Damina 17 - ALA KA KUMA

Abramu tɔgɔ be yɛlɛma

¹ Abramu saan bi kɔnɔntɔn ni kɔnɔntɔnnan na, Masaba y'a yɛrɛ yira a la k'a fɔ a ye ko: «Ne le ye Setigi Ala ye. I ka taama ne ɲakɔrɔ cogoɲuman na.

² Ne bena bɛɛn n'i ye, k'i kɔmɔgɔw caya kosɔbɛ.»

³ Abramu y'a kunbiri gwan k'a ɲaa biri duguma. Ala y'a fɔ a ye ko:

⁴ «Ne be layidu min ta i ye, o filɛ. I bena kɛ siya caaman faa ye.

⁵ I tena wele Abramu tugu, i bena wele ko Ibrayima, bari ne y'i kɛ siya caaman faa ye.

⁶ Ne bena deen caaman d'i ma, siyaw bena bɔ i la, masacɛw fana bena bɔ i la.

⁷ Ne bena bɛn n'i ye, an'i kɔmɔgɔw. O bɛɛn tena cɛn abada, ne be kɛ i ka Ala ye, n'i kɔmɔgɔw ta.

⁸ I nana sigi Kanaan jamana min kɔnɔ, ne bena o bɛɛ di e, n'i kɔmɔgɔw ma, a ka kɛ aw ta ye kudayi. Ne bena kɛ u ka Ala ye.»

Kɛnɛkɛnɛko daminɛ

⁹ Ala y'a fɔ Ibrayima ye ko: «E kɔni, e ka to bɛɛn la ni ne ye, n'i kɔmɔgɔw fana, waati bɛɛ kɔnɔ.

¹⁰ E n'i kɔmɔgɔw, ka bɛɛn ni ne ye, o taamasiɲɛ filɛ nin ye: cɛɛw bɛɛ ka kɛnɛkɛnɛ aw ka soo.

¹¹ Aw bena kɛnɛkɛnɛ, o ka kɛ an ka bɛɛn taamasiɲɛ ye.

¹² Aw bena aw ka dencɛw bɛɛ kɛnɛkɛnɛ u wolonin tile seeginan loon, o ka kɛ i kɔmɔgɔw bɛɛ ka tile la. Deen cɛman min mana wolo aw ka soo, o ka kan ka kɛnɛkɛnɛ, hali ni jɔɔn ka deen lo n'i y'a san siya wɛrɛw fɛ.

¹³ Minw wolola aw ka soo, ani aw ye minw san, olu ka kɛnɛkɛnɛ. Ne ka bɛɛn tena cɛn ka ye, a taamasiɲɛ ka kan ka kɛ aw fari la.

¹⁴ Ni cɛɛ o cɛɛ ma kɛnɛkɛnɛ, o bena gwɛn ka bɔ aw ka mɔgɔw cɛma, bari ne ka bɛɛn cɛnbaga lo.»

¹⁵ Ala y'a fɔ Ibrayima ye tugu ko: «I muso Sarayi kɔni, ale tena wele Sarayi tugu, a bena wele Sara.

¹⁶ Ne bena barika don a la, i bena dencɛ sɔrɔ n'a ye. Ne bena barika don a la janko a ka kɛ siya caaman bamuso ye. Siyaw ka masacɛ dɔw bena bɔ a la.»

¹⁷ Ibrayima y'a kunbiri gwan k'a ɲaa biri duguma, ka yɛlɛ k'a fɔ a yɛrɛ kɔnɔ ko: «Cɛɛ min ye saan kɛmɛ sɔrɔ, o be deen sɔrɔ wa? Sara saan bi kɔnɔntɔn be se ka deen wolo tugu wa?»

¹⁸ Ibrayima y'a fɔ Ala ye ko: «Ne b'i daali, Isimayɛli ka balo i ɲakɔrɔ dɔrɔn!»

¹⁹ Ala ko: «Kana siga, i muso Sara bena dencɛ wolo i ye, i ben'a tɔgɔ la ko Isiyaka. Ne bena bɛɛn n'a ye, bɛɛn lo min te cɛn abada fɔɔ ka ta'a bila a kɔmɔgɔw ma.

²⁰ Ne y'i ka daalili mɛn Isimayɛli faan fɛ. Ne kɔni ben'ale ta ɲa, k'a sɔn deenw na k'a kɔmɔgɔw caya kosɔbɛ. A bena kɛ kuntigi tan ni fila facɛ ye, ne ben'a kɛ siya faa ye, min bena caya.

²¹ Nga ne bena bɛn ni Isiyaka le ye, Sara bena min wolo i ye saan wɛrɛ, nin waati ɲɔgɔn na.»

²² Ala tilara kuma na Ibrayima fɛ tuma min na, a yɛlɛla ka taga ka Ibrayima to yen.

²³ O loon kelen na, Ibrayima y'a dencɛ Isimayɛli kɛnɛkɛnɛ, ni jɔncɛ minw bɛɛ wolol'a ka soo, ani a ye minw bɛɛ san. Cɛɛ minw bɛɛ tun be a ka soo, a y'olu bɛɛ kɛnɛkɛnɛ i n'a fɔ Ala y'a fɔ a ye cogo min na.

²⁴ Ibrayima kɛnɛkɛnɛna a saan bi kɔnɔntɔn ni kɔnɔntɔnnan na.

²⁵ A dencɛ Isimayɛli kɛnɛkɛnɛna a saan tan ni sabanan na.

²⁶ Ibrayima n'a dencɛ Isimayɛli kɛnɛkɛnɛna loon kelen.

²⁷ Cɛɛ minw wolola Ibrayima ka soo, ani a ye minw san siya wɛrɛ fɛ, a ka soo cɛɛw bɛɛ, n'ale fana kɛnɛkɛnɛna ɲɔgɔn fɛ.