Damina 24 - ALA KA KUMA

Isiyaka ni Erebɛka ka furuko

¹ Ibrayima tun kɔrɔla kosɔbɛ. Masaba tun y'a dɛmɛ koo bɛɛ la.

² Jɔncɛ min ka kɔrɔ a ka soo kɔnɔ, o min tun b'a ka nafolo bɛɛ kunna, a y'a fɔ ale ye ko: «I bolo don ne woto kɔrɔ.

³ Ne b'a fɛ i ka kali Masaba, Ala tɔgɔ la, min ye sankolo ni dugukolo tigi ye, ko i tena muso ta kanaanw fɛ, ne siginin be minw cɛma, k'a di ne dencɛ ma fewu.

⁴ Nga i bena taga ne faso la ka muso ɲini ne dencɛ Isiyaka ye o yɔrɔ la ne ka somɔgɔw cɛma.»

⁵ A ka jɔncɛ y'a fɔ a ye ko: «Ni muso nin ma sɔn ka na ni ne ye yan yɔrɔ la do? O tuma na, ne ka kan ka kɔsegi n'i dencɛ ye i faso la wa?»

⁶ Ibrayima y'a fɔ a ye ko: «Kana kɔsegi ni ne dencɛ ye o yɔrɔ la fewu!

⁷ Masaba, Sankolotigi Ala min bɔra ni ne ye ne faa ka soo, an ka jamana na, ale kumana ne fɛ k'a daa di ne ma. A ko ale bena jamana nin di ne kɔmɔgɔw ma, ale yɛrɛ ben'a ka mɛlɛkɛ ci i ɲa janko i ka se ka muso sɔrɔ ne dencɛ ye ka bɔ yen.

⁸ Ni muso nin ma sɔn ka na n'i ye, o tuma na, i kuun bɔra. Nga i kana kɔsegi ni ne dencɛ ye o yɔrɔ la fewu.»

⁹ Jɔncɛ y'a bolo don a kuntigi Ibrayima woto kɔrɔ ka kali a ye o la.

¹⁰ Jɔncɛ ye ɲɔgɔmɛ tan minɛ a kuntigi ka ɲɔgɔmɛw la ka wili ka taga. A tagara n'a kuntigi ka bololafɛnw bɛɛ la ɲumaman dɔw ye a bolo, Nawɔri ka dugu la, Mezopotami jamana na.

¹¹ A ye ɲɔgɔmɛw la kɔlɔnda la dugu kɔfɛ. Wulada tun lo, musow ka jitatuma na.

¹² A ko: «Masaba, ne kuntigi Ibrayima ka Ala, ne ka koo ɲanabɔ bii, k'i ka ɲumanya yira ne kuntigi Ibrayima la.

¹³ Ne lɔnin filɛ jii bɔyɔrɔ nin na, dugu musow be bɔra ka na jii ta.

¹⁴ Ni ne y'a fɔ sunguru min ye ko ne b'a daali, a k'a ka jidaga jigi, ne ka jii min, n'a ye ne jaabi ko: ‹A min, n bena jii di i ka ɲɔgɔmɛw ma fana,› a to ale ka kɛ i sagolamuso ye i ka jɔncɛ Isiyaka fɛ. Ne ben'a lɔn o le fɛ fana ko i ye koɲuman kɛ ne kuntigi ye.»

¹⁵ Sanni a ka tila o kuma na, Erebɛka bɔra dugu kɔnɔ n'a ka jidaga ye a gaman kan. Betuwɛli denmuso tun lo. Betuwɛli tun ye Ibrayima dɔgɔcɛ Nawɔri ka deen ye a tun ye min sɔrɔ a muso Milika fɛ.

¹⁶ Erebɛka tun cɛ ka ɲi kosɔbɛ, sunguruɲuman tun lo, a tun te cɛko lɔn fɔlɔ. A tagara jii bɔyɔrɔ la k'a ka daga fa, ka bɔ.

