Ayuba 40 - ALA KA KUMA

¹ Masaba y'a fɔ Zɔbu ye tugu ko:

² «Tigi min be sɔsɔli kɛra ni ne Setigi ye, a tigi ka kan k'o kɛ wa? Mɔgɔ min be ne Ala jalakira, a tigi ka ne jaabi.»

³ Zɔbu ye Masaba jaabi ko:

⁴ «Ne te foyi ye ni n bena i jaabi, ne bena je.

⁵ Ne kɔni tun kumana siɲɛ caaman, nga ne tena foyi fɔ tugu. Sɔbɛ la, foyi tena bɔ ne daa la tugu.»

⁶ Ka Masaba to fɔɲɔba cɛma, a ye Zɔbu jaabi ko:

⁷ «I cɛɛ siri, kɛ cɛɛ ye, ne bena i ɲininga, e ka dɔ fɔ ne ye.

⁸ E b'a fɛ ka siga don ne ka kiti la wa? E b'a fɛ ka ne jalaki ka tiɲɛ d'i yɛrɛ ma wa?

⁹ Fanga b'i fɛ min be ne Ala ta bɔ wa? E kaan boɲa be ne ta bɔ wa?

¹⁰ N'a be ten, e ka nɔɔrɔ ni boɲa la e yɛrɛ kan, e masiri ka dawula la i yɛrɛ kan.

¹¹ A to e ka dimi ka se mɔgɔw ma, a kɛ yɛrɛboɲabagaw ka majigi i ka filɛli dama fɛ.

¹² A kɛ u k'u yɛrɛ majigi tɛtɛtɛ. A kɛ mɔgɔjuguw be halaki.

¹³ A kɛ u b'u don dugukolo kɔnɔ. A kɛ u b'u datugu lahara.

¹⁴ O la, ne bena i tanu, ko i ka barika ye setigiya d'i ma.

¹⁵ E ka mali filɛ kɛ. Ne ye min dan, i ko ele. A be biin le ɲimi i ko misi.

¹⁶ A ka fanga b'a soron na, a seko be sɔrɔ a disi la.

¹⁷ A kuu ka gwɛlɛ i ko sɛdiriyiri. A woto fasaw ka kɛnɛ.

¹⁸ A kolow kɔni ye zira le ye sa. A galagakolow be i ko nigɛ.

¹⁹ Ale lo ye n ka danfɛnw bɛɛ la fɔlɔ ye. Ne min y'a dan, ne dama be se ka gwɛrɛ a la ni murujan ye.

²⁰ A ka dumuni be sɔrɔ kuluw kan, kongosogow be yaala yɔrɔ min na.

²¹ Nga, a be taga la kɔku kɔrɔ, a b'a yɛrɛ dogo buruku kɔnɔ jii la.

²² Kɔku suma b'a sutara, jidala yirimisɛnw b'a lamini.

²³ Baji fanga cayara wo, a mako. Hali ni jii wilila ka se a dakala ma, ale kɔni ka foyi t'o la.

²⁴ K'a ɲaa yɛlɛnin to, jɔn be se k'a minɛ jaan kɔnɔ k'a nuun sɔgɔ?

²⁵ E be se ka sogojugu Leviyatan minɛ ni dulen ye wa? E ka dulen be se k'a minɛ a nɛɛn na wa?

²⁶ E bena nɔnfɔnjuru le don a nuun na wa? E ben'a dakala sɔgɔ ni nigɛ ye wa?

²⁷ E be miiri ko a bena i daali tigitigi wa? Walima ko a bena kuma diman fɔ i ye wa?

²⁸ E ka miiri la, ko a bena sɔn ka bɛn n'i ye wa? A bena sɔn ka kɛ e ka jɔɔn ye wa?

²⁹ E bena sɔn ka tolon kɛ n'a ye i ko kɔnɔnin wa? E bena sɔn k'a siri e denmusow ka tolon kɛ n'a ye wa?

³⁰ Bosocɛ be sɔn k'a feere wa? A be sɔn k'a tilan sannikɛbagaw cɛ wa?

³¹ E bena se k'a golo sɔgɔ n'i ka biɲɛ ye wa? E bena se k'a kungolo sɔgɔ n'i ka taman ye wa?

³² E bolo ka se a ma k'a filɛ, ko e b'a kɛlɛ, i tena o ɲɔgɔn kɛ tugu.