Ayuba 27 - ALA KA KUMA

Zɔbu ka kuma laban

¹ Zɔbu ye kuma ta tugu ko:

² «Ala min te ne ka tiɲɛ yɔrɔ yirala, ale kosɔn, Setigi min be ne dusu kasira, ale kosɔn,

³ ka ne to nii na, ka ne to ninakili la,

⁴ kojugu si tena bɔ ne daa la, n fana tena galon si ŋunuŋunu n daa la.

⁵ Ne tena tiɲɛ di aw ma fewu, fɔɔ ka taga n sa, n ka tilenninya le be n daa.

⁶ Ne lanin be n ka tilenninya la, n tena segi kɔfɛ, ne kɔni ma n yɛrɛ jalaki foyi la.

⁷ Mɔgɔjugu ka kan ni min ye, o ka kɛ ne jugu la. Mɔgɔ tilenbali ka kan ni min ye, o ka ne kɛlɛbaga sɔrɔ.

⁸ Ni Ala ye mɔgɔjugu ka kalifa minɛ a la, mun le be kɛ a jigi ye tugu?

⁹ Ni tɔɔrɔ ser'a ma tuma min na, yala Ala b'a ka daalili jaabi wa?

¹⁰ A bena Setigi jati a diyanafɛn ye wa? A bena sɔn ka to ka Ala daali tuma bɛɛ wa?

¹¹ Ne bena Ala ka sebagaya fɔ aw ye, ne tena Setigi ka kolatigɛninw dogo aw la.

¹² Nga aw bɛɛ y'a ye ka ɲa, mun na aw y'aw yɛrɛ to fuu bolo?

¹³ Mɔgɔjuguw niyɔrɔ Ala fɛ, o ye nin ye, Setigi be min di mɔgɔtɔɔrɔbagaw ma, o filɛ nin ye:

¹⁴ U mana deen caaman sɔrɔ, olu bena faga ni murujan ye. U mamadenw tena dumuni sɔrɔ ka fa.

¹⁵ Minw bena kisi murujan ma, olu bena sa banajugu bolo, u ka musow yɛrɛ tena se ka kasi.

¹⁶ U ye wari caaman sɔrɔ i ko ɲamaɲama wo, u ye faniw cɛ k'u ton i ko bɔgɔ wo,

¹⁷ aw k'o to yen, mɔgɔtilennin le bena fani nunu don, mɔgɔ jalakibali le bena wari nin ta.

¹⁸ Mɔgɔjuguw ye boon minw lɔ, barika t'a la, u be i ko foro kɔlɔsibaga ka bugu.

¹⁹ U nafolotigilaman le be la, o be kɛ u ka koo daan ye fana. N'u ko u bena u ɲaa yɛlɛ, foyi te yen tugu.

²⁰ Siranya be cun u kan i ko jii be na cogo min na. Funufunu ben'u ta sufɛ.

²¹ Fɔɲɔ min be bɔ kɔrɔn fɛ, o ben'u ta ka taga n'u ye, o ben'u ta ka bɔ u sigiyɔrɔ la fanga la.

²² A be fiyɛra u kan n'a ka fanga bɛɛ ye. U ka kan ka boli a ɲa le.

²³ U be tɛgɛrɛ fɔ u halakiko kama, u be file fiyɛra u ka sigiyɔrɔ la.