔ minw tora jamana kɔnɔ, jara bena wili olu kama.»