Damina 32 - ALA KA KUMA

¹ O dugusagwɛ sɔgɔma joona, Laban y'a denmusow n'a mamadenw fo ka duba kɛ u ye. O kɔ, a segira soo.

Yakuba be cii bila Ezawu ma

² Yakuba fana ye sira minɛ ka taga, Ala ka mɛlɛkɛw y'a kunbɛn.

³ Yakuba y'u ye tuma min na, a ko: «Ee! Nin ye Ala ka kɛlɛdenw sigiyɔrɔ le ye.» O la, a y'o yɔrɔ tɔgɔ la ko Maanayimu.

⁴ Yakuba ye cidenw bila a ɲa ka ta'a kɔrɔcɛ Ezawu fɛ *Seyiri mara la, min ye Edɔmu mara ye.

⁵ A y'a fɔ u ye ko u ka ta'a fɔ ale matigi Ezawu ye ko a ka jɔncɛ Yakuba y'a fɔ ko: «Ne tagara sigi Laban fɛ ka mɛn yen fɔɔ ka se sisan ma.

⁶ Misiw ni faliw ni begɛnmisɛnw, ni jɔncɛw ani jɔnmusow be ne fɛ. Ne be cii nin sama e, ne matigi Ezawu ma janko ne koo ka diya i ye.»

⁷ Cidenw kɔsegira Yakuba fɛ tuma min na, u y'a fɔ ko u ser'a kɔrɔcɛ Ezawu fɛ, ko sisan a be nana k'a kunbɛn ni cɛɛ kɛmɛ naani ye.

⁸ Yakuba siranna kosɔbɛ, a hakili ɲagamina. Mɔgɔ minw tun be n'a ye, a y'u tilan fila, ka begɛnmisɛnw ni misiw fana tilan, ani ɲɔgɔmɛw fana.

⁹ A y'a fɔ a yɛrɛ kɔnɔ ko: «Ni Ezawu nana jɛnkulu kelen kɛlɛ, n'a sɔrɔ jɛnkulu tɔ kelen bena kisi.»

¹⁰ O kɔ, Yakuba ye Ala daali ko: «Ne mamacɛ Ibrayima ka Ala, ne faa Isiyaka ka Ala, Masaba, e y'a fɔ ne ye ko ne ka kɔsegi ka taga n faso la n balimaw fɛ, ko i bena koɲuman kɛ ne ye.

¹¹ I ye koɲuman min bɛɛ kɛ i ka jɔɔn ye ni kantigiya ye, ne man kan n'o si ye fewu. Ne ye Zurudɛn baji tigɛ tuma min na, foyi tun te ne bolo ni bere tɛ. Nga sisan ne kɔsegira ni jɛnkulu fila ye.

¹² Ne b'i daali ko i ka ne kisi ne kɔrɔcɛ Ezawu ma. Ne be siran ko a kana na ne ni n musow n'an deenw faga.

¹³ E y'a fɔ ko i bena koɲuman kɛ ne ye, ka ne kɔmɔgɔw caya i n'a fɔ kɔgɔjida la cɛncɛn, min te se ka jati a caya kosɔn.»

¹⁴ Yakuba sira o yɔrɔ la. A ye dɔ bɔ a ka begɛnw na u bena taga ni minw ye k'u di a kɔrɔcɛ Ezawu ma.

¹⁵ A tun ye baa kɛmɛ fila, ni bakɔrɔnin mugan, ani saga kɛmɛ fila, ni sagajigi mugan,

¹⁶ ani ɲɔgɔmɛmuso bi saba n'u deenw, ani misi bi naani, ni tura tan, ani falimuso mugan ani falicɛ tan bɔ

¹⁷ k'u di a ka jɔɔnw ma, ka begɛnkulu kelen kelen bɛɛ kɛ u danna, k'a fɔ a ka jɔɔnw ye ko u ka bila ale ɲa ka furancɛ to u ni ɲɔgɔn cɛ,

¹⁸ k'a fɔ u ɲamɔgɔ ye ko: «Ni ne kɔrɔcɛ Ezawu y'i kunbɛn k'i ɲininga ko: ‹I ye jɔn ka mɔgɔ ye? I be taga min? Begɛn minw b'i ɲafɛ, o ye jɔn ta ye?›,

¹⁹ i k'a jaabi ko: ‹I ka jɔɔn Yakuba ta lo, a ye o bɔ janko ka tag'a di ne matigi Ezawu ma, a yɛrɛ be nana an kɔ.› »

²⁰ A y'a fɔ mɔgɔ filanan ye ten fana, ani sabanan, ni tɔ nunu bɛɛ ye minw tun be begɛnw kɔfɛ ko: «Ni aw ye Ezawu kunbɛn tuma min na, aw k'o kuma kelen fɔ a ye.

²¹ Aw kana ɲinɛ, aw k'a fɔ ko a ka jɔɔn Yakuba be nana aw kɔ.» Yakuba tun be miiri ko a ben'a kɔrɔcɛ dusu suma ni fɛɛn nunu ye, a be minw cira a ɲa, ko n'a y'a ye kɔfɛ tuma min na, n'a sɔrɔ a ben'a minɛ ka ɲa.

²² A kɛra ten, Yakuba ye fɛɛn minw labɛn k'o di, olu tagar'a ɲa, nga ale yɛrɛ lara n'a ka mɔgɔw ye o sufɛ.

Yakuba be bondori kɛ ni Ala ye

²³ O suu kelen na, Yakuba wilila ko a be taga Yabɔki kɔɔ tigɛ seen na. A tagara n'a muso fila ye, n'a ka jɔnmuso fila, n'a den tan ni kelen ye.

²⁴ A y'a kɛ u ye kɔɔ tigɛ a ɲa, k'a bololafɛnw fana tigɛ.

²⁵ Yakuba tor'a kelen na, a ni cɛɛ dɔ ye bondori kɛ fɔɔ ka dugu gwɛ.

²⁶ Cɛɛ y'a ye ko a te se Yakuba kɔrɔ tuma min na, a y'a bugɔ a tɔgɔn na. A kɛra ten, Yakuba tɔgɔn mugura k'u to bondori la.

²⁷ Cɛɛ y'a fɔ ko: «Ne to n be taga, bari dugu be gwɛra.» Nga Yakuba ko: «N'i ma duba kɛ ne ye, ne tena i bila ka taga.»

²⁸ Cɛɛ y'a ɲininga ko: «I tɔgɔ be di?» A ko Yakuba.

²⁹ Cɛɛ ko: «I tɔgɔ tena kɛ Yakuba ye tugu, u bena to k'i wele Isirayɛli, bari i ye bondori kɛ ni Ala ye, ka bondori kɛ ni mɔgɔw fana ye, i ye see sɔrɔ.»

³⁰ Yakuba y'a ɲininga ko: «Ne b'i daali i k'i tɔgɔ fɔ ne ye.» Cɛɛ y'a jaabi ko: «Mun na i be ne tɔgɔ ɲininga?» O kɔ, a ye duba k'a ye o yɔrɔ la.

³¹ Yakuba y'o yɔrɔ tɔgɔ la ko Penuyɛli, bari a ko: «Ne ɲaa lara Ala yɛrɛ le kan, o bɛɛ n'a ta, ne ma sa.»

³² Tile bɔtuma na, Yakuba ye Penuyɛli kɔɔ tigɛ. Yakuba tun te se ka taama ka tilen tugu a tɔgɔn kelen kosɔn.

³³ O le y'a to fasa min be tɔgɔn na, Isirayɛlidenw t'o dumu halibi, bari Ala ye Yakuba tɔgɔn le gosi a fasa yɔrɔ la.