Damina 46 - ALA KA KUMA

Yakuba be taga Ezipiti

¹ Yakuba y'a ka fɛɛn bɛɛ ta ka sira minɛ. A sera dugu dɔ la, o tɔgɔ ko Bɛriseba. Yakuba ye saraka bɔ a faa Isiyaka ka Ala ye o yɔrɔ la.

² O loon sufɛ, Ala y'a yɛrɛ yira a la siko la ko: «Yakuba! Yakuba!» A y'a laminɛ ko naamu.

³ Ala ko: «Ne ye Ala ye, i faa ka Ala. I kana siran ka taga Ezipiti jamana na, bari n bena i kɛ siya dɔ faa ye, min bena caya o yɔrɔ la.

⁴ N b'i bila sira ka taga yen, ne le bena segi ka na n'i ye yan. I bena sa Yusufu le bolo.»

⁵ O kɔ, Yakuba bɔra Bɛriseba. Ezipiti masacɛ tun ye wotoro minw di a ta kama, a deenw y'a ta olu kɔnɔ, ale ni olu ka musow, n'u deenw.

⁶ U tagara n'u ka begɛnw fana ye, ani u bololafɛnw, u ye minw sɔrɔ Kanaan jamana na. Yakuba tagara Ezipiti jamana na ten, n'a ka mɔgɔw bɛɛ ye,

⁷ a deen cɛmanw, n'a mamaden cɛmanw, a deen musomanw n'a mamaden musomanw. A tagara n'u bɛɛ ye Ezipiti.

Yakuba kɔmɔgɔw

⁸ Yakuba n'a ka mɔgɔ minw tagara n'a ye Ezipiti jamana na, olu tɔgɔw filɛ nin ye: a dencɛ fɔlɔ tɔgɔ ko Urubɛn.

⁹ Ale dencɛw tun ye Anɔki, Palu, Ɛsirɔn ani Kaami ye.

¹⁰ Simeyɔn dencɛw tun ye Yemuyɛli, Yamɛn, Owadi, Yakɛn, Sowari, Sayuli, ale ye Kanaan sunguru dencɛ ye.

¹¹ Levi dencɛw tun ye Gɛrisɔn, Keyati ani Merari ye.

¹² Zuda dencɛw tun ye Ɛri, Onan, Sela, Pɛrɛti ani Zera ye. Ɛri ni Onan sara Kanaan jamana na. Pɛrɛti dencɛw tun ye Ɛsirɔn ni Amuli ye.

¹³ Isakari dencɛw tun ye: Tola, Puwa, Yɔbi ani Simirɔn.

¹⁴ Zabulɔn dencɛw tun ye: Sɛrɛdi, Elɔn ani Yaleyɛli.

¹⁵ Leya tun ye deen cɛman nunu le wolo Yakuba ye, ani deen musoman kelen, n'o tɔgɔ ko Dina. O y'a sɔrɔ u tun be Aramu jamana na. Leya deenw n'a mamadenw bɛɛ lajɛnnin tun ye mɔgɔ bi saba ni saba ye.

¹⁶ Gadi dencɛw tun ye: Sifiyɔn, Agi, Suni, Ɛsibɔn, Ɛri, Arɔdi ani Areli.

¹⁷ Asɛri deenw tun ye: Yimuna, Yisiwa, Yisiwi, Beriya an'u dɔgɔmuso Sera. Dencɛ fila tun be Beriya fɛ: Ebɛri ni Malikiyɛli.

¹⁸ Laban tun ye sunguru min di a denmuso Leya ma n'o tɔgɔ ko Zilipa, ale lo ye deen nunu wolo Yakuba ye. U bɛɛ lajɛnnin tun ye mɔgɔ tan ni wɔɔrɔ ye.

¹⁹ Yakuba muso Arasɛli ye deen fila sɔrɔ: Yusufu ni Bɛnzamɛn.

²⁰ Yusufu muso Asenati ye dencɛ fila sɔrɔ Ezipiti jamana na: Manase ni Efarayimu. Asenati tun ye Ɔni dugu murutigi Potifari denmuso ye.

²¹ Bɛnzamɛn dencɛw tun ye: Bɛla, Bɛkɛri, Asibɛli, Gera, Naaman, Eyi, Ɔrɔsi, Mupimu, Upimu, ani Aridi.

²² O deen nunu le bɔra Yakuba ni Arasɛli la, u tun ye mɔgɔ tan ni naani ye.

²³ Dan ye dencɛ kelen le sɔrɔ, o ye Usimu ye.

²⁴ Nɛfutali dencɛw tun ye: Yaseyɛli, Guni, Yesɛri ani Silɛmu ye.

²⁵ Laban tun ye sunguru min di a denmuso Arasɛli ma n'o tɔgɔ ko Bila, ale ye o deen wolonwula nunu wolo Yakuba ye.

²⁶ Yakuba tagara n'a ka mɔgɔ minw ye Ezipiti jamana na, u bɛɛ lajɛnnin tun ye mɔgɔ bi wɔɔrɔ ni wɔɔrɔ ye. A dencɛw musow ma jati.

²⁷ Yusufu ye deen fila minw sɔrɔ Ezipiti jamana na, olu ka fara Yakuba ka mɔgɔ tɔw kan, a nana ni minw ye, u bɛɛ lajɛnnin kɛra mɔgɔ bi wolonwula ye Ezipiti jamana na.

Yakuba be taga sigi Ezipiti

²⁸ Yakuba ye Zuda bila a ɲa ko a ka ta'a fɔ Yusufu ye ko a k'ale kunbɛn Gosɛn mara la. Yakuba n'a ka mɔgɔw sera Gosɛn tuma min na,

²⁹ Yusufu y'a ka wotoro siri ka ta'a facɛ Yakuba kunbɛn. Yusufu y'a facɛ ye dɔrɔn, a bolila ka ta'a minɛ ka kasi fɔɔ ka mɛn.

³⁰ Yakuba y'a fɔ ko: «Aa, sisan kɔni, ne ɲaa lara ele kan, k'a lɔn ko i be sii la. Ala be se k'a ka kalifa minɛ ne la sisan.»

³¹ O kɔ, Yusufu y'a fɔ a balimaw n'a faa ka somɔgɔ tɔw ye ko: «N bena segi ka ta'a fɔ Ezipiti masacɛ ye ko n balimaw ni n faa ka somɔgɔ tɔw nana n fɛ ka bɔ Kanaan jamana na.

³² Ko begɛnmaralaw lo. Ko u nana n'u ka begɛnw n'u ka minanw bɛɛ ye fana.

³³ «O la, ni masacɛ nana aw wele tuma min na k'aw ɲininga, ko aw be mun baara le kɛ,

³⁴ aw k'a fɔ a ye ko aw ye begɛnmaralaw ye kabini aw denmisɛn tuma i n'a fɔ aw faaw. O la, aw bena se ka sigi Gosɛn mara la, bari begɛnmarabaga koo man di Ezipitikaw ye fewu.»