Ezayi 11 - ALA KA KUMA

Bolokura falenko

¹ Zese ka buruju, min kɛra i ko yiriju tigɛnin, ale bena bolomisɛn dɔ falen, bolokura bena falen a liliw kan.

² Masaba ka Nii bena to n'a ye, ale min be lɔnniya, ni koo faranfasili see di, ka koo ɲanabɔli see, ni fanga di, ka Masaba lɔnko n'a ɲasiranko see di.

³ Ka siran Masaba ɲa, o le bena diya a ye. A tena kiti tigɛ ka kɛɲɛ n'a ɲaa ka yeta ye. A tena koo latigɛ ka kɛɲɛ n'a tulo ka mɛnta ye.

⁴ A bena dɛsɛbagatɔw ka kiti tigɛ tilenninya la. A bena jamana kɔnɔ fantanw ka koo latigɛ hɔrɔnya la. A ka kuma bena kɛ i ko bere, ka la jamana kan. A bena mɔgɔjugu faga a dalafɔɲɔ fɛ.

⁵ Tilenninya bena kɛ a ka cɛsirilan ye, kantigiya bena kɛ a cɛsirifɛn ye.

⁶ Wara ni sagaden bena to ɲɔgɔn fɛ, waraninkala ni baden bena to ɲɔgɔn fɛ. Misiden ni jaraden bena dumuni kɛ ɲɔgɔn fɛ, denmisɛn be taga u dɛndɛ.

⁷ Misi ni wara bena dumuni kɛ ɲɔgɔn fɛ, u deenw bena la yɔrɔ kelen na. Jara bena biin ɲimi i ko misi.

⁸ Denɲɛnnin bena tulon kɛ saa ka dingɛ daa la. Deen min daa bɔra siin na, ale ben'a bolo don fɔnfɔnni ka dingɛ kɔnɔ.

⁹ Cɛnni tena kɛ, halakili tena kɛ tugu Masaba ka kulu senuman yɔrɔ bɛɛ la. Bari Masaba lɔnni bena yɔrɔ bɛɛ fa i ko jii be baa fa cogo min na.

Isirayɛlidenw segiko taamasiɲɛ

¹⁰ O loon na, Zese kɔmɔgɔ bena wili ka kɛ taamasiɲɛ ye siyaw fɛ. Jamana wɛrɛw ben'a yɔrɔ ɲini. A bena to yɔrɔ min na, boɲa bena l'a kan.

¹¹ O loon na, Matigi bena wili a siɲɛ filanan na, waasa k'a ka mɔgɔw tɔɔ kunmabɔ, minw tora Asiri jamana la, ni Ezipiti, ani Patɔrɔsi, ni Kusi, ani Elamu, ni Babilɔni, ani Amati, ni dugukolo kan minw be kɔgɔji cɛma.

¹² A bena taamasiɲɛ kɔrɔta siya wɛrɛw ye. Isirayɛli mɔgɔ minw tun minɛna ka taga, a bena olu lajɛn. Zuda mara mɔgɔ minw jɛnsɛnnin be diɲɛ faan bɛɛ la, a ben'u bɔ yen k'u lajɛn.

¹³ O loon na, Isirayɛli mara ka keliya bena dabila. Zuda mara juguw bena halaki. Isirayɛli tena keliya kɛ Zuda faan fɛ, Zuda fana tena kɛ Isirayɛli kɛlɛbaga ye tugu.

¹⁴ U bena jɛn ka taga filisiw kama tileben fɛ, u bena taga ben kɔrɔn fɛ mɔgɔw kan. U bena edɔmuw ni mowabuw mara, amoniw bena kolo u ye.

¹⁵ Masaba bena Ezipiti jamana kɔgɔji bolo ja. A ben'a bolo kɔrɔta ka Efarati baji ɲagami. A ben'a tilan n'a dafiɲɛ barikaman ye k'a kɛ jisira wolonwula ye fɔɔ mɔgɔ bena se k'o tigɛ a seen na.

¹⁶ A ka mɔgɔ tɔɔ minw tora Asiri jamana na, olu bena sira sɔrɔ a kɔnɔ. Isirayɛlidenw bɔra Ezipiti loon min na, u ye sira sɔrɔ cogo min na, olu fana bena sira sɔrɔ ten.