¹⁷ Ibrayima ka jɔncɛ bolila k'a kunbɛn k'a fɔ a ye ko: «Ne b'i daali, i k'i ka daga kɔnɔ jii dɔ di ne ma n k'a min.»

¹⁸ A y'a jaabi ko: «Dɔ min, ne matigi.» A y'a ka daga jigi joona joona k'a minɛ a bolo la, cɛɛ ye jii min.

¹⁹ Cɛɛ ye jii min ka ban tuma min na, sunguru nin ko: «Ne bena jii bɔ k'a di i ka ɲɔgɔmɛw fana ma u k'a min ka fa.»

²⁰ A teliyara k'a ka daga kɔnɔ jii yɛlɛma begɛnw ka kolokolo kɔnɔ ka boli ka taga kɔlɔnda la ka jii bɔ ka n'o di a ka ɲɔgɔmɛw bɛɛ ma.

²¹ Cɛɛ ma foyi fɔ, a lɔra ka to k'a filɛ n'a b'a yɛrɛ ɲininga ko yala Masaba y'ale ka taama diya ten le kɛ?

²² Ɲɔgɔmɛw ye minni kɛ ka ban tuma min na, a ye nunnanigɛ sanulamanw di sunguru nin ma. A gwiliya tun be se garamu duuru ɲɔgɔn ma, ani bololanigɛ sanulaman deen fila, minw be garamu kɛmɛ bɔ.

²³ A ye sunguru nin ɲininga ko: «I ye jɔn denmuso ye? An be se ka siyɔrɔ sɔrɔ i faa ka soo wa?»

²⁴ Sunguru y'a jaabi ko: «Ne ye Betuwɛli denmuso ye, min ye Nawɔri ni Milika dencɛ ye.»

²⁵ A y'a fɔ tugu ko: «Biin ni ɲiminifɛn wɛrɛ be an fɛ caaman, siyɔrɔ fana be yen.»

²⁶ Cɛɛ nin y'a kunbiri gwan duguma ka Masaba bato.

²⁷ A ko: «Masaba, ne kuntigi Ibrayima ka Ala ka tanu. A m'a ka ɲumanya n'a ka kantigiya dabila ne kuntigi faan fɛ halibi. Ne kɔni, Masaba bilara ne ɲa taama na fɔɔ ka se ne kuntigi ka somɔgɔw fɛ.»

²⁸ Sunguru bolila ka ta'a bamuso fɛ k'o koo nunu lakali yen.

²⁹ Kɔrɔcɛ dɔ tun be Erebɛka fɛ, a tɔgɔ ko Laban. Ale bolila ka taga cɛɛ sɛgɛrɛ jii bɔyɔrɔ la.

³⁰ A tun ye nunnanigɛ ni bololanigɛw nunu ye a dɔgɔmuso fɛ. Cɛɛ tun ye min fɔ Erebɛka ye, a y'o fana mɛn Erebɛka fɛ. O la, a sinna ka taga cɛɛ fɛ, ka ta'a lɔnin sɔrɔ ɲɔgɔmɛw gɛrɛfɛ jii bɔyɔrɔ la.

³¹ A y'a fɔ a ye ko: «Na an fɛ, Masaba ka mɔgɔɲuman. Mun na i lɔra kɛnɛma yan? Ne ye soo labɛn i ye ka siyɔrɔ labɛn i ka ɲɔgɔmɛw ye.»

³² Cɛɛ tagara Laban ka soo. Laban ye ɲɔgɔmɛw ka doni jigi ka biin ni ɲiminifɛn wɛrɛ d'u ma, ka senkoji di cɛɛ n'a kɔmɔgɔw ma.

³³ O kɔ, a ye dumuni sigi u kɔrɔ, nga cɛɛ ko: «Ne tena dumuni kɛ ni ne ma n nakun fɔ fɔlɔ.» Laban ko: «A fɔ.»

