Ayuba 28 - ALA KA KUMA

¹ «Warigwɛ bɔyɔrɔ be yen, yɔrɔ be yen fana, sanu be ko min na ka woloma.

² Nigɛ be bɔ dugukolo le kɔnɔ, u be kabakuru le yeelen ka zira bɔ a la.

³ Mɔgɔw be don ni yeelen ye o dibi nin kɔnɔ, u be ɲinini kɛ fɔɔ ka se jukɔrɔ, u be kabakuru yaala dibijugu nin kɔnɔ.

⁴ U be lɛɛ wɔgɔbɛ fɔɔ ka jigi, adamaden te yɔrɔ min na. U te se ka lɔ seenw kan yɔrɔ min na, u be dulon juru la le o yɔrɔ la.

⁵ Dumuni be bɔ dugukolo sanfɛla la, k'a sɔrɔ a jukɔrɔla be i ko tasuma le y'a halaki.

⁶ Kabakuru bulaman be bɔ o fara nunu le la, sanumugu fana be sɔrɔ yen le.

⁷ Sogodumukɔnɔ t'o sira nin lɔn, duga ɲaa ma la a kan.

⁸ Kongosogow ka masa ma tɛmɛ yen ka ye, jara m'a sira ta ka ye.

⁹ Nga adamaden be sɔn ka kabakuru ci, a be kuluw walaka fɔɔ u jukɔrɔ.

¹⁰ A be faraw ci ka tɛmɛyɔrɔw bɔ u la, a be fɛɛn sɔngɔgwɛlɛn bɛɛ ye yen.

¹¹ A b'a kɛ, jii be lɔ a te woyo tugu, a be fɛndogonin bɔ kɛnɛ kan.

¹² Nga lɔnniya be sɔrɔ min? Hakilitigiya be sɔrɔ yɔrɔ jumɛn?

¹³ Adamadenw t'a sɔngɔ lɔn do! A te sɔrɔ diɲɛ kɔnɔ.

¹⁴ Jii bɔyɔrɔ ko a te ale fɛ, kɔgɔji ko a te sɔrɔ ale kɔnɔ.

¹⁵ A te se ka falen sanu yɛrɛ la. Warigwɛ fana t'a sɔrɔ.

¹⁶ Sanu yɛrɛyɛrɛ te se ka suma n'a ye, walima kabakuru kɔlɔbolaman, ni kabakuru bulaman.

¹⁷ Sanu te se ka suma n'a ye, ani buteli sɔngɔgwɛlɛn, a te se ka falen ni daga ɲaa kelen sanu ye.

¹⁸ Kolonkisɛ ni kabakuru sɔngɔgwɛlɛn koo yɛrɛ te fɔ. Ka lɔnniya sɔrɔ, o ka fisa ni kɔnɔkisɛ sɔngɔgwɛlɛn ye.

¹⁹ A te se ka suma ni Etiyopi kabakuru nɛrɛmuguman ye, a te se ka suma ni sanu yɛrɛyɛrɛ ye.

²⁰ O la do, lɔnniya be bɔ min? Hakilitigiya be sɔrɔ yɔrɔ jumɛn tugu?

²¹ A dogonin be adamaden bɛɛ ma, kɔnɔw fana m'a ye.

²² Dingɛba ni saya ko: ‹Anw y'a koo mɛn.›

²³ Ala le b'a sɔrɔsira lɔn, ale lo b'a yɔrɔ lɔn.

²⁴ A ye filɛli kɛ fɔɔ diɲɛ daan na, ka sankolo jukɔrɔ fɛɛnw bɛɛ kɔlɔsi.

²⁵ A ye fɔɲɔ ka gwiliya daan latigɛ waati min na, a ye jii ka caya daan latigɛ tuma min na,

²⁶ a ye nacogo yira sanji la waati min na, ani ka sanmanamana tɛmɛyɔrɔ yir'a la tuma min na,

²⁷ o tuma na, a ye lɔnniya ye k'a sɛgɛsɛgɛ, ani k'a cogo yira.

²⁸ O la, a y'a fɔ adamaden ye ko: ‹Ka siran ne Matigi ɲa, o le ye lɔnniya ye. Ka kojugu dabila, o ye hakilitigiya ye.› »