Bɔri 36 - ALA KA KUMA

¹ «Besalɛli ni Ooliyabu ani Masaba ye see ni lɔnniya di mɔgɔ minw ma, janko u ka se ka Yɔrɔ Senuman lɔbaara kɛ, olu bɛɛ ka kan k'o baara kɛ ka kɛɲɛ ni Masaba ka kuma ye.»

² Musa ye Besalɛli ni Ooliyabu wele, ani baaralɔnbagaw bɛɛ, Masaba tun ye see di minw ma, n'u sɔnna ka na baara kɛ.

³ Isirayɛlidenw nana ni boɲafɛn minw ye Yɔrɔ Senuman lɔbaara kama, Besalɛli nunu y'o bɛɛ minɛ Musa fɛ. Jama tora ka na n'u diyanaboɲafɛnw ye sɔgɔma o sɔgɔma Musa fɛ.

⁴ O la, baaralɔnbaga nunu minw tun be Yɔrɔ Senuman lɔbaara bɛɛ kɛ, olu bɛɛ y'u ka baara to yen ka taga Musa sɛgɛrɛ,

⁵ k'a fɔ a ye ko: «Masaba ye baara min koo fɔ, an makoya tun be fɛɛn minw na k'o baara kɛ, jama nana n'o ye fɔɔ ka dama tɛmɛ.»

⁶ Musa ko u ka wango la jama sigiyɔrɔ faan bɛɛ la ko muso fara cɛɛw kan, mɔgɔ si kana na ni foyi ye tugu Yɔrɔ Senuman lɔbaara kama. O la, u ma na ni foyi ye tugu,

⁷ bari fɛɛn minw dira, olu y'o baara kɛta bɛɛ bɔ fɔɔ k'a tɔɔ to.

Fanibugu lɔko

⁸ Cɛɛ minw be baara lɔn kosɔbɛ baarakɛlaw cɛma, olu ye fanimugu deen tan dilan ni jese ɲanaman ye, ni jese kɔlɔbolaman, ani jese wulenman, ni jesewulen cɔncɔn, k'o kɛ bugu ye. Baaralɔnbaga ɲanaman ye *serubɛn jaaw kɛ u kan.

⁹ Fanimugu nunu bɛɛ tun ye kelen ye. U kelen kelen bɛɛ jaɲa tun ye mɛtɛrɛ tan ni nanaani ye, u kɔnɔ boɲa tun ye mɛtɛrɛ fila fila ye.

¹⁰ U ye fanimugu duuru tugu ɲɔgɔn na, k'u tɔ duuru fana tugu ɲɔgɔn na.

¹¹ Fanimugu duuru minw tugura ɲɔgɔn na, u ye juru kɔlɔbolamanw kɛ olu dakun na, k'o ɲɔgɔn kɛ tɔ nunu dakun na fana.

¹² U ye minɛyɔrɔ bi duuru dilan ni juru ye fanimugu duurunan dakun na, ka bi duuru wɛrɛ dilan fanimugu duuru dɔ nunu dakun na. Juru nunu bɛnna ɲɔgɔn ma.

¹³ O kɔ, u ye fani minɛfɛn bi duuru dilan ni sanu ye ka fani nunu tugutugu ɲɔgɔn na n'u ye ka kɛ bugu ye.

¹⁴ U ye baasi kɛ ka fanimugu tan ni kelen dilan, k'o ko kɛ bugu nin kuun birifɛn ye.

¹⁵ O fanimugu nunu kelen kelen bɛɛ jaɲa tun ye mɛtɛrɛ tan ni duuru duuru ye, u kɔnɔ boɲa tun ye mɛtɛrɛ fila fila ye. U bɛɛ kɛra kelen ye.

¹⁶ U ye duuru tugu ɲɔgɔn na, k'o tɔ wɔɔrɔ fana tugu ɲɔgɔn na.

¹⁷ Duuru minw tugura ɲɔgɔn na, u ye minɛyɔrɔ bi duuru dilan ni juru ye olu laban dakun na, k'o ɲɔgɔn kɛ fanimugu tɔw dakun na.

