Damina 28 - ALA KA KUMA

¹ O la, Isiyaka ye Yakuba wele ka duba kɛ a ye, k'a gwɛlɛya a ma ko: «I kana Kanaan sunguru furu fewu.

² Wili ka taga i belencɛ Laban fɛ i bamuso faso la sisan yɛrɛ, Aramu jamana na, k'a denmusow dɔ furu.

³ Setigi Ala ka barika don i la, ka deen caaman d'i ma janko i ka kɛ siya caaman faa ye.

⁴ A ye barika don Ibrayima la cogo min na, a k'o ɲɔgɔn kɛ i ye, n'i kɔmɔgɔw ye janko a ye jamana min di Ibrayima ma i siginin be min kɔnɔ lonanya la, o ka kɛ i ta ye.»

⁵ O kɔ, Isiyaka ye Yakuba bila ka taga. Yakuba tagara Aramu jamana na ka se Aramuka Betuwɛli dencɛ Laban ka soo. Laban tun ye Yakuba ni Ezawu bamuso Erebɛka kɔrɔcɛ ye.

Ezawu be muso wɛrɛ furu

⁶ Ezawu y'a mɛn ko Isiyaka ye duba kɛ Yakuba ye k'a bila ka taga Aramu jamana na ko a ka taga muso furu o yɔrɔ la, ani ko a y'a gwɛlɛya a ma o duba kɛwaati la ko a kana Kanaan sunguru si furu.

⁷ A y'a ye fana ko Yakuba y'a faa n'a baa ka kuma bato ka taga Aramu.

⁸ O tuma na, a y'a faamu ko Kanaan sunguruw koo man di a faa Isiyaka ye haali dɔɔni.

⁹ O la, a tagara Ibrayima dencɛ Isimayɛli fɛ k'a denmuso Maalati furu k'a fara a ka muso dɔ nunu kan. Maalati tun ye Nebayɔti dɔgɔmuso ye.

Yakuba ka siko

¹⁰ Yakuba bɔra Bɛriseba ka Aran sira minɛ.

¹¹ A sera yɔrɔ dɔ la ko a be si yen, bari suu tun kora. A ye kabakuru dɔ ta yen k'a kuun la o kan.

¹² A sikora ka yɛlɛyɛlɛnan dɔ ye min juu tun be dugukolo kan, a kuun tagara sɛmɛ sankolo la. A ye Ala ka mɛlɛkɛw yɛlɛtɔ n'u jigitɔ ye o kan.

¹³ Masaba lɔnin tun be sanfɛ, k'a fɔ ko: «Ne ye Masaba ye, i faa Ibrayima ka Ala ni Isiyaka ka Ala. I lanin be dugukolo min kan, ne ben'a di ele n'i kɔmɔgɔw ma.

¹⁴ I kɔmɔgɔw bena caya i n'a fɔ cɛncɛn, u bena jɛnsɛn ka taga kɔrɔn ni tileben fɛ, ani kɔgɔdugu ni worodugu ɲafan fɛ. Dugukolo kan siyaw bɛɛ bena hɛrɛ sɔrɔ e, n'i kɔmɔgɔw barika la.

¹⁵ Ne bena to i fɛ. Ne bena i tanga i ka taayɔrɔw bɛɛ la, ka kɔsegi ka na n'i ye jamana nin kɔnɔ. Ne ye min fɔ i ye, ne tena i bila ni ne m'o kɛ.»

¹⁶ Yakuba kununna ka bɔ sinɔgɔ la tuma min na, a y'a fɔ a yɛrɛ kɔnɔ ko: «Siga t'a la, Masaba be yan yɔrɔ la, k'a sɔrɔ ne tun m'a lɔn.»

¹⁷ A siranna, a ko: «Yan yɔrɔ ye kabako yɔrɔ ye dɛ! Nin te yɔrɔ wɛrɛ ye ni Ala ka soo tɛ, yan ye sankolo donda le ye.»

¹⁸ O dugusagwɛ sɔgɔma joona, Yakuba tun ye kabakuru min la a kuun kɔrɔ, a y'o ta k'a tutu ka tulu bɔn a kan.

¹⁹ A y'o yɔrɔ tɔgɔ la ko Betɛli, nga o dugu nin tɔgɔ tun ye Luzi ye ka kɔrɔ.

²⁰ Yakuba ye dajuru ta Ala ye ko: «Ala, n'i tora ne fɛ ka ne mara ne ka taama nin na, ka ne balo ka ne fɛɛrɛbɔ

²¹ fɔɔ ka ne ɲuman segi ne faso la, o tuma na, Masaba, e bena kɛ ne ka Ala ye.

²² Ne ye kabakuru min lɔ, o bena kɛ ele Ala ka soo ye. N'i ye fɛɛn o fɛɛn di ne ma, ne bena o bɛɛ jaka d'i ma.»