Ayuba 23 - ALA KA KUMA

Zɔbu be Elifazi jaabi

¹ Zɔbu y'a fɔ Elifazi ye ko:

² «Ne tun t'a fɛ n ŋunankan ka mɛn tugu. Nga halibi, ne ka dusukasikuma le barika ka bon.

³ Haan! Ni ne tun be se ka Ala yɔrɔ lɔn kɔni, ni ne tun be se ka se a sigiyɔrɔ la kɔni!

⁴ Ne tun bena n ka koo ɲafɔ a ye le. Ne tun bena kuma caaman fɔ dɛ!

⁵ Ne tun ben'a ka fɔta mɛn. Ne tun bena o faamu do.

⁶ A tun ben'a barika bɛɛ le yira ne kitiko la wa? Ayi, nga a daan ye k'a tulo malɔ ne fɛ dɔrɔn.

⁷ Mɔgɔtilennin le tun bena kuma n'a ye, ale min ye ne kitibaga ye, a tun bena tiɲɛ di ne ma.

⁸ Nga ni ne tagara kɔrɔn fɛ, n t'a ye yen, ni n tagara tileben fɛ, n t'a ye o yɔrɔ la.

⁹ A be koo dɔ la kɔgɔdugu faan fɛ wa, n t'a yera. A y'a yɛrɛ dogo worodugu faan fɛ wa, n ɲaa t'a yera.

¹⁰ K'a sɔrɔ ne be sira min kan, a b'o lɔn, a be ne kɔrɔbɔra, nga ne gwɛnin le bena bɔ o la i ko sanu.

¹¹ Ne tugur'a seen nɔɔ le kɔ, n y'a ka sira taama, n ma faran fewu.

¹² Ne y'a ka fɔta bato, a ye minw bɛɛ fɔ, ne y'o mara n kɔnɔ.

¹³ N'a ye koo min latigɛ, jɔn le be se k'a kɛ a b'o yɛlɛma? A be min fɛ, a be o le kɛ.

¹⁴ A ye min latigɛ n kosɔn, a bena o kɛ, dɔ wɛrɛ fana be sɔrɔ, a ye minw mara.

¹⁵ O la, ne jaa be tigɛ a ɲakɔrɔ. Ni ne miirila, n be siran a ɲa.

¹⁶ Ala ye ne jaa tigɛ, Setigi ye siranya bila ne la.

¹⁷ Dibi ma ne bali ka kuma. A ye ne bila dibi min na, o ma ne bali fana.