Bɔri 37 - ALA KA KUMA

Layidu taamasiɲɛ kɛsu dilanko

¹ Bɛtisalɛli ye Ala ka layidu taamasiɲɛ kɛsu dilan ni akasiyayiri ye. A jaɲa tun ye mɛtɛrɛ kelen ni santimɛtɛrɛ bi wolonwula ni duuru ye, a boɲa n'a jaɲa sanfɛ bɛɛ tun ye santimɛtɛrɛ bi wolonwula ni duuru ye.

² A y'a kɔfɛ ni kɔnɔna mɔ ni sanu yɛrɛ yɛrɛ ye, ka sanu kɛ k'a dagolo dilan k'a lamini.

³ A ye minɛfɛn naani dɔ dilan ni sanu ye i n'a fɔ bololanigɛ k'u don a seen naani na. A ye fila don faan kelen na, ka fila don faan dɔ la.

⁴ A ye akasiyayiri dɔw labɛn ka sanu mɔn u la,

⁵ k'u don minɛfɛn nunu na kɛsu nin faan fila la k'u kɛ a talɔgɔw ye.

⁶ A ye kɛsu nin datugulan dilan ni sanu yɛrɛ yɛrɛ ye. A jaɲa tun ye mɛtɛrɛ kelen ni santimɛtɛrɛ mugan ni duuru ye, a boɲa tun ye santimɛtɛrɛ bi wolonwula ni duuru ye.

⁷ O kɔ, a ye *serubɛn jaa fila dilan ni sanu faganin ye k'u sigi datugulan nin dakun fila la.

⁸ A ye serubɛn kelen dilan dakun kelen na ka kelen dilan a dakun dɔ nin na, k'u nɔrɔ datugulan dakun fila la.

⁹ U gamanw wilinin tun be sanfɛ kɛsu datugulan kunna, k'u biri a kan k'u ɲaa sin ɲɔgɔn ma. U ɲaa sinna kɛsu datugulan nin ma.

Tabali dilanko

¹⁰ U ye tabali dilan ni akasiyayiri ye. A jaɲa tun ye mɛtɛrɛ kelen ye, a boɲa tun ye santimɛtɛrɛ bi duuru ye. A jaɲa sanfɛ tun ye santimɛtɛrɛ bi wolonwula ni duuru ye.

¹¹ U y'a mɔn ni sanu yɛrɛ yɛrɛ ye, k'a dagolo dilan ni sanu ye.

¹² U y'a dagolo dilan k'a wili sanfɛ ka sanu mɔ a la a boɲa kɛra santimɛtɛrɛ seegi.

¹³ U ye sanu dilan k'a kɛ i n'a fɔ bololanigɛ, k'o kɛ minɛyɔrɔ naani ye, k'u nɔrɔ tabali nin nɔnkɔn naani nunu na, u ka bɛn ni seen naani nunu ye.

¹⁴ Minɛyɔrɔ nunu tun nɔrɔla dagolo nin gɛrɛfɛ, tabali nin talɔgɔw tun bena to ka don u kɔnɔ.

¹⁵ U ye tabali talɔgɔ nunu dilan ni akasiyayiri ye k'u mɔn ni sanu ye.

¹⁶ Minan minw be la tabali kan, k'o dilan ni sanu yɛrɛ yɛrɛ ye: a minan pɛnpɛrɛninw, ni tasaw, ni filenw ani sarakajidagaw.

Fitinɛ dilanko

¹⁷ U ye fitinɛ dilan ni sanu yɛrɛ yɛrɛ faganin ye, k'a juu n'a kala n'a daganinw: feerenbisigiw, ni kurukuruyɔrɔw, k'o bɛɛ dilan ka nɔrɔ ɲɔgɔn na.

¹⁸ Bolo wɔɔrɔ tun be fitinɛ na. Saba be faan kelen na, saba be a faan dɔ la.

¹⁹ Daganin saba minw be i n'a fɔ amandiyiri feerenw, olu ka sigi bolo kelen kan, ani kurukuruyɔrɔw ni feerenbisigi. U y'o ɲɔgɔn fana kɛ bolo filanan kan fana. U ye bolo wɔɔrɔ nunu bɛɛ ta kɛ ten.

²⁰ O daganin naani ɲɔgɔn tun be fitinɛkala yɛrɛ la, ni kurukuruyɔrɔw ani feerenbisigiw.

²¹ U ye kurukuruyɔrɔw kɛ bolo fila fila tuguyɔrɔ la kala la. A kɛra ten bolo wɔɔrɔ nunu bɛɛ tuguyɔrɔw la.

²² Kurukuruyɔrɔ minw tun be fitinɛkala la, u ye olu ni bolo nunu jɛn k'a dilan ɲɔgɔn fɛ ni kala ye. U y'o dilan ni sanu yɛrɛ yɛrɛ faganin ye.

²³ U ye fitinɛbara wolonwula n'a juru tigɛminanw, ani fitinɛ buguri cɛlanw dilan ni sanu yɛrɛ yɛrɛ ye.

²⁴ U ye fitinɛ nin n'a minanw bɛɛ dilan ni sanu yɛrɛ yɛrɛ kilo bi saba ye.

Wusulan jɛniyɔrɔ

²⁵ U ye wusulan jɛniyɔrɔ dilan ni akasiyayiri ye. A faan naani bɛɛ tun ye kelen ye, a jaɲa n'a boɲa bɛɛ tun ye santimɛtɛrɛ bi duuru ye. A jaɲa sanfɛ tun ye mɛtɛrɛ kelen ye. U tun ye gɔɔn bisigi minw kɛ a nɔnkɔn la, olu tun dilanna ka kɛ kelen ye ni wusulan jɛniyɔrɔ ye.

²⁶ U y'a mɔn ni sanu yɛrɛ yɛrɛ ye, a kunna n'a gɛrɛnw bɛɛ, n'a gɔɔnw, k'a lamini, k'a dagolo kɛ ni sanu ye k'a lamini.

²⁷ U ye sanu dilan k'o kɛ i n'a fɔ bololanigɛ fila ye, k'u don a dagolo kɔrɔ a faan fila la, k'o kɛ a talɔgɔw donyɔrɔw ye.

²⁸ U ye akasiyayiri dɔw labɛn k'u mɔn ni sanu ye.

²⁹ U be tulu mɔnta min kɛ ka sarakalasebagaw mɔn, u y'o ni wusulan kasadiman yɛrɛ yɛrɛ dilan tulu kasadiman dilanbaga ka baarakɛcogo la.