Ayuba 6 - ALA KA KUMA

Zɔbu be Elifazi jaabi

¹ Zɔbu y'a jaabi ko:

² «Huun! Ni ne ka tɔɔrɔ tun be se ka suma kɔni! Ni ne ka sigɛn jati tun be se ka minɛ kɔni!

³ O tun bena gwiliya ka tɛmɛ kɔgɔji dala cɛncɛn kan, o le kosɔn, n be kuma ɲagaminin fɔra.

⁴ Setigi ka biɲɛw ye ne sɔgɔ, a baga donna ne la. Ala ka siranyakow lajɛnna ne kama.

⁵ Kongofali be biin to a ɲakɔrɔ, ka to ka kasi wa? Misi b'a ka ɲiminifɛn to a kɔrɔ ka to ka kasi wa?

⁶ Fɛɛn min man timi, o be se ka dumu ni kɔgɔ ma kɛ a la wa? Faan yɔrɔ gwɛman ka timi wa?

⁷ Ne b'o fɔɔnɔ, dumuni ɲuguta lo.

⁸ Ne b'a fɛ n ka daalili be jaabi, n be fɛɛn min laɲini, Ala k'o di n ma.

⁹ A ka ne halaki, a k'a bolo bɔ ka ne tɔɔ laban sa.

¹⁰ Ne dusu tun bena saalo, ne tun bena panpan nisɔndiya la ka n to sɛgɛnjugu kɔnɔ k'a lɔn ko ne tun ma ɲinɛ Ala ka fɔta si kɔ.

¹¹ See te n ye tugu k'a fɔ ko n be kɔnɔni kɛ. Ni ne tora nii la, ne bena mun le sɔrɔ?

¹² O tuma na, ne fanga ye farakuru ta ye wa? Ne fari ye zira le ye wa?

¹³ Dɛmɛbaga te n na, bɔyɔrɔ si te ne fɛ tugu.

¹⁴ Mɔgɔ min be tɔɔrɔ la, o tigi mako b'a teri ka makari la. N'o tɛ, a bena Setigi ɲasiranko dabila.

¹⁵ Ne teriw ye janfamɔgɔw ye i ko kɔɔ, u be tigɛ i ko kɔɔ minw jii tigɛra.

¹⁶ Jii siminin be karikari k'u fa, *sanji siminin b'a la ka yeelen u sanfɛ.

¹⁷ Tilemana mana se, u be ja, yɔrɔ mana gwan, u be ja yɔrɔnin kelen.

¹⁸ Ɲɔgɔmɛtigiw b'u ka sira bila, u be taga kongokolon kɔnɔ ka tunu yen.

¹⁹ Tema ɲɔgɔmɛtigiw be jii yaalala, Saba taw jigi be jii kan.

²⁰ U y'u jigi l'a kan minkɛ, u maloyara, u kuun surunna u setuma na.

²¹ Aw kɛra o ɲɔgɔn le ye sisan, aw ye ne ka sɛgɛn ye dɔrɔn ka siran.

²² Ne y'a fɔ ko aw ka fɛɛn dɔ di ne ma wa? Ko aw ka boɲafɛnw bɔ aw ka nafolo la k'o di ne ma wa?

²³ Janko ka kɛ sababu ye n ka kisi juguman ma wa? N ka bɔsi mɔgɔ farimanw bolo wa?

²⁴ Aw ka ne kalan, o la, ne tena foyi fɔ tugu. Aw ka ne filiyɔrɔ ɲafɔ ne ye kɛ.

²⁵ Tiɲɛkuma be digi mɔgɔ la. Aw ka jalaki nunu be mun le ɲa?

²⁶ Aw be miiri ko ne be kumafu le fɔra wa? N'o lo, mun na aw b'aw daa don ne ka jigitigɛkuma na?

²⁷ Aw be sɔn ka falatɔ feere wa? Aw be sɔn k'aw teri feere.

²⁸ Aw ka ne filɛ ka ɲa, yala ne be galon le tigɛr'aw ye wa?

²⁹ Aw k'a filɛ sa, namarakuma tɛ, halibi, aw k'a filɛ, ne ka tiɲɛ le be sɔsɔra.

³⁰ Tilenbaliyakuma te ne daa la, ne ma kumajugu fɔ.