Ayuba 10 - ALA KA KUMA

¹ «Diɲɛ nigɛ bɔra ne la, o la, ne bena n ka dusukasikuma fɔ. Ne bena kuma nisɔngoya la.

² Ne ben'a fɔ Ala ye ko a kana ne jalaki, ko a ka ne filiyɔrɔ yira n na dɔrɔn.

³ Ka ne tɔɔrɔ, o le ka di e ye wa? K'i ka danfɛn fili, k'a kɛ mɔgɔjugu ka namarako be ɲa, o le ka d'i ye wa?

⁴ E be yeli kɛra i ko adamaden le wa? E be yeli kɛra i ko mɔgɔ le wa?

⁵ E sii be i ko mɔgɔ ta wa? E sanda be i ko adamaden ta wa?

⁶ Mun na i do b'a fɛ ka ne ka fili lɔn? Mun na i do b'a fɛ ka ne wajibiya k'o lɔn?

⁷ E yɛrɛ y'a lɔn ko ne jalakinin tɛ, ne fana te se ka n yɛrɛ bɔsi i bolo.

⁸ Ala, e le ye ne dan ka n labɛn n'i bolo ye, i bolo do b'a fɛ ka ne datugu ka ne halaki sisan.

⁹ I hakili to a la ko e le ye n dilan i ko bɔgɔminan, e do b'a fɛ ka n segi ka kɛ buguri ye kɛ!

¹⁰ Loon dɔ, i ye ne dilan ne baa kɔnɔ i ko nɔnɔ be simi minan kɔnɔ cogo min na.

¹¹ E ye farisogo ni golo di ne ma, e ye kolow ni fasaw di ne ma.

¹² E ye nii don n na ka ɲumanya kɛ n ye, e ka dɛmɛ le y'a to n tora nii na.

¹³ K'a sɔrɔ e be koo dogora ne la. Min tun be e kɔnɔ, ne y'o lɔn.

¹⁴ E b'a fɛ ka ne minɛ kojugu kɛyɔrɔ la. O kɔ, ne ka fili tena yafa.

¹⁵ Ni ne jalakinin lo, bɔnɛ ye ne ta ye. Ni n jalakinin tɛ, n kuun surunnin bena to yen. Maloya ni tɔɔrɔ ye ne labɔ.

¹⁶ Ne mana n kuun kɔrɔta, e be yen, i be tugu n kɔ i ko jara, i be ne halakira n'i ka setigiya ye.

¹⁷ I be wilila ne kama tugu, i ka dimi be boɲana n kama, i be kɛlɛbagaw wili n kama ka tugu ɲɔgɔn kɔ.

¹⁸ Mun na e y'a kɛ ne wolola sa? Mɔgɔ tun tena ne ye, n tun bena sa.

¹⁹ O la, a tun bena kɛ i ko ne ma na diɲɛ na ka ye. N bɔtɔ n baa kɔnɔ dɔrɔn, u tun ka taga ni n ye kaburu la.

²⁰ Ne sii man ca tugu. E ka ne tɔɔrɔ dabila sisan sa, e ka ne to n be lafiɲɛ dɔɔni,

²¹ yanni n be taga, kɔsegi te min na, yɔrɔ min ye dibijugu yɔrɔ ye.

²² O yɔrɔ la, dugugwɛ kɛnɛ yɛrɛ dibinin lo kosɔbɛ, dibijugu ni koo ɲagaminin be yɔrɔ min na, yeelen be i ko dibi yɔrɔ min na.»