Ɛsitɛri 6 - ALA KA KUMA

Aman be Maridose boɲa

¹ O suu yɛrɛ la, masacɛ ma se ka sinɔgɔ, masacɛw ka mara kɔnɔ loon bɛɛ kibaru be sɛbɛn sɛbɛ min kɔnɔ, a ko u ka na n'o ye. U y'o kalan masacɛ ɲana.

² K'u to kalan na u tagara bɔ masacɛ ka baaraden Bigita ni Tɛrɛsi ka koo kan, minw tun b'a fɛ ka masacɛ faga, ni Maridose tun bɔra u kala ma k'a fɔ masacɛ ye.

³ Masacɛ y'a fɔ ko Maridose tun ye boɲa ni kunkɔrɔta jumɛn le sɔrɔ o la. Masacɛ ka baarakɛlaw ko foyi.

⁴ O y'a sɔrɔ Aman tun nana masacɛ ka luu kɔnɔ, janko a ka masacɛ daali a be to u be Maridose dulon lɔgɔ kan ale yɛrɛ tun ye min dilan o kama. Masacɛ ye ɲiningali kɛ ko jɔn le be luu kɔnɔ.

⁵ Masacɛ ka baaradenw y'a jaabi ko Aman lo. Masacɛ ko a ka don.

⁶ A donna. Masacɛ y'a ɲininga ko: «Ni masacɛ b'a fɛ ka mɔgɔ min boɲa, mun le ka kan ka kɛ o tigi ye?» Aman y'a miiri a yɛrɛ kɔnɔ ko: «Jɔn le be yen ni masacɛ b'a fɛ k'a boɲa ka tɛmɛ ne kan?»

⁷ O la, a y'a fɔ masacɛ ye ko: «Ni masacɛ b'a fɛ ka mɔgɔ min boɲa,

⁸ i ye fani min biri i kan, n'i yɛlɛla soo min kan, ni masacɛ ka soo masirifɛn b'a kuun na, u ka na n'o ye,

⁹ k'i ka kuntigiba nunu dɔ wele, ka fani ni soo nin di ale ma. I b'a fɛ ka mɔgɔ min boɲa, u ka fani nin don o tigi kaan na, k'a yɛlɛ soo nin kan, ka don n'a ye dugu kɔnɔ ka yaalayaala n'a ye, ka to a ɲafɛ ka to ka pɛrɛn k'a fɔ ko: ‹Ni masacɛ b'a fɛ ka mɔgɔ min boɲa, u b'o tigi kɛ ten le.› »

¹⁰ Masacɛ y'a fɔ Aman ye ko: «I y'a fɔ cogo min na, fani ni soo nin minɛ joona joona, k'o ɲɔgɔn kɛ zuwifucɛ Maridose ye, min siginin be n ka luu daa la. I ye fɛɛn o fɛɛn fɔ, i kana ɲinɛ o si kɔ n'i m'a kɛ.»

¹¹ Aman ye fani nin ta ka soo minɛ, ka fani don Maridose kaan na, k'a yɛlɛ soo kan ka taga yaala n'a ye dugu forobayɔrɔ la. A tora Maridose ɲafɛ n'a be pɛrɛn k'a fɔ ko: «Ni masacɛ b'a fɛ ka mɔgɔ min boɲa, u b'o tigi kɛ ten le.»

¹² O kɔ, Maridose segira ka na masacɛ ka luu daa la. Aman tɛmɛna ka teliya ka ta'a ka soo, a hakili ɲagaminin ye fani biri a kuun na.

¹³ A tagara se, koo minw bɛɛ y'a sɔrɔ, a y'o bɛɛ ɲafɔ a ka muso Zɛrɛsi n'a teriw bɛɛ ye. A ladibagaw n'a ka muso Zɛrɛsi y'a fɔ a ye ko: «Maridose ye zuwifu ye. E do daminɛna ka jigi a kɔrɔ ka ban. I tena se a kɔrɔ tugu. Siga t'a la, i bena nagasi a kɔrɔ le.»

¹⁴ K'u to o kuma na, masacɛ ka baaradenw fana sera ka Aman wele teliya la ka taga n'a ye Ɛsitɛri ka dumuni labɛnnin kɛyɔrɔ la.