Daniyɛli 7 - ALA KA KUMA

Daniyɛli ka yelifɛn fɔlɔ

¹ Babilɔni masacɛ Balitazari ka masaya saan fɔlɔ la, ka Daniyɛli to a ka dilan kan, a sikora ka fɛɛn dɔw ye. A sikora ni koo min ye, a y'o sɛbɛn.

² A y'o lakali ten ko: «Ka n to siko la sufɛ, n y'a ye fɔɲɔ bɔra diɲɛ faan naani na ka na kɔgɔjiba kan.

³ Sogobaba naani bɔra kɔgɔji kɔnɔ. U si tun te sifa kelen ye.

⁴ Sogo fɔlɔ bɔnin tun be jara fɛ. Sɛgɛn gaman tun b'a fɛ. Ka n to a filɛli la, a gamanw bɔnna ka bɔ a la, a wilila ka lɔ a seen fila kan i n'a fɔ adamaden. A fana ye adamaden ka dusukun sɔrɔ.

⁵ Sogo filanan tun bɔnin be warajugu dɔ fɛ. A ɲafɛsenw tun ma se duguma. Galagakolo saba tun b'a ɲiin kɔrɔ. A fɔr'a ye ko: ‹Wili ka lɔ, ka taga sogo caaman ɲimi!›

⁶ O kɔ, n ye sogo wɛrɛ ye. Ale bɔnin tun be waraninkala fɛ. Kɔnɔ gaman naani tun b'a kɔɔ la, a kungolo tun ye naani ye. Kuntigiya dira ale ma.

⁷ O tɛmɛnin kɔ, ka n to sufɛ yelifɛn nunu filɛli la, n ye sogo naaninan ye. Ale tun be siranya bila mɔgɔ la kojugu. Barika tun b'a la kosɔbɛ! A ɲiiw tun ka janjan, o bɛɛ nigɛ. N'a ye fɛɛn min sɔrɔ, a b'o faranfaran k'o ɲimi. Min tɔɔ tora, a b'o dɔndɔn a seen kɔrɔ. Ale ni sogo tɔɔ nunu tun te kelen ye. Gɔɔn tan le tun b'a fɛ.

⁸ Ka n to o gɔɔn nunu filɛli la, gɔnfitini dɔ bɔra u cɛma. Ale kosɔn, gɔɔn nunu saba bɔnna ka bɔ yen. Ɲadenw tun be ale gɔɔn nin fɛ i n'a fɔ mɔgɔ ɲadenw. Daa tun b'a fɛ ka kumababaw fɔ.

Ala ka kiti

⁹ «Ka n to filɛli la, masasigilan dɔw nana bila. Cɛkɔrɔba dɔ nana sigi. A kannafani tun gwɛnin lo parapara. A kunsigi tun be i n'a fɔ kɔɔrimugu. A ka masasigilan tun be i n'a fɔ tasuma. Sigilan seenw tun be i n'a fɔ takami.

¹⁰ Tasuma tun be bɔr'a ɲafɛ ka kɛ i n'a fɔ baji be woyo cogo min na. Nimanfɛn waa caaman caaman tun b'a ɲafɛ ka to k'a mako ɲa. Kititigɛlaw sigira, sɛbɛ dɔw daa yɛlɛla.

¹¹ Ne tora ka filɛli kɛ, gɔnfitini nin ka kumababaw kosɔn, a tun be minw fɔra. Ka n to filɛli la, u ye sogo naaninan nin faga k'a suu halaki, k'a fili tasuma fariman na.

¹² Sogo tɔ nunu ka kuntigiya bɔsira u la. Nga u y'u to nii na fɔɔ ka taga se waati dɔ ma min latigɛra.

¹³ Ka n to sufɛ yelifɛn nunu filɛli la, n ye fɛɛn dɔ natɔ ye sankaba kan i n'a fɔ mɔgɔ dencɛ. A tagara cɛkɔrɔba faan fɛ. U gwɛrɛla n'a ye cɛkɔrɔba kɔrɔ.

