Damina 6 - ALA KA KUMA

Adamadenw ka juguya

¹ Adamadenw daminɛna ka caya dugukolo kan tuma min na, ani ka denmusow sɔrɔ,

² o tuma na, batofɛnw deenw y'a ye ko mɔgɔw ka denmusow cɛɛ ka ɲi. U tun be minw fɛ, u ye olu furu.

³ Masaba ko: «Ne tena adamaden to nii na ka waatijan kɛ tugu a ka filiw kama, bari mɔgɔ dama lo. U sii tena tɛmɛ saan kɛmɛ ni mugan kan tugu.»

⁴ Tuma min na batofɛnw deenw jɛnna ni mɔgɔw denmusow ye ka deenw sɔrɔ u fɛ, o waati la, mɔgɔjanjanw tun be yen dugukolo kan, ani u tun be yen kɔfɛ fana. Olu tun ye fɔlɔfɔlɔ cɛfariw ye, u tɔgɔw bɔra kosɔbɛ.

⁵ Masaba y'a ye ko mɔgɔw be juguyara ka taga dugukolo kan, k'a ye ko u ka miiriya bɛɛ tun ka jugu tuma bɛɛ,

⁶ o digir'a la, a nimisara mɔgɔw danko la dugukolo kan, a dusu kasira kosɔbɛ.

⁷ O la, a ko: «Ne ye fɛɛn minw dan, ne bena olu halaki k'u ban dugukolo kan, k'a daminɛ mɔgɔ ma ka ta'a bila begɛnw ni fɛɛn fofotaw la, ani kɔnɔw, bari ne nimisara u danko la.»

⁸ Nga Nuhun koo diyara Masaba ye.

Ala b'a latigɛ ka Nuhun kisi

⁹ Nuhun kɔmɔgɔw filɛ nin ye: Nuhun tun ye mɔgɔtilennin ye, a jalakibali tun lo a ka waati mɔgɔw cɛma. A tun be siran Ala ɲa.

¹⁰ Nuhun ye dencɛ saba wolo: Sɛmu ni Kamu ani Zafɛti.

¹¹ Diɲɛ mɔgɔw tun ka jugu Ala ɲakɔrɔ, koo farimanw tun be kɛ diɲɛ yɔrɔ bɛɛ la.

¹² Ala y'a ye ko diɲɛ juguyara, bari adamadenw bɛɛ tun ye siraɲuman bila ka to ka juguya le kɛ dugukolo kan.

¹³ O la, Ala y'a fɔ Nuhun ye ko: «Ne bena adamadenw bɛɛ halaki, bari diɲɛ fanin be u ka fariyakow la. Ne kɔni bena olu ni dugukolo halaki ɲɔgɔn fɛ.

¹⁴ «I ka kurunba dilan i yɛrɛ ye ni sipɛrɛyiri ye, ka bondenninw kɛ a kɔnɔ, ani k'a kɛnɛmala ni kɔnɔna mɔn ni tulu dɔ ye.

¹⁵ A dilancogo filɛ nin ye: a jaɲa ka kɛ mɛtɛrɛ kɛmɛ ni bi duuru ye, a boɲa ka kɛ mɛtɛrɛ mugan ni duuru ye, a jaɲa sanfɛ, o ka kɛ mɛtɛrɛ tan ni duuru ye.

¹⁶ I ka sangabon kɛ kurun nin sanfɛ, mɛtɛrɛ tilan ka sɔrɔ a ni kurun cɛ. I ka daa bɔ kurun faan kelen na, ka kurun kɔnɔna boon kɛ sangaso saba ye.

¹⁷ Ne ben'a kɛ jiba be na dugukolo kan ka diɲɛ kɔnɔ fɛɛnw bɛɛ halaki, fɛɛn minw be ninakili. Dugukolo kan fɛɛnw bɛɛ bena sa.

¹⁸ Nga ne bena bɛn ni ele ye. «E ka don kurun kɔnɔ n'i muso, an'i dencɛw n'i biranmusow ye.

¹⁹ I ka fɛɛn ɲanaman sifaw bɛɛ fila fila minɛ ka don n'u ye kurun kɔnɔ, cɛman ni musoman, janko u ka kisi.

²⁰ Kɔnɔw, ni begɛnw, ani fɛɛn minw bɛɛ be fofo dugukolo kan, u sifaw bɛɛ fila fila bena na i fɛ janko u ka kisi.

²¹ I ka dumunifɛn sifaw bɛɛ dɔ ta k'o mara i fɛ, o ka kɛ e ni olu ka dumuni ye.»

²² Ala ye min fɔ Nuhun ye, a y'o bɛɛ kɛ.