Ayuba 34 - ALA KA KUMA

¹ Eliyu y'a fɔ tugu ko:

² «Kolɔnbagaw, aw ka mɛnni kɛ ne fɛ. Hakilitigiw, aw k'aw tulo malɔ ne fɛ.

³ Bari tulo be kuma sɛgɛsɛgɛ, i ko nɛɛn be dumuni nɛnɛ cogo min na.

⁴ Min tilennin lo, an k'o jati minɛ ɲɔgɔn fɛ. An k'a filɛ ɲɔgɔn fɛ min ka ɲi.

⁵ Zɔbu, e ko ele jalakinin tɛ, ko Ala le be ban k'i kɛ mɔgɔtilennin ye.

⁶ Ko a te i ka koo ɲanabɔ ni tilenninya ye. Ko i jalakinin tɛ, a do ye joli la i kan fura te min na.

⁷ Zɔbu ɲɔgɔn be yen wa? Ɲadonya te foyi ye a ɲana.

⁸ A ni kojugukɛlaw le ye jɛnɲɔgɔnw ye, a taamaɲɔgɔn ye mɔgɔjuguw le ye.

⁹ Bari a ko mɔgɔ te tɔnɔ foyi sɔrɔ Alasira taama la.

¹⁰ Hakilitigiw, aw ka mɛnni kɛ ne fɛ. Ka kojugu kɛ, o miiriya ka jan Ala la. Ka kodagabali kɛ, o miiriya ka jan Setigi la.

¹¹ Nga, a be adamadenw ka kɛwaliw juru sara u ye, a be bɛɛ sara ka kɛɲɛ n'u ka kɛta ye.

¹² Tiɲɛ na, Ala te kojugu kɛ abada! Setigi te tiɲɛ to ka namara kɛ.

¹³ Jɔn le y'a sigi dugukolo kunna? Jɔn le ye diɲɛ kalifa a ma?

¹⁴ Ni Ala tun be miiri a yɛrɛ dama la, a tun bena mɔgɔw nii minɛ le dɔrɔn,

¹⁵ mɔgɔw bɛɛ tun bena halaki ɲɔgɔn fɛ, adamaden tun bena segi buguri la.

¹⁶ Zɔbu, n'i be koo lɔn, e k'i tulo malɔ, i tulo malɔ ne ka kuma na.

¹⁷ Ala be se ka kɛ diɲɛ kuntigi ye ni tilenninya man d'a ye wa? Ale min tilennin lo ni see b'a ye, e be sɔn k'a jalaki wa Zɔbu?

¹⁸ Ale min be masacɛ ka juguya fɔ a ye, a fana be ɲamɔgɔw ka kojuguw yira.

¹⁹ Ale min te ɲamɔgɔ fisaya ni tɔw ye, a te fantan bɔ fɛntigi la, bari ale lo y'u bɛɛ dan.

²⁰ U be sa yɔrɔnin kelen, dugutilama, jama be muruti ka halaki, fangatigi be tunu, hali mɔgɔ te maga a la.

²¹ Bari Ala ɲaa be bɛɛ taamacogo la, a be bɛɛ ka tɛmɛsiraw filɛra.

²² Dibi si te yen, kojugukɛlaw be se ka dogo min na.

²³ Ala te sɛgɛsɛgɛli caaman kɛ ka sɔrɔ ka adamaden ka kiti tigɛ do.

²⁴ A te kunnafoni kɔnɔ ka sɔrɔ ka fangatigiw bɔ baara la ka dɔ wɛrɛw sigi u nɔɔ na.

²⁵ Bari a b'u ka koo kala ma, a b'u ben ka mugumugu sufɛ.

²⁶ A b'u gosi mɔgɔjugu bugɔcogo la, a b'o kɛ mɔgɔ bɛɛ ɲana.

²⁷ Olu tun bann'a la, u tun y'a ka sariyaw bɛɛ bila.

²⁸ U y'a kɛ fantanw kulekan ser'a ma, a y'a tulo malɔ olu kasikan na.

²⁹ N'a te foyi kɛ, jɔn be se k'a jalaki? N'a y'a yɛrɛ dogo, jɔn be se k'a ye? A be siyaw kɔlɔsi ani adamadenw,

³⁰ janko Alaɲasiranbali kana fanga sɔrɔ tugu, a fana kana kɛ jaan ye jama ɲafɛ.

³¹ Ni mɔgɔ dɔ tun y'a fɔ Ala ye ko: ‹Ne ye n ka kojugu tɔɔrɔ kɛ ka ban, ne tena kojugu wɛrɛ kɛ tugu.

³² Ala, ne ma min lɔn, e k'o yira ne la, ni ne ye kojugu kɛ, n tena dɔ wɛrɛ kɛ tugu.›

³³ E ma sɔn minkɛ, e ka miiri la, Ala ka kan k'o tigi ɲaa gwan wa? E k'i ka miiriya fɔ sa. Bari, kuma be ele le fɛ, ne tɛ.

³⁴ Hakilitigiw sɔnnin be ne ta ma. Kolɔnbaga minw be ne lamɛnna, olu ta be ten fana ko:

³⁵ ‹Zɔbu be kuma a kunfɛ. Kuun t'a ka kuma na.

³⁶ A be kuma i ko mɔgɔjugu minkɛ, a ka kan ka kɔrɔbɔ kosɔbɛ.

³⁷ A be murutira ka fara a ka kojugu kan tugu. A be taga ɲa ka kuma caaman fɔ Ala ma. A be siga donna mɔgɔw la an cɛma.› »