Ɛsitɛri 5 - ALA KA KUMA

Ɛsitɛri be taga masacɛ fɛ

¹ Tile sabanan loon, Ɛsitɛri y'a ka masamusofaniw don ka taga don masacɛ ka luu ɲafɛla la ka lɔ a ka boon daa la. O y'a sɔrɔ masacɛ tun siginin be a ka masasigilan kan a ka soo kɔnɔ k'a ɲaa sin soo donda la.

² A y'a ka muso Ɛsitɛri lɔnin ye tuma min na a ka luu kɔnɔ, a koo diyar'a ye. A y'a ka sanubere wili k'a sin a ma. Ɛsitɛri gwɛrɛla ka maga bere nin dakun na.

³ A ye Ɛsitɛri ɲininga ko: «Masamuso Ɛsitɛri, mun le kɛra? I be mun le fɛ? Hali n'a kɛra ne ka mara tilan kelen ye, ne b'a d'i ma.»

⁴ Ɛsitɛri y'a fɔ a ye ko: «Ne ye dumuni labɛn masacɛ ye. N'i sɔnna, i ka na ni Aman ye o dumuyɔrɔ la bii.»

⁵ Masacɛ y'a fɔ k'u ka taga Aman wele joona joona, janko u ka taga i n'a fɔ Ɛsitɛri y'a ɲini a fɛ cogo min na. Masacɛ ni Aman tagara Ɛsitɛri ka dumuni kɛyɔrɔ la.

⁶ K'u to duvɛn min na, masacɛ y'a fɔ Ɛsitɛri ye ko: «I be mun le fɛ? O bena d'i ma. I b'a fɛ n ka mun le kɛ i ye? Hali n'a kɛra ne ka mara tilan kelen ye, n b'a d'i ma.»

⁷ Ɛsitɛri y'a jaabi ko: «Ne be fɛɛn min fɛ, ne be fɛɛn min ɲinina, o filɛ nin ye:

⁸ Ni ne koo ka di masacɛ ye, n'a be sɔn ne ka daali ma, ka ne ka laɲini kɛ n ye, masacɛ ni Aman ka kɔsegi ka na sini tugu ne ka dumuni labɛn aw ye. Ne bena masacɛ jaabi sini.»

Aman b'a fɛ ka Maridose faga

⁹ O loon na, Aman nisɔndiyaninba le bɔra. Nga a tagara Maridose sɔrɔ masacɛ ka luu daa la tuma min na, ale ma wili, a ma magamaga yɛrɛ a ɲakɔrɔ k'a boɲa, Aman dimina Maridose kɔrɔ kosɔbɛ.

¹⁰ O bɛɛ n'a ta, a sera k'a yɛrɛ minɛ, ka tɛmɛ ka ta'a ka soo. A ser'a ka soo tuma min na, a ye mɔgɔ bila ka ta'a teriw n'a ka muso Zɛrɛsi wele.

¹¹ Aman y'a daminɛ k'a ka nafoloba, n'a deenw ka caya koo fɔ u ye. Masacɛ ye boɲa min la a kan, n'a kɛra masacɛ ka baara kuntigi, ni baaradenw bɛɛ kuntigi ye cogo min na, a y'o bɛɛ fɔ u ye.

¹² A y'a fɔ tugu ko: «O dama tɛ, masacɛ ka muso Ɛsitɛri ye ne kelen, ni masacɛ le wele a ka dumuni labɛnnin na, a ye ne ni masacɛ wele sini tugu.

¹³ Nga ni ne ye zuwifucɛ Maridose nin siginin ye masacɛ ka luu daa la, o koo bɛɛ be kɛ fuu ye ne ɲana.»

¹⁴ A ka muso Zɛrɛsi n'a teriw bɛɛ y'a fɔ a ye ko: «To u be lɔgɔ dɔ labɛn min jaɲa be mɛtɛrɛ mugan ni duuru ɲɔgɔn bɔ, sini sɔgɔma i k'a ɲini masacɛ fɛ, u ka Maridose dulon o lɔgɔ nin kan. O la, i nisɔndiyanin bena taga ni masacɛ ye dumuni nin kɛyɔrɔ la.» O kuma diyara Aman ye, a y'a kɛ u ye lɔgɔ nin lalaga.