Bɔri 25 - ALA KA KUMA

Masaba ko Musa ka sarakabɔyɔrɔ lɔ

¹ Masaba y'a fɔ Musa ye ko:

² «A fɔ Isirayɛlidenw ye k'u ka bolomafara bɔ ka n'a di ne ma. N'a diyara mɔgɔ min ye, a b'a fɛ ka min di, aw k'o minɛ.

³ U ka kan ka fɛɛn minw di aw b'a minɛ, o filɛ: sanu, ni warigwɛ, ani zira,

⁴ ni jese kɔlɔbolaman, ani jese wulenman, ni jesewulen cɔncɔn, ani jese ɲanaman, ni baasi fana,

⁵ ani sagajigigolo u ye minw wulen, ni golo minw ka kɛnɛ, ani akasiyayiri,

⁶ ni fitinɛ tulu, ani fɛɛn kasadiman minw bena kɛ tulu mɔnta ni wusulan kasadimanw na,

⁷ ani kabakuru kɔlɔbolaman ni kabakuru sɔngɔgwɛlɛn dɔ wɛrɛw minw bena kɛ ka sarakalasebagaw kuntigi ka fani n'a disilafani masiri.

⁸ U ka ne ka sigiyɔrɔ dilan, ne bena sigi u cɛma.

⁹ Ne bena n ka fanibugu nin lɔcogo yira i la, n'a kɔnɔnaminanw. Aw k'o kɛ ten le.

Layidu taamasiɲɛ kɛsu dilancogo

¹⁰ «U bena kɛsu dɔ dilan ni akasiyayiri ye. A jaɲa ka kɛ mɛtɛrɛ kelen ni santimɛtɛrɛ mugan ni duuru ye, a boɲa n'a jaɲa sanfɛ ka kɛ santimɛtɛrɛ bi wolonwula ni duuru ye fana.

¹¹ I k'a kɔfɛ na kɔnɔna mɔ ni sanu yɛrɛ yɛrɛ ye, k'a dagolo bɛɛ dilan ni sanu ye.

¹² I ka minɛfɛn naani dɔ dilan i n'a fɔ bololanigɛ ni sanu ye k'u don a nɔnkɔn naani na, fila ka don faan kelen na, fila ka don faan dɔ la.

¹³ I ka akasiyayiri dɔw labɛn ka sanu mɔ u la,

¹⁴ k'u don minɛfɛn nunu na kɛsu nin faan fila la, kɛsu nin bena to ka ta n'o le ye.

¹⁵ Lɔgɔ nunu ka kan ka to kɛsu nin minɛfɛn nunu kɔnɔ, u man kan ka bɔ.

¹⁶ Ne bena walaka kabakurulaman minw d'i ma, ne ka sariyaw sɛbɛnnin be minw kan, i k'olu bila kɛsu nin kɔnɔ.

¹⁷ I bena kɛsu nin datugulan dilan ni sanu yɛrɛ yɛrɛ ye. A jaɲa ka kɛ mɛtɛrɛ kelen ni santimɛtɛrɛ mugan ni duuru ye, a boɲa ka kɛ santimɛtɛrɛ bi wolonwula ni duuru ye.

¹⁸ I ka *serubɛn jaa fila dilan ni sanu yɛrɛ yɛrɛ ye k'o sigi datugulan nin dakun fila la.

¹⁹ I ka serubɛn kelen dilan dakun kelen na ka kelen dilan a dakun dɔ nin na, u ni datugulan nin ka nɔrɔ ɲɔgɔn na.

²⁰ U gamanw ka wili sanfɛ kɛsu datugulan kunna, k'u gamanw biri a kan k'u ɲaa sin ɲɔgɔn ma, u ɲaa bena sin kɛsu datugulan nin ma.

²¹ I ka datugulan nin kɛ ka kɛsu nin datugu. Ne bena walaka minw d'i ma, i k'o bila kɛsu kɔnɔ.

