Ayuba 18 - ALA KA KUMA

Bilidadi be kuma Zɔbu fɛ tugu

¹ Bilidadi ka bɔ Suwa y'a fɔ Zɔbu ye ko:

² «I bena o kuma nunu dabila tuma jumɛn? I ka hakili sɔrɔ janko ne ka dɔ fɔ i ye.

³ Mun na an bena an yɛrɛ to a b'an kɛ begɛnw ye? A bena an jati nunsɔgɔw ye mun na?

⁴ E min b'i yɛrɛ sigɛn dimi bolo, dugukolo bena lakolonya e kosɔn wa? E kosɔn, faraw bena wili ka bɔ u sigiyɔrɔ la kɛ?

⁵ Mɔgɔjugu ka fitinɛ le be faga tigitigi, tasuma tena mana a ka gwa la tugu.

⁶ Tasuma yeelen tena ye a ka soo kɔnɔ tugu, a nii bena bɔ.

⁷ A te taama ni hakilisigi ye tugu, a bena ben a ka kolatigɛninw sababu la.

⁸ A be tagara don jɔɔ kɔnɔ, a be tagara minɛyɔrɔ la.

⁹ Jaan ben'a senju minɛ, juru ben'a siri kosɔbɛ.

¹⁰ A minɛjuru dogonin be dugukolo kɔnɔ, a lanin be a ka sira kan.

¹¹ Siranyakow b'a faan bɛɛ la, u b'a dɛndɛna kosɔbɛ.

¹² Barika tun b'ale min na, kɔngɔ y'a minɛ, dɛsɛ yɔrɔ man jan a la tugu.

¹³ O ben'a farisogo halaki, saya ben'a fari ban.

¹⁴ U ben'a bɔ a ka sigiyɔrɔɲuman na, u bena taga n'a ye saya kuntigi fɛ.

¹⁵ A ka soo lakolon bena to, mɔgɔ bena sigi a kɔnɔ, u bena kiribi bɔn a ka sigiyɔrɔ la.

¹⁶ A bena kɛ i ko yiri min be sara, a liliw be toli duguma, a bolomisɛnw be ja sanfɛ.

¹⁷ Jamanadenw hakili tena to a la tugu, a tɔgɔ tena wele yɔrɔ si tugu.

¹⁸ U y'a ɲɔti ka bɔ yeelen na k'a don dibi la, u y'a gwɛn ka bɔ diɲɛ na.

¹⁹ Kɔmɔgɔ ma sɔrɔ a fɛ a ka siya cɛma, mɔgɔ ma to a kɔ a sigiyɔrɔ la.

²⁰ Tileben fɛ mɔgɔw bena kabakoya a ka koo la, kɔrɔn fɛ mɔgɔw bena siran kosɔbɛ k'a fɔ ko:

²¹ ‹Mɔgɔ tilenbali ka soo be ten. Mɔgɔ min ma Ala lɔn, o tigi ka yɔrɔ be ten!› »