Bɔri 21 - ALA KA KUMA

Sariya minw sigira jɔɔnw kosɔn

¹ Masaba y'a fɔ tugu ko: «I bena sariya minw fɔ jama ye, o filɛ:

² «N'aw ye eburu dɔ san k'a kɛ jɔɔn ye, a bena baara kɛ o tigi ye saan wɔɔrɔ kɔnɔ, a ka jɔnya be ban saan wolonwulanan na, a te foyi sara.

³ N'a tun nana i fɛ a kelen, a bena taga a kelen. Ni muso tun b'a fɛ a natuma na, ale fana be taga n'a ye.

⁴ N'a kuntigi le tun ye muso d'a ma, n'o muso nin ye dencɛw, walima denmusow wolo a ye, olu bena kɛ a kuntigi taw ye, cɛɛ dama le bena taga.

⁵ Nga n'o jɔncɛ nin y'a fɔ ko a kuntigi n'a muso, ani a deenw koo ka d'a ye, ko a t'a fɛ ka taga,

⁶ o tuma na, a kuntigi bena Ala kɛ a seere ye, ka jɔɔn nin minɛ ka gwɛrɛ bon donda koon walima a daa la lɔgɔ la, k'a tulo sɔgɔ. K'a ta o waati la, jɔɔn nin bena kɛ a kuntigi ta ye a sii bɛɛ la.

⁷ «Ni mɔgɔ dɔ y'a denmuso feere k'a kɛ jɔɔn ye, ale tena hɔrɔnya jɔɔn tɔw hɔrɔnyacogo la.

⁸ N'a nigɛ bɔr'a kuntigi la, kuntigi nin ben'a to a facɛ b'a kunmabɔ. A man kan k'a feere lonan ma, o ye janfa ye.

⁹ N'a y'a di a dencɛ ma ka kɛ a muso ye, a k'a minɛ i n'a fɔ a denmuso.

¹⁰ N'a ye muso wɛrɛ furu, a man kan ka dɔ bɔ muso fɔlɔ ka balo, n'a fɛɛrɛbɔ, ani a layɔrɔ koo la furu kɔnɔ.

¹¹ N'a ma o koo saba nunu kɛ a ye, muso nin be se ka bɔ a fɛ, a man kan ka foyi sara.

Mɔgɔ be se ka faga koo minw kosɔn

¹² «Ni mɔgɔ dɔ y'a tɔɲɔgɔn bugɔ k'a faga, o tigi fana ka kan ka faga.

¹³ Nga n'a m'a lawili a kama ka taga dogo k'a faga, ni ne Ala le tun y'a latigɛ ten, ne bena yɔrɔ min yira, a ka boli ka taga kalifa o yɔrɔ la.

¹⁴ Nga ni mɔgɔ dɔ tugura k'a tɔɲɔgɔn faga namara la, aw k'o mɔgɔfagala nin minɛ hali n'a y'a yɛrɛ kalifa ne ka sarakabɔyɔrɔ la, aw k'a faga.

¹⁵ «Ni mɔgɔ dɔ y'a faa, walima a baa bugɔ, o tigi ka kan ka faga.

¹⁶ «Ni mɔgɔ dɔ y'a tɔɲɔgɔn soɲa k'a feere, walima n'a y'a mara a fɛ, o tigi ka kan ka faga.

¹⁷ «Ni mɔgɔ dɔ y'a faa, walima a baa nɛni, o tigi ka kan ka faga.

Ɲɔgɔnmandimiko

¹⁸ «Ni dɔw kɛlɛla, ni kelen ye tɔ kelen bon ni kabakuru ye, walima k'a bugɔ n'a bolokuru ye, k'a mandimi, n'a te se ka wili, nga a ma sa,

¹⁹ n'a be se ka wili ka bɔ kɛnɛma ni bere ye, a bugɔbaga kunko banna. Nga a ye mɔgɔ min mandimi, ale ye waati min kɛ duguma, a b'o sara, ani ka janto a la fɔɔ a ka kɛnɛya pewu.

