Damina 5 - ALA KA KUMA

Adama kɔmɔgɔw

¹ Sɛbɛ nin be Adama kɔmɔgɔw ka koo yira. Loon min na Ala ye mɔgɔ dan, a y'a dan a yɛrɛ jaa la.

² A ye cɛɛ ni muso dan ka barika don u la, k'u tɔgɔ la ko Mɔgɔ u danwaati la.

³ Adama ye saan kɛmɛ ni bi saba sɔrɔ tuma min na, a ye dencɛ dɔ wɛrɛ sɔrɔ, o tun bɔnin be a fɛ, a tun be i n'a fɔ a yɛrɛ. A y'a tɔgɔ la ko Sɛti.

⁴ Sɛti wolonin kɔ, Adama ye saan kɛmɛ seegi kɛ. A ye dencɛ ni denmuso wɛrɛw sɔrɔ.

⁵ Adama sii bɛɛ lajɛnnin kɛra saan kɛmɛ kɔnɔntɔn ni bi saba ye. O kɔ, a sara.

⁶ Sɛti ye saan kɛmɛ ni duuru sɔrɔ tuma min na, a ye Enɔsi wolo.

⁷ Enɔsi wolonin kɔ, Sɛti ye saan kɛmɛ seegi ni wolonwula kɛ. A ye dencɛ ni denmuso wɛrɛw sɔrɔ fana.

⁸ Sɛti sii bɛɛ lajɛnnin kɛra saan kɛmɛ kɔnɔntɔn ni tan ni fila ye. O kɔ, a sara.

⁹ Enɔsi ye saan bi kɔnɔntɔn sɔrɔ tuma min na, a ye Kenan wolo.

¹⁰ Kenan wolonin kɔ, Enɔsi ye saan kɛmɛ seegi ani tan ni duuru kɛ, a fana ye dencɛ ni denmuso wɛrɛw sɔrɔ.

¹¹ Enɔsi sii bɛɛ lajɛnnin kɛra saan kɛmɛ kɔnɔntɔn ni duuru ye. O kɔ, a sara.

¹² Kenan ye saan bi wolonwula sɔrɔ tuma min na, a ye Maalalɛli wolo.

¹³ Maalalɛli wolonin kɔ, Kenan ye saan kɛmɛ seegi ni bi naani kɛ, a ye dencɛ ni denmuso wɛrɛw sɔrɔ.

¹⁴ Kenan sii bɛɛ lajɛnnin kɛra saan kɛmɛ kɔnɔntɔn ni tan ye. O kɔ, a sara.

¹⁵ Maalalɛli ye saan bi wɔɔrɔ ni duuru sɔrɔ tuma min na, a ye Yerɛdi wolo.

¹⁶ Yerɛdi wolonin kɔ, Maalalɛli ye saan kɛmɛ seegi ni bi saba kɛ, a ye dencɛ ni denmuso wɛrɛw sɔrɔ.

¹⁷ Maalalɛli sii bɛɛ lajɛnnin kɛra saan kɛmɛ seegi ni bi kɔnɔntɔn ni duuru ye. O kɔ, a sara.

¹⁸ Yerɛdi ye saan kɛmɛ ni bi wɔɔrɔ ni fila sɔrɔ tuma min na, a ye Enɔki wolo.

¹⁹ Enɔki wolonin kɔ, Yerɛdi ye saan kɛmɛ seegi kɛ, a ye dencɛ ni denmuso wɛrɛw sɔrɔ.

²⁰ Yerɛdi sii bɛɛ lajɛnnin kɛra saan kɛmɛ kɔnɔntɔn ni bi wɔɔrɔ ni fila ye. O kɔ, a sara.

²¹ Enɔki ye saan bi wɔɔrɔ ni duuru sɔrɔ tuma min na, a ye Matusalɛmu wolo.

²² Matusalɛmu wolonin kɔ, Enɔki tora Alaɲasiran na saan kɛmɛ saba kɔnɔ, a ye dencɛ ni denmuso wɛrɛw sɔrɔ.

²³ Enɔki sii bɛɛ lajɛnnin kɛra saan kɛmɛ saba ani bi wɔɔrɔ ni duuru ye.

²⁴ Enɔki tora o Alaɲasiran na, loon dɔ a ma ye tugu, bari Ala y'a ta.

²⁵ Matusalɛmu ye saan kɛmɛ ni bi seegi ni wolonwula sɔrɔ tuma min na, a ye Lamɛki wolo.

²⁶ Lamɛki wolonin kɔ, Matusalɛmu ye saan kɛmɛ wolonwula ni bi seegi ni fila kɛ, a ye dencɛ ni denmuso wɛrɛw sɔrɔ.

²⁷ Matusalɛmu sii bɛɛ lajɛnnin kɛra saan kɛmɛ kɔnɔntɔn ni bi wɔɔrɔ ni kɔnɔntɔn ye. O kɔ, a sara.

²⁸ Lamɛki ye saan kɛmɛ ni bi seegi ni fila sɔrɔ tuma min na, a ye dencɛ dɔ wolo.

²⁹ A y'a tɔgɔ la ko Nuhun. A ko Masaba ye dugukolo danga, deen nin bena an dusu saalo an ka baara gwɛlɛnw na, ani an ka sɛgɛnw na.

³⁰ Nuhun wolonin kɔ, Lamɛki ye saan kɛmɛ duuru ni bi kɔnɔntɔn ni duuru kɛ, a ye dencɛ ni denmuso wɛrɛw sɔrɔ.

³¹ Lamɛki sii bɛɛ lajɛnnin kɛra saan kɛmɛ wolonwula ni bi wolonwula ni wolonwula ye. O kɔ, a sara.

³² Nuhun ye saan kɛmɛ duuru sɔrɔ, ka sɔrɔ ka Sɛmu ni Kamu ani Zafɛti wolo.