³⁴ Cɛɛ ko: «Ne ye Ibrayima ka jɔncɛ ye.

³⁵ Masaba ye ne kuntigi ta ɲa kosɔbɛ, a kɛra nafolotigi ye. Masaba ye misiw ni begɛnmisɛnw d'a ma, ani warigwɛ ni sanu, ani jɔncɛw ni jɔnmusow, ani ɲɔgɔmɛw ni faliw.

³⁶ Ne kuntigi muso Sara musokɔrɔbalaman ye dencɛ wolo ne kuntigi ye. Ne kuntigi y'a ka nafolo bɛɛ di deen nin ma.

³⁷ A ye ne wajibiya ka kali ko a siginin be Kanaan minw ka jamana kɔnɔ, ko ne kana muso ɲini a dencɛ ye olu denmusow cɛma.

³⁸ Ko ne ka ta'a faso la ka muso ɲini a dencɛ ye o yɔrɔ la a ka fadenyabolo la.

³⁹ Ne y'a ɲininga ko: ‹Ni muso ma sɔn ka taga ni ne ye do?›

⁴⁰ A ye ne jaabi ko ale tora Masaba min ɲakɔrɔ, ko ale lo ben'a ka mɛlɛkɛ ci ne ɲa, ani ka ne ka taama diya, ko ne ka muso ɲini a dencɛ ye a ka fadenyabolo la a faso la.

⁴¹ Ko ni ne ser'a ka fadenyabolo mɔgɔw fɛ tuma min na, ko ne kalila koo min na, ne kuun bena bɔ o la. Ko n'u ma sɔn k'a di ne ma fana, ko ne kuun bɔr'a la.

⁴² «Bii, ne sera jii bɔyɔrɔ la tuma min na, ne y'a fɔ ko: ‹Masaba, ne kuntigi Ibrayima ka Ala, n'i sɔnna, a to ne ka taama ka diya.

⁴³ Ne lɔnin filɛ jii bɔyɔrɔ la. Ni sunguru min nana jii bɔ, ni ne y'a fɔ a ye ko a k'a ka daga kɔnɔ jii dɔɔni di ne ma,

⁴⁴ n'a y'a fɔ ko ne k'a min, ko a bena jii bɔ k'a di ne ka ɲɔgɔmɛw fana ma, o ka kɛ Masaba, e ka sagolamuso ye ne kuntigi dencɛ fɛ.›

⁴⁵ Sanni ne ka tila o kuma na, Erebɛka bɔra dugu kɔnɔ n'a ka daga ye a gaman kan. A jigira ka taga jii bɔyɔrɔ la ka jii ta. Ne y'a fɔ a ye ko a ka jii dɔ di ne ma, ne k'a min.

⁴⁶ A teliyara k'a ka daga jigi k'a fɔ ko n ka dɔ min, ko a bena dɔ di ne ka ɲɔgɔmɛw fana ma. Ne y'a min, a ye dɔ di ɲɔgɔmɛw fana ma.

⁴⁷ Ne y'a ɲininga ko ale ye jɔn deen ye. A ko ale ye Betuwɛli denmuso ye, Nawɔri ni Milika dencɛ. Ne ye sanu don a nuun na ka dɔ don a bolo la.

⁴⁸ O kɔ, ne ye n kunbiri gwan duguma ka Masaba bato. Ne ye Masaba, ne kuntigi Ibrayima ka Ala tanu, min ye ne bila siraɲuman kan janko ne ka ne kuntigi balima mamaden sɔrɔ a dencɛ ye.

⁴⁹ Ayiwa, ni aw b'a fɛ ka ɲumanya ni kantigiya yira ne kuntigi la, aw k'o fɔ ne ye. N'aw te sɔn, aw k'o fana fɔ ne ye, janko ne ka n taayɔrɔ lɔn.»

⁵⁰ Laban ni Betuwɛli y'a jaabi ko: «Nin koo nin bɔra Masaba le fɛ. An te se k'a fɔ i ye ko an sɔnna, walima ko an ma sɔn.

