Damina 38 - ALA KA KUMA

Zuda ni Tamari ka koo

¹ O waati la, Zuda wilila ka bɔ a balimaw kɔrɔ ka taga sigi Adulamuka dɔ fɛ, min tɔgɔ ko Ira.

² A ye sunguru dɔ ye yen, min faa tun ye Kanaan ye, a faa tɔgɔ ko Suwa. A y'a furu ka la n'a ye.

³ Muso nin ye kɔnɔ ta ka dencɛ wolo k'a tɔgɔ la ko Ɛri.

⁴ A ye kɔnɔ wɛrɛ ta ka dencɛ wolo tugu k'o tɔgɔ la ko Onan.

⁵ A ye dencɛ dɔ wɛrɛ wolo k'ale tɔgɔ la ko Sela. A ye Sela wolo tuma min na, Zuda tun be Kezibu.

⁶ Zuda ye muso dɔ ɲini a dencɛ fɔlɔ Ɛri ye, o tɔgɔ ko Tamari.

⁷ Ɛri tun ka jugu Masaba ɲakɔrɔ, o la, Masaba y'a faga.

⁸ Zuda y'a fɔ Onan ye ko: «I kɔrɔcɛ muso furu ka kɔmɔgɔ sɔrɔ a ye.»

⁹ Onan y'a lɔn k'o kɔmɔgɔ nin tena kɛ a yɛrɛ ta ye minkɛ, o la, n'a lara n'a kɔrɔcɛ muso nin ye tuma o tuma, a tun be to k'a kɔji bɔn duguma janko a kana deenw sɔrɔ a kɔrɔcɛ ye.

¹⁰ A ye min kɛ, o tun ka jugu Masaba ɲakɔrɔ, o la, a y'ale fana faga.

¹¹ O tuma na, Zuda y'a fɔ a biranmuso Tamari ye ko a ka taga to a faa ka soo, firiya la fɔɔ ale dencɛ Sela ka kɔrɔbaya. A tun be miiri ko Sela fana ka na sa i n'a fɔ a kɔrɔcɛw. Tamari tagara sigi a facɛ ka soo.

¹² Waatijan tɛmɛnin kɔ, Zuda muso, min tun ye Suwa denmuso ye, ale sara. Zuda jigi tugura tuma min na, a tagar'a ka sagaw sii tigɛbagaw fɛ Timuna. A n'a tericɛ Ira ka bɔ Adulamu tagara ɲɔgɔn fɛ.

¹³ U y'a fɔ Tamari ye ko a birancɛ be tagara Timuna k'a ka sagaw sii tigɛ.

¹⁴ Tamari y'a ka firiyafaniw bɔ ka fani biri a kuun na janko mɔgɔ kan'a lɔn. O kɔ, a tagara sigi Enayimu donda la, min be Timuna sira la. Bari a y'a ye ko Sela sera musofuru ma, nga u m'ale d'a ma.

¹⁵ Zuda ye Tamari ye tuma min na, a tun b'a miiri ko kakalamuso lo, bari a ɲaa datugunin tun lo.

¹⁶ A tun m'a lɔn ko a biranmuso lo minkɛ, a faranna ka gwɛrɛ a la sirada la k'a fɔ ko n'a be sɔn, ale be la n'a ye. Muso ko: «I bena mun di ne ma, janko i ka la ni ne ye?»

¹⁷ A ko: «Ne bena baden kelen bɔ n ka begɛnw la k'o ci ma.» Muso ko: «Ayiwa. I bena mun le to ne fɛ yan n'i b'o ci?»

¹⁸ Zuda ko: «Ne ka kan ka mun to i ye?» Muso ko: «I ka taamasiɲɛ lafɛn n'a juru, n'i ka bere min b'i bolo.» Zuda ye olu d'a ma ka la n'a ye, a ye kɔnɔ ta a fɛ.

¹⁹ Muso wilila ka taga fani nin bɔ a ɲada kan k'a ka firiyafaniw don tugu.

²⁰ Zuda y'a tericɛ Adulamuka ci ni baden nin ye, janko a tun ye fɛɛn minw to muso bolo, a k'o minɛ, nga ale ma muso nin ye.

²¹ A y'o yɔrɔ mɔgɔw ɲininga ko: «Kakalamuso min tun be sirada la Enayimu, a be min?» Olu ko: «Kakalamuso si te yan.»

²² O la, a segira ka taga Zuda fɛ k'a fɔ ko: «Ne m'a ye, o yɔrɔ mɔgɔw fana ko kakalamuso si te yen.»

²³ Zuda ko: «Fɛɛn min b'a fɛ, a ka to n'o ye. N'o tɛ, an bena maloya. Ne kɔni ye baden nin ci a ma, nga i m'a sɔrɔ yen.»

²⁴ Kalo saba ɲɔgɔn tɛmɛnin kɔ, u y'a fɔ Zuda ye ko a biranmuso Tamari ye kakalaya kɛ, ka kɔnɔ ta. Zuda ko u k'a minɛ ka bɔ n'a ye dugu kɔfɛ k'a jɛni.

²⁵ U tun be nana n'a ye tuma min na, a ye cii bila a birancɛ ma ko a ye kɔnɔ ta cɛɛ min fɛ, ko minan nunu ye o tigi ta ye. Ko a k'a filɛ nin taamasiɲɛ lafɛn nin n'a juru, ani bere nin ye mɔgɔ min ta ye.

²⁶ Zuda y'a ye ko a yɛrɛ ka minanw lo. A y'a fɔ ko muso nin tilennin be ka tɛmɛ ale kan, bari ale ma sɔn k'a di a dencɛ Sela ma. Zuda ma jɛn n'a ye tugu.

²⁷ Tamari jigira tuma min na, a kɛra filaninw ye.

²⁸ A jigituma na, deen kelen y'a bolo bɔ kɛnɛma. Muso min tun b'a dɛmɛna ka jigi, ale ye jesewulen siri a bolo la k'a fɔ ko: «Nin le kɔnna ka bɔ.»

²⁹ Nga a y'a bolo bɔsi tuma min na, a tɔɲɔgɔn bɔra. Tamari dɛmɛbaga y'a fɔ ko: «I ye bɔyɔrɔ jumɛn le bɔ ten?» U ye deen nin tɔgɔ la ko Pɛrɛti, o kɔrɔ ko woo.

³⁰ O kɔ, a baden bɔra ni jesewulen ye a bolo la, u y'a tɔgɔ la ko Zera.