Ayuba 3 - ALA KA KUMA

Zɔbu n'a teri saba ka baro Zɔbu b'a ka makari fɔ

¹ A laban, Zɔbu ye kuma ta ka kumajugu fɔ a wololon koo la.

² A ko:

³ «Ne wololon niin ka bɔ jatili la. N kɔnɔ tara suu min na, ale fana ka kɛ ten.

⁴ O loon nin ka kɛ dibi ye, Ka Ala to sanfɛ, a kana miiri a la, yeelen kana bɔ o loon na.

⁵ Dibi ka kɛ a niyɔrɔ ye, dibijugu! Sankabaw k'a datugu, suu ka ko tilefɛ.

⁶ Dibi ka don o suu nin kɔnɔ kosɔbɛ, a kana sɔrɔ loonw cɛma saan kɔnɔ. A kana jati kalow cɛma.

⁷ O suu nin ka kɛ densɔrɔbali suu ye, nisɔndiyamankan kana mɛn suu nin kɔnɔ.

⁸ Londangabagaw k'a kɛ lonjugu ye, sogojugu Leviyatan welebagaw k'a kɛ lonjugu ye.

⁹ A dugugwɛda lolow ka dibi. A mako ka kɛ yeelen na, a kan'a sɔrɔ. A kana dugugwɛda kɛnɛ ye.

¹⁰ Bari a ma ne woloko bali, janko a tun ka kɛ sababu ye ne ɲaa tun kana la tɔɔrɔ nin kan.

¹¹ Mun na ne ma sa n bamuso kɔnɔ? Mun na n ma sa n wolowaati yɛrɛ la?

¹² Mun na ne ye seenw sɔrɔ ka la u kan yɛrɛ? Mun na siin sɔrɔla ka n balo?

¹³ N'o tɛ, yan tuma si, n tun lara ɲasuma na kaburu la ka sinɔgɔ ka lafiɲɛ.

¹⁴ N tun bena fara diɲɛ masaw ni ladibagaw kan, minw tun be to ka kaburu taamasiɲɛw lɔ u yɛrɛ ye.

¹⁵ N tun bena kɛ ni ɲamɔgɔw ye, sanu tun be minw fɛ, minw tun b'u ka boonw fa wari la.

¹⁶ Ne tun bɛna kɛ i ko deen min sanin wolola, i ko deen minw ma tile ye.

¹⁷ Mɔgɔjugu te foyi kɛ o yɔrɔ la tugu. O ye lafiɲɛyɔrɔ ye mɔgɔsɛgɛnnin fɛ.

¹⁸ Kasodenw b'u yɛrɛ sɔrɔ o yɔrɔ la ɲasuma na, u t'u kɔlɔsibaga pɛrɛnkan mɛn yen tugu.

¹⁹ Mɔgɔba ni mɔgɔ gwansan bɛɛ ye kelen ye o yɔrɔ la, jɔɔn be hɔrɔnya ka bɔ a kuntigi bolo yen.

²⁰ Mun na Ala b'a to dugu be gwɛ ka ɲanibagatɔw sɔrɔ? Mun na dusukasibagaw be sii sɔrɔ?

²¹ Minw be saya kɔnɔna, a do te se u ma, u b'a fɛ yɛrɛ, ka tɛmɛ nafolo kan.

²² U tun bena taga nisɔndiya la, u tun bena nisɔndiya kosɔbɛ kaburu sɔrɔ la.

²³ Mun na sii be di mɔgɔ ma min t'a taayɔrɔ lɔn? Ala be min datugu i ko kogo.

²⁴ Ŋunan le kɛra ne ka dumuni ye, ne kasikan be bɔ i ko jikuru.

²⁵ Ne siranna koo min na, o le ye n sɔrɔ. N siranna kosɔbɛ min ɲa, o le sera n ma.

²⁶ Ɲasuma te n kan, n te hɛrɛ la, n lafiyanin tɛ, ɲagwan le be n kan.»