²⁰ «Ni mɔgɔ dɔ y'a ka jɔɔn bugɔ ni bere ye, a cɛman fara musoman kan, n'o kɛra sababu ye a sara, u kana o tigi to ɲasuma na.

²¹ Nga ni jɔɔn nin tora nii na tile kelen, walima tile fila, foyi tena kɛ a kuntigi la bari a ta lo.

²² «Ni cɛɛ dɔw kɛlɛla fɔɔ ka taga gosi muso kɔnɔman na, ka kɛ sababu ye a jigira ni basi wɛrɛ ma sɔrɔ, muso nin cɛɛ mana warida min fɔ, ni kititigɛlaw sɔnna o ma, kɛlɛkelaw bena o sara.

²³ Nga ni kojugu wɛrɛ y'a sɔrɔ, o ɲɔgɔn ka kan ka kɛ u la. Nii juru be bɔ ni nii ye.

²⁴ Ɲaa juru be bɔ ni ɲaa ye. Ɲiin juru be bɔ ni ɲiin ye. Bolo juru be bɔ ni bolo ye. Seen juru be bɔ ni seen ye.

²⁵ Jɛnida juru be bɔ ni jɛnida ye, mandimini juru be bɔ ni mandiminin ye, jogini be bɔ ni jogoni ye.

²⁶ «Ni mɔgɔ dɔ y'a ka jɔncɛ, walima a ka jɔnmuso ɲaa bugɔ k'a ci, jɔɔn nin be hɔrɔnya, o be kɛ a ɲaden sara ye.

²⁷ N'a y'a ka jɔncɛ, walima a ka jɔnmuso bugɔ k'a ɲiin kelen kari, jɔɔn nin be hɔrɔnya, o be kɛ a ɲiin sara ye.

²⁸ «Ni misi ye cɛɛ, walima muso susu n'a gɔɔn ye k'a faga, u ka misi nin bon ni kabakuruw ye k'a faga. A sogo kana ɲimi. Misitigi te kunko sɔrɔ tugu.

²⁹ Nga ni misi nin tun be deli k'o kɛ, n'u tun y'o fɔ a tigi ye, a ma sɔn k'a mara, fɔɔ misi nin ye mɔgɔ faga, a ka kan ka bon ni kabakuruw ye k'a faga, k'a tigi fana faga.

³⁰ Nga ni suu ka mɔgɔw sɔnna o tigi ka fɛɛn di k'a yɛrɛ kuun bɔ, u mana fɛɛn o fɛɛn fɔ, a k'o di k'a kɛ k'a yɛrɛ kuun bɔ.

³¹ Ni misi ye mɔgɔ dɔ dencɛ, walima a denmuso susu, o koo be ɲanabɔ ka kɛɲɛ ni sariya kelen nin ye.

³² Ni misi ye jɔncɛ, walima jɔnmuso susu, misitigi ka kan ka warigwɛ kuru bi saba di jɔɔn ka kuntigi ma. U ka misi bon ni kabakuruw ye k'a faga.

³³ «Ni mɔgɔ dɔ ye kɔlɔnba dayɛlɛ, walima n'a y'a sogi k'a daa yɛlɛnin to yen, ni misi, walima fali benna o kɔnɔ,

³⁴ a tigi bena begɛntigi nin sara, begɛn suu nin be kɛ a ta ye.

³⁵ «Ni mɔgɔ dɔ ka misi ye mɔgɔ wɛrɛ ta susu k'a faga, misi ɲanaman bena feere u k'a sɔngɔ tilan u ni ɲɔgɔn cɛ, u fana ka dɔ nin tilan u ni ɲɔgɔn cɛ.

³⁶ Nga n'a lɔnna ko misi nin tun be to ka kɛlɛ kɛ, o bɛɛ n'a ta, a tigi m'a mara, o tuma na, a bena misi nin ɲɔgɔn di, ani ka to ni dɔ nin ye.

Begɛn soɲako

³⁷ «Ni mɔgɔ dɔ ye misi, walima saga soɲa k'a faga, walima k'a feere, o tigi bena misi duuru le sara misi nin kunkɔrɔ. Ni saga lo, a bena saga naani le sara.