Damina 1 - ALA KA KUMA

Diɲɛ danko

¹ Ala y'a ka danni daminɛ tuma min na, a kɔnna ka sankolo ni dugukolo le dan.

² Dugukolo labɛnnin tun tɛ, a lakolon tun lo. Yɔrɔ bɛɛ tun ye jii ye, min ka dun, ni dibi b'a sanfɛ. Ala Nii tun be munumunu jii sanfɛ.

³ Ala ko: «Yeelen ka bɔ.» Yeelen bɔra.

⁴ Ala y'a ye ko yeelen ka ɲi. A ye yeelen ni dibi faran ka bɔ ɲɔgɔn na.

⁵ Ala ye yeelen tɔgɔ la ko tile, ka dibi wele ko suu. Suu kora, dugu gwɛra. O kɛra loon fɔlɔ ye.

⁶ Ala ko: «Jii ka faran ka bɔ ɲɔgɔn na, furancɛ ka kɛ u la.»

⁷ A kɛra ten, Ala y'a kɛ furancɛ bɔra sanfɛ jii ni duguma jii cɛ.

⁸ Ala ye o furancɛ tɔgɔ la ko sankolo. Suu kora, dugu gwɛra. O kɛra loon filanan ye.

⁹ Ala ko: «Duguma jiiw ka lajɛn yɔrɔ kelen na, yɔrɔ janin ka bɔ.» A kɛra ten.

¹⁰ A ye yɔrɔ janin tɔgɔ la ko dugukolo, ka jii lajɛnnin tɔgɔ la ko kɔgɔji. Ala y'a ye k'o ka ɲi.

¹¹ Ala ko: «Dugukolo ka biin bɔ ka kisɛ kɛ ani yiri minw be den, o sifa bɛɛ ka falen.» A kɛra ten.

¹² Biin sifa bɛɛ falenna, kisɛ be minw na, ani yiri minw be den, o sifa bɛɛ, ka kɛɲɛ n'u cogo ye. Ala y'a ye k'o ka ɲi.

¹³ Suu kora, dugu gwɛra. O kɛra loon sabanan ye.

¹⁴ Ala ko: «Yeelenbɔfɛnw ka kɛ sankolo la ka tile ni suu bɔ ɲɔgɔn na. U ka kɛ taamasiɲɛw ye ka ɲanagwɛw ni tilew ani saanw cogo yira.

¹⁵ U ka kɛ yeelenbɔfɛnw ye sankolo la ka yeelen bɔ dugukolo kan.» A kɛra ten.

¹⁶ Ala ye yeelenbɔfɛn belebele fila dan, u la belebeleba be yeelen bɔ tilefɛ, fitini be yeelen bɔ sufɛ. A ye lolow fana dan.

¹⁷ A ye yeelenbɔfɛn nunu bila sankolo la, u ka yeelen bɔ dugukolo kan,

¹⁸ k'a bɔ tilefɛ ani sufɛ, ani ka yeelen ni dibi bɔ ɲɔgɔn na. Ala y'a ye k'o ka ɲi.

¹⁹ Suu kora, dugu gwɛra. O kɛra loon naaninan ye.

²⁰ Ala ko: «Nimanfɛn ka kɛ jii kɔnɔ caaman yɔrɔ bɛɛ, ani kɔnɔw ka to ka van sanfɛ.»

²¹ Ala ye jii kɔnɔ fɛnbabaw dan caaman, ani fɛɛn ɲanaman sifaw bɛɛ minw be yaala jii kɔnɔ. A ye kɔnɔ sifaw bɛɛ dan fana. Ala y'a ye k'o ka ɲi.

²² Ala ye barika don u la k'a fɔ u ye ko u ka deenw wolo ka caya ka kɔgɔji fa, kɔnɔw fana ka caya dugukolo kan.

²³ Suu kora, dugu gwɛra. O kɛra loon duurunan ye.

²⁴ Ala ko: «Dugukolo ka fɛɛn ɲanaman sifaw bɛɛ bɔ: begɛnw, fɛɛn minw be fofo, ani kongosogo sifaw bɛɛ.» A kɛra ten.

²⁵ Ala ye kongosogo sifaw bɛɛ dan, ni begɛn sifaw bɛɛ, ani fɛɛn minw be fofo dugukolo kan, olu sifaw bɛɛ. Ala y'a ye k'o ka ɲi.

²⁶ Ala ko: «An ka mɔgɔ dan an yɛrɛ jaa la, a ka kɛ i n'a fɔ an yɛrɛ. A ka kɛ jigɛw, ni kɔnɔw, ni begɛnw, ni dugukolo kan fɛɛn bɛɛ kunna, ani fɛɛn minw bɛɛ be fofo dugukolo kan.»

²⁷ Ala ye mɔgɔ dan a yɛrɛ jaa la, a y'a dan k'a kɛ i n'a fɔ ale yɛrɛ. A ye cɛɛ ni muso dan.

²⁸ Ala ye barika don u la k'a fɔ u ye ko: «Aw ka deenw wolo ka caya ka dugukolo fa k'a kolo. Aw ka kɛ jigɛw, ni kɔnɔw, ni fɛɛn ɲanamanw bɛɛ kunna, minw be yaala dugukolo kan.»

²⁹ Ala ko: «Ne be dugukolo kan biin bɛɛ di aw ma, ni yiri dentaw bɛɛ, kisɛ be minw deen kɔnɔ, aw k'o kɛ aw ka dumuni ye,

³⁰ Dugukolo kan seen naani fɛɛnw bɛɛ ni kɔnɔw bɛɛ ani fɛɛn minw bɛɛ be fofo dugukolo kan, ninakili be fɛɛn o fɛɛn na, ne be biin di olu ma u ka kɛ u ka dumuni ye.» A kɛra ten.

³¹ Ala ye fɛɛn minw bɛɛ dan, a y'a ye k'o ɲɛna kosɔbɛ. Suu kora, dugu gwɛra. O kɛra loon wɔɔrɔnan ye.