Damina 37 - ALA KA KUMA

Yusufu ka siko

¹ Yakuba tun sigira Kanaan jamana na, a facɛ tun sigira yen fana.

² Yakuba ka denbaya ka kokɛta filɛ nin ye: Yusufu ye saan tan ni wolonwula sɔrɔ tuma min na, a tun be to ka ta'a facɛ ka sagaw ni baaw dɛndɛ n'a kɔrɔw ye. Yusufu tun ye denmisɛn ye, a tun be to ka taga ni a bamusofitini Bila ni Zilipa ka deenw ye kongo. N'u segira ka na, olu tun be to ka kojugu minw kɛ, a tun be to k'o bɛɛ fɔ u facɛ ye.

³ Yusufu koo tun ka di Yakuba ye ka tɛmɛ deen tɔ nunu kan, bari ale lo tun kɛr'a ka cɛkɔrɔbaya waati deen ye, a tun ye foroca ɲanaman dɔ kalan Yusufu ye.

⁴ A kɔrɔw nan'a ye k'u dɔgɔcɛ koo le ka di u facɛ ye ka tɛmɛ olu kan, u y'a kɔniya, fɔɔ u tun te se ka kumaɲuman fɔ a ye tugu.

⁵ Loon dɔ, Yusufu ye siko dɔ kɛ. A y'o ɲafɔ a kɔrɔw ye minkɛ, dɔ faral'a kɔniyako kan u fɛ.

⁶ A y'a fɔ u ye ko: «Ne ye siko min kɛ, aw y'o mɛn dɛ.

⁷ K'an to foro kɔnɔ n'an be suman tigɛra, k'a siri, ne ye min siri, ale wilila ka lɔ a juu kan, aw bɛɛ taw lɔra k'a lamini k'u kuun biri n ta kɔrɔ.»

⁸ A kɔrɔ nunu y'a fɔ a ye ko: «I b'a fɛ ka kɛ an ka faama ye kɛ, walima anw kuntigi?» U y'a kɔniya kosɔbɛ tugu siko ni kuma nunu kosɔn.

⁹ Yusufu ye siko dɔ wɛrɛ kɛ k'o fɔ a kɔrɔw ye tugu ko: «Ne ye siko dɔ kɛ tugu. Ne ye tile, ni kalo ani lolo tan ni kelen ye, u bɛɛ ye u kunbiri gwan ne ɲakɔrɔ.»

¹⁰ A y'o siko nin fɔ a facɛ ye fana i n'a fɔ a y'a fɔ a kɔrɔw ye cogo min na. A facɛ y'a sɔngɔ ko: «O ye mun siko ye? I be miiri ko ne n'i bamuso n'i kɔrɔw ka kan k'an kunbiri gwan e ɲakɔrɔ wa?»

¹¹ A kɔrɔw y'a kɔniya, nga a facɛ ye o koo bɛɛ to a hakili la.

Yusufu kɔrɔw b'a feere

¹² Waati dɔ, Yusufu kɔrɔw tagara Sisɛmu mara la waasa k'u faa ka begɛnw dɛndɛ yen.

¹³ Yakuba y'a fɔ Yusufu ye ko: «I kɔrɔw ma taga Sisɛmu janko ka saga dɛndɛ o yɔrɔ la wa? Na ne b'i ci u fɛ.» A ko ɔnhɔn.

¹⁴ Yakuba ko: «Taga i kɔrɔw filɛ ni hɛrɛ b'u la, ani begɛnw fana, i be segi ka na u kibaruya fɔ ne ye.» O y'a sɔrɔ u siginin tun be Eburɔn mara la. Yusufu bɔra ka taga Sisɛmu.

¹⁵ A munumununa ka taga bɔ mɔgɔ dɔ kan kongo kɔnɔ, ale y'a ɲininga ko a be mun le ɲinina.

¹⁶ Yusufu y'a jaabi ko: «Ne be ne kɔrɔw le yɔrɔ ɲinina. U be begɛn dɛndɛna yɔrɔ min, i te sabali ka o yɔrɔ fɔ ne ye wa?»

