Ayuba 29 - ALA KA KUMA

¹ Zɔbu tagara ɲa ni kuma ye ko:

² «Ni ne tun be se ka segi ka kɛ i ko kunu kɔni, ka kɛ i ko Ala tun be n marala tuma min na,

³ a ka fitinɛ tun be yeelen bɔ ne sanfɛ waati min na, ne tun be to ka taama a ka yeelen barika la sufɛ!

⁴ Ni ne tun be se ka kɛ i ko n kanbelenwaati kɔni, Ala tun ye ne ka soo teri ye waati min na,

⁵ Setigi tun be ni n ye waati min na, ne dencɛw tun be ne lamini tuma min na,

⁶ o waati la, ne tun be a diman kan kosɔbɛ. Tulu tun be bɔ ne ka wugu la kosɔbɛ.

⁷ O tuma na, ni ne tun bɔra ka taga dugu donda la, ni n tun tagara sigi forobayɔrɔ la,

⁸ ni kanbelenw tun ye ne ye, u tun be bɔ ne ɲafɛ, mɔgɔkɔrɔbaw tun be to ka wili ka lɔ.

⁹ Dugu ɲamɔgɔw tun be to k'u ka kuma tigɛ, u yɛrɛ tun be to k'u bolow la u daa la.

¹⁰ Kuntigiw kumakan tun te mɛn tugu, u tun be to k'u daa tugu.

¹¹ Mɔgɔ minw tun be ne lamɛn, olu tun be to k'a fɔ ko ne dagamuna. Minw tun mana n ye, olu be n ka ɲumanya fɔ.

¹² Bari dɛsɛbagatɔ min tun be dɛmɛ fɛ, ne y'ale dɛmɛ. Dɛmɛbaga tun te falatɔ min na, ne y'ale dɛmɛ.

¹³ Sabagaw tun be to ka dubaw kɛ ne ye, n ma sɔn ka firiyamuso to ten ni n m'a dusu diya.

¹⁴ Tilenninya tun kɛra i ko ne ka fani, n tun be to k'a don. Mɔgɔsɔbɛya tun kɛra i ko n ka foroca, ani n ka fugulan.

¹⁵ Ne le tun ye fiɲɛntɔ ɲaden ye, ne le tun ye muruku seen ye.

¹⁶ Ne tun ye fantanw faa ye, ne tun be to ka janto lonanw na kosɔbɛ.

¹⁷ N tun be to ka mɔgɔ tilenbaliw ɲiin kari. U tun ye fɛɛn min sɔrɔ, n tun be to k'o bɔsi u la.

¹⁸ Ne tun ko: ‹N bena sijan sɔrɔ ka sɔrɔ ka sa soo kɔnɔ.

¹⁹ Ne be i ko yiri min liliw be jii kɔrɔ, komiji be kɛ n bolomisɛnw kan sufɛ.

²⁰ O la, ne ka boɲa tun be n kan kudayi, n ka biɲɛw tun be taga ni barika ye.›

²¹ U tun be to ka mɛnni kɛ ne fɛ kosɔbɛ, u tun be to ka je ka ne ka ladili mɛn.

²² Ni ne tun kumana ka ban dɔrɔn, mɔgɔ si tun te foyi fɔ tugu. Ne ka kuma tun be tɔnitɔni u kan i ko jii.

²³ U jigi tun be ne kan i ko u jigi be sanji kan cogo min na, u tun be ne kɔnɔ i ko u be saminyalaban sanji kɔnɔ cogo min na.

²⁴ Ne tun mana yɛlɛkomisɛn kɛ n'u ye, u tun te se ka la o la. U tun b'a fɛ ka cogo dɔ ye n na, min b'a yira u la ko n be u fɛ.

²⁵ Ne tun be sira yira u la, n tun be i ko masa, u cɛma. Ne tun kɛra i ko mɔgɔ min be dusukasibagaw jigi tugu.