Bɔri 18 - ALA KA KUMA

Zetoro be na Musa fɛ

¹ Masa Ala ye min kɛ Musa n'a ka jama Isirayɛli ye, k'o bɔ Ezipiti jamana kɔnɔ, Musa birancɛ Zetoro y'o kibaru bɛɛ mɛn, ale min tun ye Madiyan murutigi ye.

² O y'a sɔrɔ Musa tun y'a muso Sipora bila. A tagar'a facɛ fɛ, a birancɛ Zetoro fɛ

³ n'a dencɛ fila. Deen kelen tɔgɔ ko Gɛrisɔn, bari Musa tun ko: «Ne ye lonan ye jamana wɛrɛ la.»

⁴ Tɔ kelen tɔgɔ ko Eliyezɛri, bari a ko: «Ne faa ka Ala kɛra ne dɛmɛbaga ye, a ye ne kisi Ezipiti masacɛ ka murujan ma.»

⁵ Musa birancɛ Zetoro nana ni Musa muso Sipora n'a dencɛ fila ye Musa fɛ kongokolon kɔnɔ a ka sigiyɔrɔ la Ala ka kulu gɛrɛfɛ.

⁶ A tun ye cii bila k'a fɔ Musa ye ko: «Ne, i birancɛ Zetoro, ne be nana i fɛ n'i ka muso, n'a dencɛ fila ye.»

⁷ Musa tagar'a birancɛ kunbɛn k'a kunbiri gwan a kɔrɔ, k'a bolo meleke a kaan na. U ye ɲɔgɔn fo, o kɔfɛ, u donna fanibugu kɔnɔ.

⁸ Masaba ye min kɛ Ezipiti masacɛ ni Ezipitikaw la ka Isirayɛlidenw dɛmɛ, Isirayɛlidenw ye gwɛlɛya minw bɛɛ sɔrɔ sira la, ani Masaba y'u kisi cogo min na, Musa y'o bɛɛ lakali a birancɛ ye.

⁹ Masaba ye koɲuman min bɛɛ kɛ Isirayɛlidenw ye k'u bɔsi Ezipitikaw bolo, o diyara Zetoro ye.

¹⁰ A ko: «Masaba ka tanu, ale min y'aw bɔsi Ezipitikaw n'u ka masacɛ bolo, k'a ka jama bɔsi Ezipitikaw bolo!

¹¹ Ne y'a lɔn sisan ko Masaba fanga ka bon ni batofɛntɔw bɛɛ ye. Hali tuma min na u tun fariyara a ka mɔgɔw ma.»

¹² Zetoro ye saraka jɛnita ni saraka dɔ wɛrɛw bɔ Ala ye. Arɔn ni Isirayɛli cɛkɔrɔba bɛɛ ye dumuni kɛ ni Musa birancɛ ye Ala ɲakɔrɔ.

Kititigɛlaw ka koo

¹³ O dugusagwɛ, Musa sigira waasa ka jama ka koow ɲanabɔ. Jama nan'a ɲakɔrɔ kabini sɔgɔma fɔɔ wulafɛ.

¹⁴ Musa tun be min bɛɛ kɛ jama ye, a birancɛ y'o ye tuma min na, a ko: «I be mun le kɛra jama nin ye ten? Mun na i kelen le be sigi yan, jama bɛɛ be na lɔ i fɛ kabini sɔgɔma fɔɔ wulafɛ?»

¹⁵ Musa y'a birancɛ jaabi ko: «Jama be na ne fɛ, janko ka Ala sago lɔn.

¹⁶ Ni koo dɔ be u n'u tɔɲɔgɔn cɛ, u be na ne fɛ, ne b'o ɲanabɔ, ka Ala sago n'a ka sariyaw yira u la.»

¹⁷ Musa birancɛ y'a fɔ a ye ko: «I be min kɛ, o ma ɲi.

¹⁸ I bena i yɛrɛ barika ban, jama min be n'i ye, k'o fana barika ban. Baara nin ka bon i ma, i kelenpe te se a kɔrɔ.

¹⁹ I tulo malɔ ne fɛ sisan, ne bena i ladi. Ala ka to n'i ye. I ka kan ka kɛ jama ka dalaminɛ ye Ala ɲakɔrɔ ka to k'u ka koow ɲafɔ a ye,

²⁰ ani ka to ka Ala ka kolatigɛninw n'a ka sariyaw ɲafɔ u ye. U ka kan ka sira min taama, ani ka koo minw kɛ, i ka olu yira u la.

²¹ I ka mɔgɔsɔbɛ dɔw woloma fana jama cɛma, minw be siran Ala ɲa, lanamɔgɔw, mɔgɔ te se ka minw daa san, k'u kɛ kuntigiw ye jama kunna, dɔw ka kɛ mɔgɔ waa kelen kelen kunna, dɔw ka kɛ mɔgɔ kɛmɛ kɛmɛ kunna, dɔw ka kɛ mɔgɔ bi duuru duuru kunna, ani dɔw ka kɛ mɔgɔ tan tan kunna.

²² Olu ka jama ka kitikow ɲanabɔ tuma bɛɛ. U ka na ni kogwɛlɛnw ye i fɛ, olu yɛrɛ ka komisɛnw ɲanabɔ. O b'i ka baara nɔgɔya, bari olu bena i dɛmɛ.

²³ N'i b'o kɛ, Ala ben'a sago yira i la, i bena se k'i ka baara kɛ, ani jama nin bɛɛ bena se u taayɔrɔw la hɛrɛ la.»

²⁴ Musa ye mɛnni kɛ a birancɛ fɛ, k'a ka kuma bɛɛ bato.

²⁵ A ye mɔgɔsɔbɛ dɔw woloma ka bɔ Isirayɛlidenw cɛma k'u kɛ kuntigiw ye: Mɔgɔ waa kelen kelen kuntigiw ni kɛmɛ kɛmɛ kuntigiw, ni bi duuru duuru kuntigiw, ani tan tan kuntigiw.

²⁶ Olu le tun be jama ka kitikow ɲanabɔ tuma bɛɛ. U tun be taga Musa sɛgɛrɛ ni kogwɛlɛnw ye, ka komisɛnw ɲanabɔ u yɛrɛ ma.

²⁷ Musa ye sira di a birancɛ Zetoro ma, a kɔsegira ka ta'a yɛrɛ ka jamana na.