Ayuba 21 - ALA KA KUMA

Zɔbu be Sofari jaabi

¹ Zɔbu y'a fɔ Sofari ye ko:

² «E tulo malɔ ne fɛ, o dama bena ne dusu saalo.

³ E muɲu, to ne be kuma, ni n kumana ka ban, e ka n lɔgɔbɔ.

⁴ Ne ka kuma ɲaa yɛrɛ sinnin be adamaden ma wa? Mun na ne tena kɔrɔtɔ?

⁵ Aw ka ne ka koo sɛgɛsɛgɛ, aw bena kabakoya k'aw bolo la aw daa la.

⁶ Koo minw bɛɛ ye ne sɔrɔ, ni ne miirila o la waati min na, ne be siran fɔɔ ka yɛrɛyɛrɛ.

⁷ Mun na mɔgɔjugu be to nii na? Mun na u be kɔrɔya, dɔ fana be fara u fanga kan?

⁸ Mun na u deenw be boɲa u ɲana, u mamadenw be wili k'u sɔrɔ?

⁹ Hɛrɛ le b'u ka soo kɔnɔ, u te siran foyi ɲa, Ala t'u ɲaa gwanna.

¹⁰ U ka turaw ka kɛnɛ, u be se ka deenw sɔrɔ. U ka misiw be wolo ka ɲa, u kɔnɔ te cɛn ka ye.

¹¹ U b'u ka denmisɛnw to u be bolibolila i ko sagaw, u mamadenw b'u ta kɛ dɔrɔn.

¹² U be dɔnkili lara n'u be dundun ni gɔni fɔra, u be nisɔndiya file fɔkan fɛ.

¹³ U b'u sii tile kɛ hɛrɛ la, o kɔ, u be taga lafiya la lahara.

¹⁴ U tun be to k'a fɔ Ala ye ko: ‹Bɔ an kɔrɔ. An t'a fɛ k'i ka koo lɔn.

¹⁵ E Setigi ye jɔn le ye, n'an ka kan ka baara kɛ i ye? An be mun le sɔrɔ e daali la?›

¹⁶ Tiɲɛ na, o mɔgɔ nunu b'a miiri k'u ka hɛrɛ be bɔ u yɛrɛ la. Nga u ka fɔta te ne ka miiriya ye.

¹⁷ Saya be cun u kan tuma caaman wa? Balawu be u sɔrɔ wa? Ala ka dimi be se u ma wa?

¹⁸ K'a sɔrɔ mɔgɔw b'u danga ko: ‹U ka kɛ i ko sumanɲaga, fɔɲɔ be taga ni min ye, U ka kɛ i ko gwangwan, funufunu be min ta.›

¹⁹ O tuma na, Ala be deenw le ɲagwanna u faaw nɔɔ na wa? O ka kan ka kɛ a yɛrɛ le la, janko a b'a nɛnɛ.

²⁰ A ɲaa ka kan ka la a yɛrɛ le ka sigɛn kan, ale lo ka kan ka Setigi ka dimi sɔrɔ.

²¹ N'a sii banna, a kɔmɔgɔw ka koo te foyi ye a fɛ tugu.

²² Mɔgɔ ka kan k'o koo nunu ɲayira Ala la wa? Ale min be mɛlɛkɛw yɛrɛ kiti.

²³ Mɔgɔ dɔ be to ɲasuma na fɔɔ ka taga sa, a te hami foyi la, a hakili siginin be.

²⁴ A farisogo nugunin be kosɔbɛ. A sɛmɛ ka ɲi kosɔbɛ.

²⁵ Dɔ wɛrɛ fana be sa dusukasi la n'a ma hɛrɛ sɔrɔ ka ye fewu.

²⁶ U bɛɛ do bena la kaburu kɔnɔ. Yanni dɔɔni, bagabaga be yɛlɛ u kan.

²⁷ Ne b'aw kɔnɔnako lɔn, aw be juguman min miiri ka ne jalaki, n b'o lɔn.

²⁸ Aw b'a fɔra ko: ‹Mɔgɔtɔɔrɔbagaw ka soo be min?› Ko: ‹Mɔgɔjuguw ka sigiyɔrɔ be min?›

²⁹ Aw ma tɛmɛbagaw ɲininga wa? Walima u be minw fɔ, aw m'o fana faamu wa?

³⁰ Kojugukɛla be kisi bɔnɛlon na, foyi te kɛ a la Ala ka dimi bɔlon na.

³¹ Jɔn ben'a jalaki a ka fili la? Jɔn ben'a ka kojugu juru sara a la?

³² N'a sara, u be taga n'a ye kaburutu kɔnɔ, u fana be janto a ka kaburu la.

³³ Mɔgɔ bɛɛ tugur'a suu kɔ, jamaba bilar'a ɲafɛ, a layɔrɔ fana be suma.

³⁴ Mun na aw be ne dusu saalo ni kumafu ye? Aw ka fɔta nunu ye namarakumaw le ye.»