¹⁴ Kuntigiya, ni boɲa, ani masaya dir'a ma. Maraw bɛɛ la, siyaw bɛɛ mɔgɔw y'a bato. A ka kuntigiya ye waati bɛɛ koo ye. A ka masaya te ban abada!

Daniyɛli ka yelifɛn kɔrɔ

¹⁵ «Ne Daniyɛli nii tɔɔrɔla, n ka fɛɛn yeta nunu ye n hakili ɲagami.

¹⁶ Mɔgɔ minw tun b'o yɔrɔ la, ne gwɛrɛla olu kelen na waasa a ka koo nin bɛɛ kɔrɔ yɛrɛyɛrɛ fɔ n ye. A ye ne jaabi. A y'a kɔrɔ fɔ n ye ko:

¹⁷ ‹Sogobaba naani nunu ye masa naani le ye minw bena wili dugukolo kan.

¹⁸ Nga Fɛɛn bɛɛ kuntigi ka jama bena masaya sɔrɔ min tena bɔsi u la abada.›

¹⁹ O kɔ, n tun b'a fɛ ka faamuli kɛ sogo naaninan nin ka koo la, min cogo tun be danna ni tɔw bɛɛ ye. Siranyafɛn tun lo kosɔbɛ. A ɲiiw tun ye nigɛ ye, a sɔnnifaraw tun ye zira ye. N'a ye fɛɛn min sɔrɔ, a b'o faranfaran k'o ɲimi. Min tɔɔ tora, a b'o dɔndɔn a seen kɔrɔ.

²⁰ Gɔɔn tan minw tun b'a kungolo la, n tun b'a fɛ ka faamuli kɛ olu fana la, ani gɔɔn dɔ nin, min nana bɔ fɔɔ saba bɔnna ka bɔ ale ɲa. Ɲadenw tun be min fɛ, ani daa, n'a be kumababaw fɔra. A tun kɛra i n'a fɔ ale ka bon ni tɔw ye.

²¹ N tora k'ale gɔɔn nin filɛ n'a be Ala ka jama kɛlɛra. A sera u kɔrɔ,

²² fɔɔ ka taga se cɛkɔrɔba nin nawaati ma ka na kiti tigɛ. Kiti diyara Fɛɛn bɛɛ kuntigi ka jama na. O tuma na, u ye masaya sɔrɔ.

²³ A y'a fɔ n ye ko: ‹Sogo naaninan nin ye masa dɔ wɛrɛ ye min bena wili dugukolo kan, ale be danna ni tɔw bɛɛ ye. A bena dugukolo bɛɛ minɛ k'a nɔɔni k'a yɛrɛkɛ.

²⁴ Gɔɔn tan nunu ye masa tan ye minw bena bɔ mara nin kɔnɔ. Masa kelen bena wili olu kɔ, ale ni minw kɔnn'a ɲa tena kɛ kelen ye. Ale bena saba ben.

²⁵ Ale bena Fɛɛn bɛɛ kuntigi tɔgɔ cɛn k'a ka jama tɔɔrɔ. A ben'a ŋaniya ka waati jaticogo ni sariya yɛlɛma. Ala ka jama bena to a ka fanga kɔrɔ fɔɔ saan saba ni tilan.

²⁶ O kɔ, kititigɛlaw bena sigi. A ka fanga bena bɔsi a la, a ka koo be nagasi ka ban pewu!

²⁷ Mara minw bɛɛ be dugukolo kan, olu ka masaya, n'u ka fanga, n'u ka boɲa bena di Fɛɛn bɛɛ kuntigi ka jama ma. O jama nin ka masaya bena kɛ waati bɛɛ koo ye. Faamaw bɛɛ bena baara kɛ o ye, ani ka mɛnni kɛ o fɛ.›

²⁸ «O kuma nin danna yan. O miiriya nunu ye ne Daniyɛli hakili ɲagami kojugu fɔɔ n ɲaa cogo yɛlɛmana. Nga ne y'o mara n kɔnɔ.»