⁵¹ Erebɛka filɛ i kɔrɔ. A minɛ ka taga n'a ye, a ka kɛ i kuntigi dencɛ muso ye i n'a fɔ Masaba y'a yira cogo min na.»

⁵² Ibrayima ka jɔncɛ ye u ka kuma mɛn tuma min na, a y'a kunbiri gwan duguma Masaba ɲakɔrɔ.

⁵³ O kɔ, a ye masirifɛn sanulaman ni warigwɛlamanw bɔ, ani faniw, k'u di Erebɛka ma, ka boɲafɛn sɔngɔgwɛlɛnw di a kɔrɔcɛ n'a bamuso fana ma.

⁵⁴ O kɔ, jɔncɛ ni mɔgɔ minw tun be n'a ye u sɔrɔla ka dumuni kɛ ka minni kɛ ka si yen. O dugusagwɛ sɔgɔma, u wilila tuma min na, jɔncɛ ko: «Ne be sira daali aw fɛ ka kɔsegi ne kuntigi fɛ.»

⁵⁵ Sunguru kɔrɔcɛ n'a bamuso ko: «I ka sunguru to an fɛ yan fɔlɔ ka tile tan ɲɔgɔn kɛ, o kɔ, a bena taga.»

⁵⁶ A y'u jaabi ko: «Masaba ye ne ka taama diya minkɛ, aw kana ne ka taama segi kɔfɛ tugu. Ne be sira daali ka taga ne kuntigi ka soo.»

⁵⁷ U ko: «An ka sunguru wele k'a ɲininga kɛ.»

⁵⁸ U ye Erebɛka wele k'a ɲininga ko: «I b'a fɛ ka taga ni cɛɛ nin ye wa?» A ko: «Ɔnhɔn.»

⁵⁹ O la, u y'u balimamuso Erebɛka n'a lamɔbaga ani Ibrayima ka jɔncɛ n'a ka mɔgɔw to u tagara.

⁶⁰ U ye duba kɛ Erebɛka ye k'a fɔ a ye ko: «An balimamuso, i ka kɛ mɔgɔ waa caaman bamuso ye. I kɔmɔgɔw k'u juguw ka duguw minɛ ka kɛ u ta ye.»

⁶¹ Erebɛka n'a ka jɔnmusow y'u yɛrɛ labɛn ka taga yɛlɛ u ka ɲɔgɔmɛw kan ka tugu cɛɛ kɔ. A kɛra ten, Ibrayima ka jɔncɛ tagara ni Erebɛka ye.

⁶² O y'a sɔrɔ Isiyaka tun wilila ka bɔ Laayiroyi kɔlɔn gɛrɛfɛ ka sigi Kanaan jamana worodugu ɲafan na.

⁶³ Loon dɔ wulafɛ, a bɔra ka taga munumunu kongo la. A y'a ɲaa kɔrɔta ka filɛli kɛ tuma min na, a ye ɲɔgɔmɛw natɔ ye.

⁶⁴ Erebɛka fana y'a ɲaa kɔrɔta ka Isiyaka ye. A jigira ka bɔ a ka ɲɔgɔmɛ kan

⁶⁵ ka Ibrayima ka jɔncɛ ɲininga ko: «Cɛɛ min be kongo kɔnɔ n'a be nana an kunbɛn, jɔn lo?» Jɔncɛ y'a jaabi ko: «Ne kuntigi lo.» O tuma na, Erebɛka y'a ka fani kɛ k'a kuun biri.

⁶⁶ Jɔncɛ y'a ka koo kɛnin bɛɛ lakali Isiyaka ye.

⁶⁷ Isiyaka tagara ni Erebɛka ye a bamuso Sara ka fanibugu kɔnɔ, a y'a furu. Erebɛka koo tun ka d'a ye. Isiyaka dusu saalona a bamuso saya kɔ.