Ayuba 33 - ALA KA KUMA

¹ «Sisan sa, ele Zɔbu ka ne ka kuma mɛn. N bena min fɔ, o bɛɛ mɛn ka ɲa.

² Ne bena kuma dɛ! Min be n daa la, n bena o fɔ!

³ Ne bena tiɲɛ dama le fɔ, ne bena kuma kɔnɔgwɛ la.

⁴ Ne danna Ala ka Nii le barika la, ne be nii na Setigi ka Nii le sababu la.

⁵ N'i be se, i ka ne jaabi sa, e k'i yɛrɛ labɛn ka ne sɔsɔ.

⁶ An bɛɛ ye kelen ye Ala ɲakɔrɔ, an bɛɛ fila danna ka bɔ bɔgɔ la.

⁷ Kuun t'a la i be yɛrɛyɛrɛ ne ɲa, ne tena i tɔɔrɔ do.

⁸ E ka kuma be n tulo la, i ye min fɔ, n y'o mɛn. I ko:

⁹ ‹Ne gwɛnin lo, ne ma kojugu kɛ. Ne dafanin lo, jalakiyɔrɔ si te ne la.

¹⁰ Nga Ala ye jalakiyɔrɔ sɔrɔ ne la, a be ne minɛ i ko a jugu.

¹¹ A be ne seen siri ni jɔrɔkɔw ye, a be n ka kɛta bɛɛ kɔlɔsi.›

¹² Ne b'a fɔ i ye ko tiɲɛ t'i fɛ o la. Bari, Ala ka bon ni adamaden ye.

¹³ Mun na e be sɔsɔli kɛ n'a ye, ko a te mɔgɔ ka ɲiningaliw bɛɛ jaabi?

¹⁴ Ala be kuma cogo dɔ la waati dɔ la, waati wɛrɛ, a be kuma cogo wɛrɛ la, nga mɔgɔw t'u tulo malɔ le.

¹⁵ A be kuma u fɛ siko ni koyirata la, a be kuma u fɛ u fari fagawaati la, a be kuma u fɛ k'u to sinɔgɔ la u ka dilan kan.

¹⁶ A be fɛɛn yirata yira u la, k'u lasɔmi.

¹⁷ A b'o kɛ janko ka mɔgɔ bɔ kojugu la, a b'a tanga yɛrɛboɲa ma.

¹⁸ A b'a nii kisi ten, a fana ben'a kisi saya ma.

¹⁹ Nga Ala be adamaden ladi fana ni bana ye a layɔrɔ la, a fari bɛɛ be yɛrɛyɛrɛ farigwan bolo.

²⁰ Dumuni te diya a daa la tugu, hali dumuni min tun ka d'a ye.

²¹ A be fasa ka kɛ kakaka fɔɔ mɔgɔ t'a lɔn tugu, a tɔɔ be to kolo dama ye.

²² O tuma na, a surunyana kaburuda la yɛrɛ, a nii be to nibɔbaga bolo.

²³ Ala ka ciden waa kelen cɛma, ni mɛlɛkɛ kelen dɔrɔn cira o banabagatɔ nin fɛ, a ka kan ka siraɲuman min ta, a daan ye a k'o fɔ a ye dɔrɔn.

²⁴ Mɛlɛkɛ be makari a la k'a fɔ Ala ye ko: ‹Makari a la. Kan'a to a be sa, ne y'a kunmabɔfɛn sɔrɔ.›

²⁵ A farisogo be segi ka kɛ a cogo kɔrɔ la yen, a be kɛ i ko a wilitɔ kura.

²⁶ N'a ye Ala daali, ale b'a ka daalili minɛ. A be ta'a ɲakɔrɔ ni nisɔndiyapɛrɛnkan ye, bari Ala y'a kisi saya ma.

²⁷ A bena dɔnkili la mɔgɔw ɲana ko: ‹Ne tun ye kojugu kɛ, n tun ma Ala ka fɔta bato, nga Ala ma ne sara ka kɛɲɛ n'o ye.

²⁸ Ala y'a kɛ ne ma kaburu ye, ne tora nii na, ne ɲaa be yeelen na.›

²⁹ Ala be to k'o bɛɛ kɛ adamaden ye, a b'o ɲɔgɔn kɛ siɲɛ caaman.

³⁰ A b'o kɛ janko ka kɔsegi ka bɔ n'a ye kaburuda la, janko ka se ka mɔgɔ ɲanaman ka yeelen bɔ a ye.

³¹ Zɔbu, i tulo malɔ kosɔbɛ ka ne lamɛn dɛ! I je tewu k'a to ne be kuma.

³² Ni fɛɛn dɔ b'i fɛ ka ne jaabi, i k'o fɔ. I ka kuma sa, bari ne b'a fɛ ka tiɲɛ d'i ma.

³³ Ni foyi fana t'i daa la, e ka mɛnni kɛ ne fɛ. Je ne bena i kalan lɔnniya la.»