Bɔri 35 - ALA KA KUMA

Lafiɲɛlon

¹ Musa ye Isirayɛli jama bɛɛ lajɛn k'a fɔ u ye ko: «Masaba y'a fɔ ko aw ka koo minw kɛ, olu filɛ nin ye:

² Aw ka baara kɛ tile wɔɔrɔ kɔnɔ, nga tile wolonwulanan loon ka kɛ lafiɲɛlon ye aw fɛ, o ka labila a ye. Ni mɔgɔ o mɔgɔ ye baara kɛ o loon na, o ka faga.

³ Aw kana tasuma mana aw ka sigiyɔrɔ la lafiɲɛlon na.»

Jama be boɲafɛnw di batolikɛso baara kama

⁴ Musa y'a fɔ Isirayɛli jama bɛɛ ye ko Masaba y'a fɔ ko:

⁵ «Aw ka dɔ bɔ aw bololafɛnw na k'a di Masaba ma. Mɔgɔ o mɔgɔ dusu ka di o kɛli la, o tigi ka na o di Masaba ma: sanu ni warigwɛ ni zira,

⁶ jese kɔlɔbolaman, ni jese wulenman, ani jesewulen cɔncɔn, ni jese ɲanaman, ani baasi fana,

⁷ sagajigigolo, u ye minw wulen, ani golo minw ka kɛnɛ, ni akasiyayiri,

⁸ ani fitinɛ tulu, ni fɛɛn kasadimanw, u bena minw kɛ ka tulu mɔnta ni wusulan kasadiman dilan.

⁹ U ka na ni kabakuru kɔlɔbolaman dɔw, ani kabakuru sɔngɔgwɛlɛn dɔ wɛrɛw ye fana k'o kɛ sarakalasebagaw kuntigi ka fani n'a disilafani kan.

¹⁰ «Minw bɛɛ be bololabaara lɔn aw cɛma, Masaba ye fɛɛn minw koo fɔ, olu ka na o dilan,

¹¹ fanibugu n'a kuun birifɛn, ani a fani minɛfɛnw, n'a lɔgɔw, ni banabiriw, ni tutunanw, ani u jusigilanw,

¹² kɛsu n'a talɔgɔw n'a datugulan, ni soo cɛtigɛfani,

¹³ tabali n'a talɔgɔw, n'a minanw bɛɛ ani buru min dira Ala ma,

¹⁴ fitinɛ, n'a minanw bɛɛ, a fitinɛ dagaw ni fitinɛ tulu,

¹⁵ wusulan jɛniyɔrɔ n'a talɔgɔw, ani tulu mɔnta ni wusulan kasadiman, ani fanibugu dalafani,

¹⁶ saraka jɛnita bɔyɔrɔ n'a kɔnɔna tɛmɛ ziralaman, n'a talɔgɔw n'a minanw bɛɛ, ani tasaba n'a jusigilan,

¹⁷ ni lukɛnɛ laminifaniw, ani a tutunanw, n'u jusigilanw, ani luu dondalafani,

¹⁸ fanibugu gweenw ni luu taw, n'u juruw,

¹⁹ sarakalasebaga faniw: sarakalasebaga Arɔn ka baarakɛfaniw n'a dencɛw taw, u be minw don k'u ka sarakalasebaara kɛ Yɔrɔ Senuman na.»

²⁰ Isirayɛli jama bɛɛ bɔra Musa kɔrɔ ka taga.

²¹ Mɔgɔ o mɔgɔ dusu tun ka di, olu bɛɛ nana u yɛrɛ ma ni boɲafɛn ye k'o di Masaba ma, Ɲɔgɔnkunbɛn fanibugu lɔbaara n'a kɔnɔ baara bɛɛ kama, ani janko sarakalasebagaw ka faniw ka se ka dilan.

²² Mɔgɔw bɛɛ, muso fara cɛɛw kan, minw dusu tun ka di, olu nana ni sanufɛn sifaw bɛɛ ye: tulolataw, ani bololataw, ni kannataw, ani dulontaw fani na. U kelen kelen bɛɛ nana n'u ye k'u fifa Masaba ɲakɔrɔ k'o d'a ma.

²³ Jese kɔlɔbolaman, ni jese wulenman, ani jesewulen cɔncɔn, ni jese ɲanaman, ani baasi fana, ni sagajigigolo, u ye minw wulen, ani golo minw ka kɛnɛ, o fɛɛn o fɛɛn nunu tun be mɔgɔ o mɔgɔ bolo, o tigi nana n'o ye.

²⁴ Mɔgɔ o mɔgɔ tun b'a fɛ ka warigwɛ ni zira di, olu nana o di Masaba ma. Akasiyayiri tun be mɔgɔ o mɔgɔ fɛ, n'o be bɛn baara dɔ ma, olu nana n'o ye.

²⁵ Muso minw bɛɛ be se baara la, olu ye paratali kɛ ka na n'u ka fɛɛn parataninw ye: jese kɔlɔbolaman, ni jese wulenman, ni jesewulen cɔncɔn, ani jese ɲanaman.

²⁶ Muso minw bɛɛ be se paratali la, olu ye baasi parata.

²⁷ Jama ɲamɔgɔw nana ni kabakuru kɔlɔbolamanw ani kabakuru sɔngɔgwɛlɛn tɔ nunu ye minw ka kan ka nɔrɔ sarakalasebagaw kuntigi ka fani n'a ka disilafani na.

²⁸ U nana ni tulu ye, dɔ ka kɛ fitinɛ ta ye, dɔ ka kɛ tulu mɔnta ye, dɔ ka kɛ wusulan kasadiman dilan ta ye.

²⁹ Masaba tun ye fɛɛn min fɔ Musa ye ni Musa y'o fɔ Isirayɛlidenw ye, k'u ka baara min kɛ, mɔgɔ minw dusu tun ka di, muso fara cɛɛw kan, u nana ni diyanaboɲafɛnw ye k'u di Masaba ma o baara kama.

Besalɛli ni Ooliyabu be baara nin kɛ

³⁰ Musa y'a fɔ Isirayɛlidenw ye ko: «A filɛ, Masaba ye Zuda kɔmɔgɔ Huri deen Uri dencɛ Besalɛli woloma,

³¹ a y'a Nii don a la, ka see ni hakili d'a ma, ani lɔnniya, janko a ka se ka bololabaara sifa bɛɛ kɛcogo lɔn,

³² ka see d'a ma a ka nigɛ dilan: sanulaman, ni warigwɛlaman, ni zira ta,

³³ ka kabakuru sɔngɔgwɛlɛnw lɛsɛ ani k'u kɛ nigɛ kan, ka yiri lɛsɛ, ani ka bololabaara sifa bɛɛ kɛ.

³⁴ A fana ye see d'a ma ka mɔgɔw kalan, ale ni Dan kɔmɔgɔ Ayisamaki dencɛ Ooliyabu.

³⁵ Kabakuru sɔngɔgwɛlɛ ɲɛgɛncogo sifa bɛɛ, ni jaa kɛcogo, a y'o see d'u ma, ani jeseɲuman sɔgɔcogo, a kɔlɔbolaman fara wulenman kan, ani a wulenman cɔncɔn, ni jese ɲanaman sɔgɔcogo, n'a dancogo. A y'o bɛɛ kɛ see d'u ma, ani baara sifa wɛrɛw bɛɛ, walima bololabaarakɛla be se ka fɛɛn o fɛɛn min kɛ.