Damina 45 - ALA KA KUMA

Yusufu b'a yɛrɛ yira a balimaw la

¹ O tuma na, Yusufu tun te sera ka koo nin muɲu a laminimɔgɔw ɲana minkɛ, a pɛrɛnna ko: «Aw bɛɛ ka bɔ kɛnɛma!» A y'a yɛrɛ yira a balimaw la tuma min na, mɔgɔ wɛrɛ si tun te yen.

² Yusufu kulera kosɔbɛ fɔɔ mɔgɔ nunu y'a kaan mɛn, o kibaru tagara se Ezipiti masacɛ n'a ka somɔgɔw ma.

³ Yusufu y'a fɔ a balimaw ye ko: «Ne ye Yusufu ye! N facɛ be sii la halibi wa?» Nga a balima nunu ma se k'a jaabi hakiliɲagamikojugu fɛ.

⁴ Yusufu y'a fɔ u ye tugu ko: «Aw ye gwɛrɛ.» U gwɛrɛla. A ko: «Ne y'aw dɔgɔcɛ Yusufu ye, aw tun ye min feere Ezipitikaw ma!

⁵ Aw ye ne feere minkɛ, aw kana aw hakili ɲagami, o fana kana kɛ baasi ye aw fɛ. Bari Ala tun b'a fɛ n b'aw kisi, o kama a ye ne ci yan aw ɲa.

⁶ Ayiwa, kɔngɔ donnin saan fila filɛ nin ye jamana kɔnɔ. K'a sɔrɔ an bena saan duuru kɛ nin kɔ, ni sɛnɛ te kɛ, suman te tigɛ.

⁷ Ala ye ne ci aw ɲa jamana nin kɔnɔ waasa k'aw ka dumuni koo labɛn, min bena kɛ sababu ye aw caaman be kisi.

⁸ Aw ma ne bila ka na yan dɛ, Ala le ye ne bila ka na yan, ka n kɛ Ezipiti masacɛ ladibaga ye, n'a ka soo kɔnɔ koow bɛɛ kuntigi ye, ni Ezipiti jamana bɛɛ ɲamɔgɔ ye.

⁹ «Ayiwa, aw ye teliya ka ta'a fɔ n facɛ ye ko ne Yusufu ko Ala ye ne kɛ Ezipiti jamana bɛɛ kuntigi ye. Ko ne ko a ka teliya ka na to n gɛrɛfɛ.

¹⁰ A bena sigi Gosɛn mara la, ka to ne kɔrɔ, ale n'a deenw, n'a mamadenw n'a ka begɛnw, n'a bololafɛnw bɛɛ.

¹¹ Ne bena n janto a la yen, ale n'a somɔgɔw, n'a ka begɛnw bɛɛ, waasa u kana fɔn foyi la. Bari, an bena saan duuru kɛ kɔngɔ la halibi.

¹² «Ayiwa, aw y'a lɔn ko ne Yusufu yɛrɛ le be kumana aw fɛ ten, ele Bɛnzamɛn yɛrɛ ɲaa b'a la.

¹³ Aw ye fɛɛn minw bɛɛ ye, ani boɲa min be n kan Ezipiti jamana na yan, aw ye taga o bɛɛ lakali n facɛ ye. Aw ye teliya ka taga n facɛ sama ka na.»

Ezipiti masacɛ ko Yakuba ka na Ezipiti

¹⁴ Yusufu n'a dɔgɔnin Bɛnzamɛn girinna ka ɲɔgɔn minɛ ka to ka kasi.

¹⁵ A y'a kɔrɔ nunu bɛɛ fofo ni ɲaji ye. O kɔ, u ye baro kɛ.

¹⁶ Kuma nin ŋunuŋununa fɔɔ ka se masaso la ko Yusufu balimaw nan'a fɛ. O kibaru diyara Ezipiti masacɛ n'a ka ɲamɔgɔw bɛɛ ye.

¹⁷ O la, a y'a fɔ Yusufu ye ko: «A fɔ i balimaw ye k'u ka u ka begɛnw labɛn k'u ka doniw ta ka segi ka taga Kanaan

¹⁸ ka na n'aw facɛ ye ne fɛ, n'aw ka mɔgɔw, waasa ne ka Ezipiti jamana yɔrɔɲuman d'u ma, u ka se ka suman ɲanaman sɔrɔ.

¹⁹ «I b'a fɔ u ye fana k'u ka wotorow ta yan ka taga n'u ye k'u ka musow n'u deenw ani u facɛ ta ka na.

²⁰ U bena fɛɛn minw to u kɔ yen, u kana jɔɔrɔ n'olu ye. Bari Ezipiti yɔrɔ ɲanaman bena kɛ u ta ye.»

²¹ Masacɛ ye min fɔ, Isirayɛli deenw ye o le kɛ. Yusufu ye wotorow d'u ma ka kɛɲɛ ni masacɛ ka kuma ye, ani ka sira kan dumuni d'u ma.

²² A ye faniw di u kelen kelen bɛɛ ma fana. Nga Bɛnzamɛn ta tun ye fani duuru, ni warigwɛ kuru kɛmɛ saba ye.

²³ A ye Ezipiti fɛnɲumanɲumanw la fali tan kan, ka suman ni buru, ni dumunifɛn wɛrɛ la fali musoman tan kan, k'o bɛɛ ci a facɛ ma, o ka kɛ a ka sira kan dumuni ye.

²⁴ Sanni a k'u bila ka taga, a y'u ladi ko: «Aw kana bila ɲɔgɔn na sira kan dɛ!»

²⁵ U bɔra Ezipiti jamana na, ka na se Kanaan jamana na u facɛ Yakuba fɛ.

²⁶ U y'a fɔ a ye ko: «Yusufu be sii la halibi! Ale lo be Ezipiti koow bɛɛ kunna.» Yakuba mɔnna, a ma se ka la u ka kuma na fewu.

²⁷ U ye Yusufu ka kuma fɔnin bɛɛ lakali a ye. Yusufu ye wotoro minw ci a ta kama, a y'u bɛɛ ye, a fari fonina.

²⁸ O tuma na, Yakuba y'a fɔ ko: «Ne deen Yusufu bɛ sii la! Fɔɔ ne ka ta'a ye, n be sɔrɔ ka sa.»