Bɔri 20 - ALA KA KUMA

Ala ka sariyaw

¹ Ala ye kuma nunu bɛɛ fɔ fana ko:

² «Ne ye Masaba ye, aw ka Ala, min y'aw bɔ Ezipiti jamana na, k'aw bɔ jɔnya la.

³ «Aw kana fɛɛn wɛrɛ bato fɔɔ ne kelenpe.

⁴ «Aw kana joo si dilan aw yɛrɛ ye, k'a kɛ i n'a fɔ sanfɛ fɛɛn dɔ jaa, walima dugukolo kan fɛɛn, walima jikɔnɔfɛn.

⁵ Aw kana aw kunbiri gwan o kɔrɔ, aw kana u bato, bari ne Masaba aw ka Ala, keliya be ne la. Ne be faaw ka tilenbaliyako hakɛ bɔ u deenw na fɔɔ ka ta'a bila ne kɔniyabagaw mamadenw n'u ka tulomasamaw na.

⁶ Nga minw be ne kanu ka ne ka kuma mara, ne be makari olu kɔmɔgɔw la fɔɔ *filankuru caaman.

⁷ «Aw kana ne, Masaba aw ka Ala tɔgɔ wele gwansan, bari mɔgɔ min be ne tɔgɔ wele gwansan, ne Masaba tena o tigi jalakibali to.

⁸ «Aw k'aw hakili to lafiɲɛlon na k'a bila ne Masaba ye.

⁹ Tile wɔɔrɔ kɔnɔ, aw bena aw ka baara bɛɛ kɛ.

¹⁰ Nga tile wolonwulanan loon ye ne Masaba aw ka Ala ka lafiɲɛlon ye. Aw kana baara si kɛ o loon na, aw n'aw dencɛw, n'aw denmusow, ani aw ka jɔncɛw n'aw ka jɔnmusow, ani aw ka begɛnw ni lonanw, minw b'aw ka dugu kɔnɔ.

¹¹ Bari ne, Masaba ye sankolo ni dugukolo ani kɔgɔji, n'u kɔnɔnafɛnw bɛɛ dan tile wɔɔrɔ kɔnɔ ka sɔrɔ ka lafiɲɛ tile wolonwulanan loon na. O le y'a to ne Masaba ye barika don lafiɲɛlon na k'a kɛ ne ta ye.

¹² «Aw k'aw faa n'aw baa boɲa, janko ne, Masaba aw ka Ala bena jamana min d'aw ma, aw ka sijan sɔrɔ o kɔnɔ.

¹³ «Aw kana mɔgɔ faga.

¹⁴ «Aw kana kakalaya kɛ.

¹⁵ «Aw kana soɲali kɛ.

¹⁶ «Aw kana galon la aw mɔgɔɲɔgɔn kan.

¹⁷ «Aw ɲaa kana bɔ aw mɔgɔɲɔgɔn ka soo fɛ. Aw ɲaa kana bɔ aw mɔgɔɲɔgɔn muso fɛ, walima a ka jɔncɛ, walima a ka jɔnmuso, walima a ka misi, walima a ka fali, walima a bololafɛn si fɛ.»

Isirayɛlidenw be siran

¹⁸ Jama ye saan pɛrɛnkan ni buru fiyɛkan mɛn, ka saan manamanatɔ ye, ani ka kulu sisitɔ ye tuma min na, u yɛrɛyɛrɛla siranya bolo. U lɔra yɔrɔjan na

¹⁹ k'a fɔ Musa ye ko: «Ele yɛrɛ ka kuma an fɛ, an bena i lamɛn, nga Ala yɛrɛ kana kuma an fɛ, n'o tɛ, an bena sa.»

²⁰ Musa y'a fɔ jama ye ko: «Aw kana siran, Ala nana aw kɔrɔbɔ le, janko aw ka siran a ɲa, ani aw kana na hakɛ kɛ.»

²¹ Ayiwa, jama tora yɔrɔjan. Ala tun be sankaba finman min kɔnɔ, Musa gwɛrɛla o la.

Sariya minw sigira sarakabɔlan kosɔn

²² Masaba y'a fɔ Musa ye ko a k'a fɔ Isirayɛlidenw ye ko: «Aw yɛrɛw y'a ye ko ne kumana aw fɛ ka bɔ sankolo la.

²³ Aw kana joo si dilan aw yɛrɛ ye ni warigwɛ, walima sanu ye ka fara ne kan.

²⁴ Aw ka sarakabɔyɔrɔ lɔ ne ye ni bɔgɔ ye k'aw ka saraka jɛnitaw n'aw ka jɛnɲɔgɔnya sarakaw bɔ ne ye o kan, aw ka begɛnmisɛnw n'aw ka misiw. Ne bena n yɛrɛ yira yɔrɔ o yɔrɔ, ne bena aw ta ɲa.

²⁵ N'aw be sarakabɔyɔrɔ lɔ ne ye ni kabakuruw ye, aw kan'a lɔ ni kabakurulɛsɛninw ye, bari n'aw be kabakuru lɛsɛ ni aw ka minanw ye tuma min na, aw b'o nɔgɔ.

²⁶ Aw kana yɛlɛ yɛlɛyɛlɛnan kan ka sɔrɔ ka yɛlɛ ne ka sarakabɔyɔrɔ kan janko aw yɛlɛtɔ, aw julakolon kana ye.»