Ayuba 22 - ALA KA KUMA

Elifazi be kuma Zɔbu fɛ tugu

¹ Elifazi ka bɔ Teman y'a fɔ Zɔbu ye ko:

² «Mɔgɔ be se ka mun le ɲa Ala ye? Hakilitigi kɔni be se ka fɛɛn ɲa a yɛrɛ ye.

³ I ka tilenninya be mun ɲa Ala ye? N'i kɛra mɔgɔɲuman ye, o be mun ɲa a ye?

⁴ E ɲana, a b'i jalakira e ka tilenninya le kama wa? E ɲana, a b'i kitira o le kama wa?

⁵ Nga, e ka kojuguw ka caya kama lo. Daan te ele ka fili la do.

⁶ E tun be to ka ben e balimaw kan ka fɛɛn dɔ minɛ u fɛ, ka sɔrɔ ka juru don u la. E tun be to k'u ka faniw minɛ k'u to lakolon.

⁷ E tun be ban ka jii di minnɔgɔtɔ ma, e tun be ban ka dumuni di kɔngɔtɔ ma.

⁸ Dugukolo tun kɛra fangatigi ta ye, yɛrɛboɲala y'a kɛ a sigiyɔrɔ ye.

⁹ E tun be to ka ban ka firiyamusow sɔn, e tun be to ka falatɔw barika ban.

¹⁰ O le y'a to jaan kɛra k'i lamini, siranya y'i minɛ yɔrɔnin kelen.

¹¹ E tora dibi la e te yeli kɛra. I tununin be i ko jiba ye mɔgɔ min tunu.

¹² An b'a lɔn ko Ala be sankolo la, lolo be bɛɛ sanfɛ legelege, e ɲaa te o la wa?

¹³ E be tugu k'a fɔ ko: ‹Ala be mun le lɔn?› A be se ka dibikɔnɔkow ɲanabɔ wa?

¹⁴ A be sankolo yaala tuma min na, sankaba ka fin be kɛ, a te foyi ye.

¹⁵ Anhaan, kojugukɛlaw ye sira min ta, e b'a fɛ ka o le ta wa?

¹⁶ U bɔra diɲɛ na, n'a waati yɛrɛ ma se, u tɛmɛna i ko jiba ye kogo min ta.

¹⁷ U tun be to k'a fɔ Ala ye ko: ‹An to ɲasuma na. Setigi lo, nga a be se ka mun le kɛ an na?›

¹⁸ K'a sɔrɔ ale Ala le tun ye nafolo di u ma, nga mɔgɔjugu ka kolatigɛnin yɔrɔ ka jan Ala la.

¹⁹ Mɔgɔtilenninw bena u halakitɔ ye ka nisɔndiya, jalakibaliw bena u lɔgɔbɔ ko:

²⁰ ‹An juguw halakira, tasuma y'u ka fɛɛn bɛɛ jɛni.›

²¹ Bɛɛn ɲini Ala fɛ, a bena ɲa, e fana bena hɛrɛ sɔrɔ.

²² Sɔn a ka ladilikan ma, k'a ka fɔta mara i dusu la.

²³ N'i kɔsegira Setigi ma, a bena e ta ɲa. E k'i mabɔ tilenbaliyakow la.

²⁴ E k'i ka sanu fili duguma, e ka sanu yɛrɛyɛrɛ fili bɛrɛw cɛma jii kɔnɔ.

²⁵ E ka Setigi kɛ i ka sanu ye, a ka kɛ e ka warigwɛ ye.

²⁶ O la, Setigi bena kɛ i diyanafɛn ye, i bena e ɲaa kɔrɔta k'a filɛ.

²⁷ E ben'a daali, a bena i jaabi, e fana bena e ka dajuruw sara.

²⁸ E mana fɛɛn o fɛɛn latigɛ, o bena ɲa, e ka koo bɛɛ bena gwɛ i ka sira kan.

²⁹ Bari koo minw be latigɛ ni yɛrɛboɲa ye, Ala b'o cɛn, min kɛra ni yɛrɛmajigi ye, a b'o ɲa.

³⁰ Ale be mɔgɔ jalakinin kunmabɔ, a bena e kunmabɔ n'i be koɲuman kɛ.»