Daniyɛli 10 - ALA KA KUMA

Yelifɛn laban

¹ Pɛrɛsi masacɛ Sirusi ka masaya saan sabanan na, kuma dɔ fɔra Daniyɛli ye, u be min wele fana ko Bɛlitasari. Kuma nin tun ye tiɲɛkuma ye. A be gwɛlɛya le koo fɔ. Daniyɛli miirila kuma nin na. A y'a faamu koo yirata seen fɛ.

² Ne Daniyɛli tora dusukasi la lɔgɔkun saba.

³ Ne tun ma dumuni diman si dumu, n tun ma sogo ɲimi, n tun ma duvɛn min, ne ma n yɛrɛ lalaga, fɔɔ lɔgɔkun saba nin tɛmɛna.

⁴ Saan nin kalo fɔlɔ tile mugan ni naaninan loon, ne tun be baji daa la, min ye Tigiri baa ye.

⁵ Ne ye n ɲaa kɔrɔta ka filɛli kɛ, ne ye cɛɛ dɔ lɔnin ye. Faniɲuman b'a kaan na, a ka cɛsirilan ye sanu yɛrɛyɛrɛ ye.

⁶ A fari tun be i n'a fɔ kabakuru sɔngɔgwɛlɛn dɔ, a ɲada tun be manamana i n'a fɔ saan manamanatɔ. A ɲadenw tun be i n'a fɔ tasuma. A bolo n'a seenw tun be manamana i n'a fɔ zira min baarala ka ɲa. A kumakan tun be i n'a fɔ jama mankan.

⁷ Ne Daniyɛli kelen le y'o fɛɛn nin ye. Mɔgɔ minw tun be ni ne ye, olu ɲaa tun t'a la. Nga siranya y'u minɛ fɔɔ u bolila ka dogo.

⁸ Ne kelen tora yen, ka to ka koba nin filɛ. Ne fanga bɛɛ banna. Ne ɲada yɛlɛmana ka fin cogo dɔ la. Barika si tun te ne la tugu.

⁹ Ne y'a kumakan mɛn. Ne y'o mɛn minkɛ, ne kirinna ka ben ka n ɲaa biri duguma.

¹⁰ O tuma na, bolo dɔ magara ne la, ka n minɛ ka ne yɛrɛyɛrɛtɔ wili ka ɲɔgiri n kunbiri ni n tigɛ kan.

¹¹ Cɛɛ y'a fɔ ne ye ko: «I koo diyara Ala ye Daniyɛli. Ne bena kuma min fɔ i ye, i k'o faamu. Wili ka lɔ. Ne cira ele fɛ.» K'a to o kuma na ni ne ye, ne wilila ka lɔ ni ne be yɛrɛyɛrɛla.

¹² A y'a fɔ ne ye ko: «Kana siran Daniyɛli. Ka koo kɔrɔ ɲini k'a lɔn, kabin'i y'o koo ta n'i sɔbɛ ye, ani ka to k'i yɛrɛ majigi e ka Ala ye, i ka kuma ser'a ma. I tun ye kuma min fɔ, ne nana o le kama.

¹³ Pɛrɛsi jamana kɔlɔsibaga murutira ne ma tile mugan ni kelen kɔnɔ. Nga mɛlɛkɛ kuntigibaw kelen nana ne dɛmɛ min ye Misɛli ye, ne tora Pɛrɛsi kuntigiw ɲa.

¹⁴ Ayiwa, e ka siya ka koo bena kɛ cogo min na loon nataw la, ne nana yan waasa k'o yira i la e k'a faamu, bari koo yirata kelen be yen o loonw kama.»

¹⁵ K'a to o kuma na ni ne ye, ne ye n kuun biri duguma ka je.

¹⁶ Nga, dɔ magara ne dagolo la. Ale tun bɔnin be adamaden fɛ. Ne sera ka kuma. Min tun lɔnin be ne ɲafɛ, n y'a fɔ ale ye ko: «Ne matigi, ne ye yelifɛn min ye, o ye n dusu kasi fɔɔ ne fanga bɛɛ banna.

¹⁷ Ne min ye i ka jɔncɛ ye, ne bena se ka mun le fɔ n matigi ɲakɔrɔ? Sabu, barika si te ne la, ne ninakili degunnin lo.»

¹⁸ O kɔ, min tun bɔnin be adamaden fɛ, ale magara ne la tugu, ne ye barika sɔrɔ.

¹⁹ A y'a fɔ ko: «Kana siran, e min koo ka di Ala ye! Ala ka hɛrɛ kɛ i ye. I jaa gwɛlɛya, i jaa gwɛlɛya!» K'a to kuma na ni ne ye, ne ye fanga sɔrɔ. Ne y'a fɔ ko: «Ne matigi, kuma, sabu i ye barika don ne la.»

²⁰ A y'a fɔ ko: «Ne nana i fɛ kuun min na, i b'o lɔn wa? Sisan, ne be segi ka taga Pɛrɛsi jamana kɔlɔsibaga kɛlɛ tugu. N bɔtɔ, Gɛrɛsi jamana kɔlɔsibaga bena na.

²¹ Nga tiɲɛ be sɛbɛ min kɔnɔ, ne bena o kɔnɔnakuma fɔ i ye fɔlɔ. Mɔgɔ si te n dɛmɛ u kɛlɛko la dɛ, fɔɔ aw kɔlɔsibaga Misɛli.»