²² Ne bena n yɛrɛ yira i la o yɔrɔ la, kɛsu sanfɛ datugulan nin sanfɛ, serubɛn fila nunu cɛma, ka n ka fɔtaw bɛɛ fɔ i ye, i ka kan ka minw fɔ Isirayɛlidenw ye.

Tabali dilancogo

²³ «I ka tabali dilan ni akasiyayiri ye. A jaɲa ka kɛ mɛtɛrɛ kelen ye, a boɲa ka kɛ santimɛtɛrɛ bi duuru ye, a jaɲa sanfɛ ka kɛ santimɛtɛrɛ bi wolonwula ni duuru ye.

²⁴ A mɔ ni sanu yɛrɛ yɛrɛ ye, k'a dagolo dilan ni sanu ye.

²⁵ I k'a dagolo dilan k'a wili sanfɛ a ka se mɔgɔ tigɛ boɲa ma, ka sanu mɔ o kan.

²⁶ I ka minɛfɛn naani dɔ dilan ni sanu ye i n'a fɔ bololanigɛ, k'o nɔrɔ tabali nin nɔnkɔn naani nunu na, minw be bɛn ni seen naani nunu ye.

²⁷ O minɛfɛn nunu ka kan ka nɔrɔ dagolo nin gɛrɛfɛ, tabali nin talɔgɔw bena don u kɔnɔ.

²⁸ I ka akasiyayiri dɔw labɛn ka sanu mɔ u la, u ka kɛ tabali talɔgɔw ye.

²⁹ I k'a tasaw ni filenw, ani baraw ni dagaw dilan ni sanu yɛrɛ yɛrɛ ye, k'o kɛ aw ka sarakabɔminanw ye.

³⁰ Buru minw kɛra sarakabɔ ta ye, i ka to k'o bila tabali nin kan tuma bɛɛ ne ɲakɔrɔ.

Fitinɛ dilancogo

³¹ «I ka fitinɛ dilan ni sanu yɛrɛ yɛrɛ ye. A ka dilan ni sanu faganin ye. A juu n'a kala, n'a daganinw: feerenbisigiw, ni kurukuruyɔrɔw, o bɛɛ ka dilan ka nɔrɔ ɲɔgɔn na.

³² Bolo wɔɔrɔ ka kɛ fitinɛ nin na. Saba ka to faan kelen na, saba ka to a faan dɔ la.

³³ Daganin saba minw be i n'a fɔ amandiyiri deenw, olu ka sigi bolo kelen kan, ani kurukuruyɔrɔw ni feerenbisigi. O ɲɔgɔn fana ka kɛ bolo filanan kan fana, bolo wɔɔrɔ nunu bɛɛ ta ka kɛ ten.

³⁴ O daganin naani ɲɔgɔn ka kɛ fitinɛkala yɛrɛ la, kurukuruyɔrɔw ni feerenbisigiw.

³⁵ Kurukuruyɔrɔw ka kɛ bolo fila fila tuguyɔrɔ la kala la, a ka kɛ ten bolo wɔɔrɔ nunu bɛɛ tuguyɔrɔw la.

³⁶ Kurukuruyɔrɔ minw bena kɛ fitinɛkala la, o ni bolo nunu ka jɛn ka dilan ɲɔgɔn fɛ ni kala ye. U ka dilan ni sanu yɛrɛ yɛrɛ faganin ye.

³⁷ I ka fitinɛbara wolonwula nunu dilan k'u daa sin yɔrɔ la janko u ka yeelen bɔ fitinɛ ɲafɛ.

³⁸ Fitinɛ juru tigɛminanw n'a buguri cɛminanw ka kan ka kɛ nisanu yɛrɛ yɛrɛ ye.

³⁹ Fitinɛ n'a minan nunu bɛɛ ka dilan ni sanu yɛrɛ yɛrɛ kilo bi saba ye.

⁴⁰ Ne ye cogo min yira i la kulu kan, i jija a bɛɛ ka kɛ ten.