Ayuba 15 - ALA KA KUMA

Elifazi be kuma Zɔbu fɛ tugu

¹ Elifazi ka bɔ Teman y'a fɔ Zɔbu ye ko:

² «Kolɔnbaga be sɔn ka kumafu fɔ ten wa? A be sɔn k'a yɛrɛ boɲa koo fufafu la wa?

³ A be sɔn ka kuma gwansan fɔ wa? Kuma min te foyi ɲa, a be sɔn k'o fɔ wa?

⁴ I be Alaɲasiranko cɛnna le, i be mɔgɔ bali ka Ala daali.

⁵ Juguya min b'i la, o le b'a to i be kumana ten, e y'a latigɛ ka namarakuma le fɔ.

⁶ Ne t'i jalakira dɛ, e yɛrɛ daa le y'a fɔ, e dalakuma yɛrɛ le b'a yira.

⁷ E le ye mɔgɔ fɔlɔ ye dugukolo kan wa? E kɔnna tintinw ɲa wa?

⁸ E ye Ala ka kolatigɛninw mɛn wa? Lɔnniya kɛra i dama ta ye wa?

⁹ E be mun le lɔn n'anw t'o lɔn? E be mun le faamu n'anw t'o faamu?

¹⁰ Cɛkɔrɔbaw b'an cɛma, kunsigigwɛtigiw, olu sii tɛmɛna i facɛ ta kan.

¹¹ Ala le be jigi tugu, o t'i wasa kɛ? Kumaɲuman minw be fɔra i ye, o t'i wasa kɛ?

¹² Mun na i dimina ten? Mun na e be n filɛ ni ɲajugu ye?

¹³ I be dimina Ala le kɔrɔ do, e b'i ka kuma nunu fɔra ale lo ma.

¹⁴ Adamaden be se ka saniya wa? Muso ka woloden be se ka tilen wa?

¹⁵ Ala yɛrɛ lanin te a ka mɛlɛkɛw la, sankolo yɛrɛ saniyanin te a ɲana,

¹⁶ sankofɛrɛ adamaden min ma ɲi fewu. Kojugukɛ ni jii min ye kelen ye ale min fɛ.

¹⁷ Mɛnni kɛ ne fɛ, n bena dɔ fɔ i ye. Ne ye fɛɛn min ye, ne bena o ɲafɔ i ye.

¹⁸ Lɔnnikɛlaw ye min fɔ, u ma foyi dogo, i ko u faaw tun y'a fɔ u ye cogo min na.

¹⁹ Ala tun ye jamana di olu dama le ma, lonan si tun ma na u ɲagami.

²⁰ Mɔgɔjugu b'a sii bɛɛ kɛ tɔɔrɔ la, mɔgɔ fariman ka waati daan lɔnnin lo.

²¹ Siranyako le be magar'a tulo kɔrɔ, cɛnnikɛla be cun a kan.

²² A lanin b'a la ko ale tena bɔ dibi la, murujan b'a dɛndɛna.

²³ A kɛra yaalabaga ye n'a b'a ka dumuni ɲinina, a fana b'a lɔn ko dibi le b'a kɔnɔna.

²⁴ Dusukasi ni nisɔngoya le ben'a ɲaa gwan. U bena cun a kan, i ko masacɛ ka kɛlɛdenw be ben dɔ kan cogo min na.

²⁵ Bari a wilila Ala kama, a murutira Setigi ma.

²⁶ A y'a yɛrɛ tanga n'a ka nigɛkunbɛnnan gwiliman ye k'a kuun surun ka ta'a kama.

²⁷ A ɲada tun ka ɲi, a tun ka bon kosɔbɛ.

²⁸ A tun siginin be dugu cɛnnin dɔw kɔnɔ, mɔgɔ tun te sigi boon minw kɔnɔ, boon minw tun sera ben ma.

²⁹ O mɔgɔ sifa nin te kɛ nafolotigi ye, a ka nafolo fana tena mɛn, a tena fanga sɔrɔ jamana kɔnɔ.

³⁰ A tena kisi dibijugu ma. A be i ko yiri, tasuma ye min bolo jɛni. Ala dafiɲɛ ben'a ta ka taga n'a ye yɔrɔjan.

³¹ A kan'a yɛrɛ nigɛ k'a jigi la namara kan. Bari namara le bena kɛ a ka sara ye.

³² O bena kɔn a ka saya ɲa, a bena kɛ i ko yiribolo min tigɛra.

³³ A deenw kɔgɔbali bena burun i ko yiridenw, yirifeeren be ben cogo min na, u bena kɛ ten.

³⁴ Alaɲasiranbaliw bena to densɔrɔbaliya la. Daa sanfɛn ka di mɔgɔ minw ye, tasuma bena olu ka soow jɛni.

³⁵ Juguya be mɔgɔ min kɔnɔ, o tigi bena tɔɔrɔ le sɔrɔ. Koo min b'a kɔnɔ, o le ben'a yɛrɛ fili.»