¹⁸ U ye fani minɛfɛn bi duuru dilan ni zira ye ka fani nunu tugu ɲɔgɔn na k'o kɛ bugu ye.

¹⁹ Golo minw ka kɛnɛ ani sagajigigolo min dilanna ka wulen, u ye olu kɛ ka bugu nin kuun biri. Golo minw ka kɛnɛ, olu tora sanfɛ.

²⁰ U ye akasiyayiri dɔw lalaga k'u lɔ bugu nin kɔnɔna

²¹ Yiri nunu kelen kelen bɛɛ jaɲa tun ye mɛtɛrɛ duuru duuru ye, u boɲa tun ye santimɛtɛrɛ bi wolonwula ni duuru duuru ye.

²² Seen fila tun b'u kelen kelen bɛɛ la, k'u tilen ni ɲɔgɔn ye. U ye bugu nin yiriw bɛɛ kɛ ten.

²³ U ye yiri mugan lɛsɛ k'o kɛ bugu worodugu ɲafan ta ye,

²⁴ ka jusigilan bi naani dilan ni warigwɛ ye, ka yiri nunu kelen kelen bɛɛ juu sigi fila fila kan, kelen kelen tun be seen nunu kelen kelen bɛɛ jukɔrɔ.

²⁵ U ye yiri mugan lɛsɛ fana k'o kɛ kɔgɔdugu ɲafan fɛ ta ye,

²⁶ ka jusigilan bi naani fana dilan ni warigwɛ ye, yiri nunu kelen kelen bɛɛ ka sigi fila fila kan.

²⁷ U ye yiri wɔɔrɔ lɛsɛ k'o kɛ bugu nin tileben fɛ ta ye, min y'a kɔfɛ ye,

²⁸ ka fila lɛsɛ k'o kɛ bugu nin kɔfɛla nɔnkɔnw taw ye.

²⁹ U ma u juuw sigi ka nɔrɔ ɲɔgɔn na, nga u y'u tugu ɲɔgɔn na sanfɛ ni nigɛ dɔ ye min kɛra i n'a fɔ bololanigɛ. U ye nɔnkɔn fila nunu ta kɛ ten.

³⁰ O tun ye yiri deen seegi ye, ani u ka jusigilan warigwɛlaman tan ni wɔɔrɔ, jusigilan fila, yiri nunu kelen kelen bɛɛ jukɔrɔ.

³¹ U ye akasiyayiri lɛsɛ, k'o kɛ banabiriw ye. U ye duuru don bugu nin faan kelen na,

³² ka duuru don fan kelen fana na, ka duuru wɛrɛ don bugu nin kɔfɛyɔrɔ la, tileben fɛ.

³³ Banabiri min kɛra cɛmancɛ ta ye, ale donna yiri nunu bɛɛ cɛma k'a ta bugu nin faan dɔ la fɔɔ ka ta'a bila a faan dɔ nin na.

³⁴ U ye yiri nunu mɔn ni sanu ye, ka fɛɛn dɔ dilan ni sanu ye i n'a fɔ bololanigɛ, k'o kɛ banabiri nunu donyɔrɔ ye, ka banabiri nunu mɔn ni sanu ye.

³⁵ U ye fani dɔ dan ni jese kɔlɔbolaman ye, ni jese wulenman, ani jesewulen cɔncɔn, ani jese ɲanaman ye, k'o kɛ bugu nin cɛtigɛfani ye. Baaralɔnbaga ɲanaman ye serubɛn jaaw kɛ a kan

³⁶ U ye akasiyayiri tutunan naani dilan fani nin kama k'u mɔn ni sanu ye. U ye fani dulonyɔrɔw dilan ni sanu ye u ka kɛ u nɔrɔyɔrɔw ye, ka tutunan nunu jusigilan naani dilan ni warigwɛ ye.

³⁷ U ye fanibugu dalafani dan ni jese kɔlɔbolaman, ni jese wulenman, ani jesewulen cɔncɔn, ani jese ɲanaman ye k'a sɔgɔ,

³⁸ k'a tutunan duuru n'u fani dulonfɛnw dilan, ka tutunanw kunnafɛnw n'u fanidulonberew mɔn ni sanu ye, k'u jusigilan duuru dilan ni zira ye.