Ayuba 13 - ALA KA KUMA

¹ «Ɔnhɔn, ne ɲaa lara o bɛɛ kan, n tulo y'a mɛn, n y'a faamu ka ɲa fana.

² Aw be fɛɛn min lɔn, ne fana b'o lɔn, ne ma la a la ko aw ka fisa ni ne ye dɛ.

³ Nga ne b'a fɛ ka kuma Setigi le fɛ, n b'a fɛ ka n kunbɔko fɔ ale lo ye.

⁴ Aw kɔni, aw kɛra galontigɛlaw le ye, aw kɛra furakɛlaw ye minw te foyi ɲa.

⁵ N'aw tun jera tɛtɛtɛ, o le tun ka fisa, o tun bena kɛ aw fɛ hakilitigiya ye.

⁶ Ne bena kuma min fɔ, aw k'o mɛn. Aw k'aw tulo malɔ ne dalakan na.

⁷ Aw bena namarakuma le kɛ ka Ala dɛmɛ kɛ? Aw bena galon tigɛ k'a dɛmɛ kɛ?

⁸ Aw bena aw yɛrɛ kɛ a ɲiiw ye kɛ? Aw b'a fɛ ka kuma Ala nɔɔ na kɛ?

⁹ Ni Ala ko a b'aw sɛgɛsɛgɛ, o bena ɲa aw fɛ wa? U te se ka Ala namara i ko adamaden.

¹⁰ Siga t'a la, a bena aw jalaki, hali n'o y'a sɔrɔ aw y'a kɛ a ɲii ye.

¹¹ Ala ka boɲa te aw siran wa? A siranya te aw minɛ wa?

¹² Aw ka kuma ye buguri ye, aw ka fɔta be i ko kogo bɔgɔlaman.

¹³ Aw ye je! Aw k'a to ne ka kuma. Fɛɛn min mana n sɔrɔ, o lo.

¹⁴ Ne sɔnna o bɛɛ ma, hali ka n nii saraka yɛrɛ.

¹⁵ N'a ka di Ala ye, a ka ne faga, jigilayɔrɔ te ne fɛ tugu. Ne bena n kunbɔko fɔ a ye.

¹⁶ O yɛrɛ bena ne kunmabɔ, bari mɔgɔkolon te se ka lɔ Ala ɲakɔrɔ do.

¹⁷ Aw ka mɛnni kɛ ne ka fɔta la dɛ. Ne bena kuma min ɲafɔ, aw k'aw tulo malɔ o la kosɔbɛ.

¹⁸ Ne bena n ka koo ɲanabɔ, ne y'a lɔn ko jalakiyɔrɔ te ne la do.

¹⁹ Jɔn le be se ka ne jalakiyɔrɔ yira? N'o kɛra, ne labɛnnin lo ka je ani ka sa.

²⁰ Ala, koo fila dama kɛ ne ye. Ne tena dogo i la tugu.

²¹ E kana ne sɛgɛn tugu, kana ne siran tugu.

²² E ka kuma, ne bena i jaabi, walima ni ne ye dɔ fɔ, e ka ne jaabi.

²³ Ne ye kojugu joli ni fili joli le kɛ? O yira ne la.

²⁴ Mun na e y'i yɛrɛ dogo? I ye ne kɛ i jugu dɔ ye mun na?

²⁵ Fɔɲɔ be taga ni furaburu min ye, i b'o le kɔ wa? I be kala janin le kɔgwɛnna wa?

²⁶ I be koo farimanw le sɛbɛnna ne kama. I be ne ka kanbelenya waati fili sara le doni lara ne kan.

²⁷ I be ne seen siri ni jɔrɔkɔw ye, ka ne ka kɛta bɛɛ kɔlɔsi. I be ne tɛmɛyɔrɔ yɛrɛ jati minɛ.

²⁸ O n'a ta bɛɛ, adamaden bena nagasi i ko lɔgɔ min tolila. A bena kɛ i ko fani, bagabaga ye min dumu.