¹⁷ O tigi y'a fɔ a ye ko: «U bɔra yan ka taga, ne tun y'a mɛn u fɛ k'u be taga Dotan.» Yusufu tagar'a kɔrɔw kɔ ka taga u sɔrɔ Dotan.

¹⁸ U y'a natɔ ye yɔrɔjan dɔrɔn, yanni a ka se u fɛ, u bɛnn'a la ko u ben'a faga.

¹⁹ U y'a daminɛ k'a fɔ ɲɔgɔn ye ko: «Sikotigi nin natɔ filɛ.

²⁰ An k'a faga k'a fili kɔlɔnkolon nunu dɔ kɔnɔ, o kɔ an be ta'a fɔ soo ko waraba dɔ y'a minɛ k'a ɲimi, o la, an ben'a ye a ka siko nunu bena kɛ cogo min na.»

²¹ Urubɛn, min ye u bɛɛ kɔrɔ ye, ale ye o mɛn minkɛ, a tun b'a fɛ k'a nii kisi. O la, a ko: «An kan'a faga.

²² An kan'a joli bɔn, an tigɛ kana l'a kan, an k'a minɛ k'a fili kɔlɔnkolon nin kɔnɔ yan kongo la.» Bari a tun b'a fɛ ka segi ka n'a bɔ ka taga n'a ye u faa fɛ, a tun b'a fɛ k'a kisi.

²³ Yusufu ser'a kɔrɔw fɛ tuma min na, u y'a minɛ k'a ka forocaɲuman nin bɔ a kaan na,

²⁴ k'a ta k'a fili kolonkolon nin kɔnɔ. Jii tun te a kɔnɔ.

²⁵ O kɔ, u tagara sigi ko u be dumuni kɛ. U k'u be filɛli kɛ. U ye ɲɔgɔmɛtigi dɔw natɔ ye ka bɔ Galaadi mara la. Isimayɛlidenw tun lo. Yiriji kasadiman sifa dɔw ani fɛɛn wɛrɛ min kasa ka di, o tun doninin be u ka ɲɔgɔmɛw kan n'u be taga n'u ye Ezipiti.

²⁶ Zuda y'a fɔ a balimaw ye ko: «An bena mun tɔnɔ sɔrɔ n'an y'an dɔgɔcɛ faga k'a dogo?

²⁷ An k'a feere Isimayɛliden nunu ma, an kan'a faga, an dɔ lo, an dɔgɔcɛ yɛrɛ lo.» U sɔnna Zuda ka kuma ma.

²⁸ U ye Yusufu bɔ kolonkolon nin kɔnɔ, k'a feere warigwɛ kuru mugan na Isimayɛlidenw ma. Madiyan jagokɛlaw tun lo, olu y'a minɛ ka taga n'a ye Ezipiti.

²⁹ O kɔ, Urubɛn kɔsegira ko a ben'a filɛ kɔlɔn kɔnɔ. A ma Yusufu ye yen, o la, a y'a ka faniw faran,

³⁰ ka segi ka ta'a dɔgɔw fɛ k'a fɔ u ye ko: «Deen nin te yen, ne bena kɛ di?»

³¹ U ye bakɔrɔnin dɔ minɛ k'o faga, ka Yusufu ka fani don o joli la,

³² ka sɔrɔ k'a ci u facɛ ma ko a k'a filɛ yala n'a deen ka foroca nin lo, k'olu y'o le ye.

³³ Yakuba y'a lɔn ko a deen Yusufu ka foroca lo, a kulera, ko: «Ne deen ka foroca lo, waraba y'a minɛ!»

³⁴ A y'a ka faniw faran, ka dusukasifani ta k'o don a kaan na, k'a deen sanga kɛ, a ka dusukasi ma ban joona.

³⁵ A deen cɛmanw ni musomanw bɛɛ nana waasa k'a jigi tugu, a ma sɔn. A y'a fɔ ko: «Ne be sa nin dusukasi nin la ka fara n deen kan.» A tora kasi la a deen kosɔn.

³⁶ Madiyan nunu tagara Yusufu feere Ezipiti, Ezipiti masacɛ kɔlɔsibagaw kuntigi Potifari ma.