Kɔlɔsikaw 3 - ALA KA KUMA

¹ N'aw ni Krista korila ka kunun ɲɔgɔn fɛ, fɛɛn minw be sɔrɔ arijana na, aw ka olu le ɲini, Krista siginin be yɔrɔ min na Ala kinibolo fɛ.

² Aw ka arijana kɔnɔfɛnw koo miiri, aw kana miiri diɲɛ kɔnɔfɛnw na,

³ bari a kɛra i n'a fɔ aw sara diɲɛ faan fɛ, aw nii be ni Krista ye Ala fɛ.

⁴ Krista min kɛra aw ka nii ye, n'ale y'a yɛrɛ yira tuma min na, aw fana bena ye o tuma na ni nɔɔrɔ ye.

Jogokɔrɔ ni jogokura

⁵ Koo minw ye dugukolo kan koow ye, aw ka olu bɛɛ dabila, i n'a fɔ kakalaya, ni mɔgɔkolonya, ani miirijugu, ni kojugu nigɛ, ani wasabaliya, min ni josɔn bɛɛ ye kelen ye.

⁶ O koo nunu ɲɔgɔn le kosɔn, Ala be dimi mɔgɔmurutininw kɔrɔ.

⁷ Tuma min na aw tun be to ka hakɛw kɛ, aw tun be o ɲɔgɔnw le kɛ.

⁸ Nga sisan aw ka nin koow bɛɛ dabila, o ye dimi, dusubɔ, juguya, ni mɔgɔ tɔgɔcɛn, ani malobaliya kuma ye minw bɛɛ be se ka bɔ aw daa la.

⁹ Aw kana galon tigɛ ɲɔgɔn ye tugu, bari, aw ye aw jogokɔrɔ bɛɛ dabila ka ban,

¹⁰ ka jogokura ta, min be sabati tuma bɛɛ Ala ka lɔnniya barika la, ka kɛ i n'a fɔ aw danbaga.

¹¹ O la, danfara te siya wɛrɛ ni zuwifu cɛ, kɛnɛkɛnɛninw ni kɛnɛkɛnɛbaliw cɛ, lonanw ni siyajuguw cɛ, jɔɔnw ni hɔrɔnw cɛ. Krista ye fɛɛn bɛɛ ye, a be bɛɛ la.

¹² Ala ye aw woloma k'aw kɛ a ka mɔgɔw ye ani aw koo ka d'a ye kosɔbɛ. O la, aw ka kɛ mɔgɔɲumanw ye, minw be makari. Aw k'aw yɛrɛ majigi, ka kɛ mɔgɔsabalininw ye, minw be muɲuli kɛ.

¹³ N'a sɔrɔla ko dɔ ye koo dɔ kɛ min ma bɛn a tɔɲɔgɔn ma, aw ka yafa ɲɔgɔn ma tuma bɛɛ ka ɲɔgɔn dɛmɛdɛmɛ. Krista yafara aw ma cogo min na, aw fana ka yafa ɲɔgɔn ma ten.

¹⁴ Koo bɛɛ la, kanuya ka sɔrɔ aw kɔnɔ, ale sababu la, aw bena se ka ɲɔgɔn minɛ kosɔbɛ.

¹⁵ Krista ka hɛrɛ ka kɛ n'aw ye, aw welela min kama ka kɛ farisogo kelen ye, ani aw ka kɛ ɲumanlɔnbagaw ye.

¹⁶ Krista ka kuma ka se ka sigi aw kɔnɔ kosɔbɛ. Aw ka ɲɔgɔn kalan ani ka ɲɔgɔn ladi ni hakilitigiya bɛɛ ye. Aw ka Ala tanu ka barika la a ye ni dɔnkiliw ye minw be sɔrɔ Ala ka kuma kɔnɔ, ani dɔnkili wɛrɛw, ni dɔnkili minw be sɔrɔ Nii Senuman barika la.

¹⁷ N'aw be fɛɛn o fɛɛn kɛ, walima ka fɛɛn o fɛɛn fɔ, aw k'o bɛɛ kɛ Matigi Yezu tɔgɔ la, ka barika la an Faa Ala ye.

Pɔli ka ladili, denbaya ka koo la

¹⁸ Musow, aw k'aw yɛrɛ majigi aw cɛɛw ye i n'a fɔ a bɛnnin be Matigi ka mɔgɔw fɛ cogo min na.

¹⁹ Cɛɛw, aw k'aw ka musow kanu, aw kana fariya u ma.

²⁰ Denmisɛnw, koo bɛɛ la aw k'aw wolobagaw boɲa, bari o le ka di Matigi ye.

²¹ Wolobagaw, aw fana kana aw deenw degun kojugu fɔɔ u be dimi, waasa o jigi kana tigɛ.

Jɔɔnw n'u kuntigiw ka koo

²² Jɔɔnw, aw ka mɛnni kɛ aw kuntigiw fɛ koo bɛɛ la ka kɛɲɛ ni adamadenya ye, aw kana baara kɛ aw kuntigiw ɲana dɔrɔn janko k'aw koo diya u ye, nga o ka kɛ ni dusu gwɛnin ye Matigi ɲasiran kosɔn.

²³ Aw be baara o baara kɛ, aw k'o kɛ ni dusuɲuman ye, i n'a fɔ Matigi ka baara lo, aw kan'a kɛ i n'a fɔ mɔgɔ ta lo.

²⁴ Aw ka l'a la ko aw bena niyɔrɔ sɔrɔ Matigi fɛ min ye aw ka sara ye. Aw ka Matigi, o ye Krista ye, aw be baara kɛra ale lo ye.

²⁵ Ni mɔgɔ min ye baarajugu kɛ, o tigi bena o sara le sɔrɔ, Ala te mɔgɔ woloma ka bɔ mɔgɔ la.