Ayuba 4 - ALA KA KUMA

Elifazi be kuma Zɔbu fɛ

¹ Elifazi ka bɔ Teman, ye kuma ta k'a fɔ ko:

² «Ni mɔgɔ ko a be dɔ fɔ i ye sa, o bena i sɛgɛn, nga daa te se ka tugu o kan fana.

³ I ye mɔgɔ caaman kalan, ka sigɛnbagatɔw dɛmɛ u ye barika sɔrɔ.

⁴ Mɔgɔ minw tun benna, olu wilila i ka ladili barika la, i ye sigɛnbagatɔw dɛmɛ ka bɔ u ka sɛgɛn na.

⁵ Sisan, o koo sera ele yɛrɛ ma, i hakili be wili, o ɲɔgɔn y'i sɔrɔ, o kɛra jatigɛ ye i ma.

⁶ E ka Alaɲasiran nin ma i dɛmɛ wa? E jigi ma kɛ e ka mɔgɔɲumanya ye wa?

⁷ Miiri, i ye mɔgɔ jalakibali dɔ ye a halakira wa? Walima i ye mɔgɔtilennin tununin mɛn ka ye wa?

⁸ Ne y'a ye ko mɔgɔ minw be kotilenbali kɛ, minw be kojugu la, olu b'o tɔnɔ sɔrɔ.

⁹ Ala dalafɔɲɔ b'u halaki, a ka dimi b'u jɛni.

¹⁰ Jara ŋunankan be ban, jaraden ɲiiw be kari.

¹¹ Wara be sa sogotanya la, jaradenw be jɛnsɛn.

¹² Dogodogoninkuma dɔ donna ne tulo la, a ŋunuŋunukan le donna n tulo la.

¹³ Sikotuma na sufɛ, miiri caaman be tɛmɛ mɔgɔ kuun na waati min na, mɔgɔ ka sinɔgɔ diyawaati la,

¹⁴ o waati la, ne siranna ka yɛrɛyɛrɛ kosɔbɛ, ne kolo bɛɛ magamagara.

¹⁵ Fɔɲɔ sifa dɔ fiyɛra ne ɲada kan, fɔɔ ne farisi wilila ka lɔ.

¹⁶ Mɔgɔ dɔ lɔnin tun be yen, ne ma se k'a tigi lɔn, a tora ne ɲafɛ ten. Ne ye ŋunuŋunukan dɔ mɛn ko:

¹⁷ ‹Adamaden min be sa, ale be se k'a fɔ ko ale tilennin lo Ala ɲakɔrɔ wa? Mɔgɔ be se k'a fɔ ko ale saniyanin lo a Danbaga ɲakɔrɔ wa?

¹⁸ Ni Ala lanin te a ka baarakɛlaw la, n'a ye fiɲɛ sɔrɔ a ka mɛlɛkɛw la,

¹⁹ adamaden min ye bɔgɔ ye, o ta be fɔ tugu wa? Mɔgɔ min ye buguri ye, a tena fiɲɛ sɔrɔ ale la wa? Ale min be se ka mugumugu ɲatugu ni ɲayɛlɛ cɛ.

²⁰ Olu minw bena mugumugu tile kelen kɔnɔ, u fana be tunu ten kudayi, mɔgɔ tena jatiminɛ kɛ u la.

²¹ U ka nafolo bena kɛ mɔgɔ wɛrɛ ta ye, u bena sa u te foyi faamu.›