Ayuba 1 - ALA KA KUMA

Zɔbu ka tɔɔrɔ fɔlɔ

¹ Cɛɛ dɔ tun be Usi jamana na, a tɔgɔ ko Zɔbu. A tun kɛra mɔgɔɲuman ye, a tilennin tun lo. A tun be siran Ala ɲa. A tun te sɔn kojugu ma.

² A tun ye dencɛ wolonwula sɔrɔ, ni denmuso saba.

³ Saga waa wolonwula (7 000) tun b'a fɛ, ni ɲɔgɔmɛ waa saba (3 000), ni sɛnɛkɛmisi waa kelen (1 000), ni fali kɛmɛ duuru. A ka baaradenw tun ka ca kosɔbɛ. Mɔgɔba tun lo ka tɛmɛ kɔrɔn fɛ mɔgɔw bɛɛ kan.

⁴ A dencɛ nunu tun be to ka taga bɔ ɲɔgɔn ka soo ka ɲanagwɛ kɛ. U tun be to k'u balimamuso mɔgɔ saba nunu wele, janko ka se ka dumuni kɛ ani ka minni kɛ n'u ye.

⁵ Tuma o tuma, n'u ka ɲanagwɛ banna, Zɔbu tun be to k'a ka deen nunu wele k'u saniya. A tun be to ka wili sɔgɔma joona ka saraka jɛnita bɔ u kelen kelen bɛɛ tɔgɔ la. Bari Zɔbu tun be to k'a fɔ ko n'a sɔrɔ a deenw ye kojugu kɛ ka miiriyajugu ta Ala faan fɛ. Zɔbu tun be to k'o le kɛ tuma bɛɛ.

⁶ Loon dɔ, mɛlɛkɛw nana Masaba fɛ, Sutana fana nana don u cɛma.

⁷ Masaba y'a ɲininga ko: «E bɔra min?» Sutana y'a jaabi ko: «N bɔra diɲɛ yaalayɔrɔ, ne munumununa yen.»

⁸ Masaba y'a fɔ Sutana ye ko: «E ye ne ka baarakɛla Zɔbu ye wa? A ɲɔgɔn te dugukolo kan. Mɔgɔɲuman lo, a tilennin be. A be siran ne Ala ɲa, a te sɔn kojugu ma.»

⁹ Sutana y'a fɔ Ala ye ko: «I be miiri ko Zɔbu be siran i ɲa gwansan le wa?

¹⁰ E m'a lamini i ko kogo k'a tanga, n'a ka somɔgɔw an'a bololafɛnw bɛɛ ye wa? E y'a dɛmɛ a ka baara la, a ka begɛnw be jamana yɔrɔ bɛɛ.

¹¹ E k'a bololafɛnw bɛɛ cɛn k'a filɛ sa! Ne lanin b'a la ko a bena e nɛni.»

¹² Masaba y'a fɔ Sutana ye ko: «Ayiwa, a bololafɛnw bɛɛ b'i bolo, nga i kana maga a yɛrɛ la.» O la, Sutana bɔra Masaba kɔrɔ.

¹³ Loon dɔ, Zɔbu dencɛw n'a denmusow tun be dumuni kɛra ani ka duvɛn min u bɛɛ kɔrɔ ka soo.

¹⁴ Mɔgɔ dɔ nana Zɔbu fɛ k'a fɔ a ye ko: «Ka misiw to sɛnɛ na, ani faliw tun be ɲimini kɛra u gɛrɛfɛ,

¹⁵ Sabakaw dɔw nana ben u kan k'u minɛ, ani k'i ka baaradenw faga ni murujan ye. Ne kelen le sera ka boli, ko n ben'a fɔ i ye.»

¹⁶ K'ale to kuma na, dɔ wɛrɛ nan'a fɔ ko: «Sanpɛrɛn jigira ka sagaw n'i ka baaradenw jɛni, k'u mugumugu. Ne kelen le sera ka boli, ko n ben'a fɔ i ye.»

¹⁷ K'a le to kuma na, mɔgɔ wɛrɛ nan'a fɔ ko: «Kalidekaw jɛnkulu saba nana girin ɲɔgɔmɛw kan k'u minɛ, k'i ka baaradenw faga ni murujan ye. Ne kelen le sera ka boli, ko n ben'a fɔ i ye.»

¹⁸ K'ale fana to kuma na, mɔgɔ wɛrɛ nan'a fɔ ko: «E dencɛw n'i denmusow tun be dumuni kɛra ani ka duvɛn min u bɛɛ la kɔrɔ ka soo,

¹⁹ fɔɲɔba dɔ bɔra kongokolon faan fɛ ka na soo nin gosi, a benna u kan, u sara. Ne kelen le sera ka boli ka bɔ, ko n ben'a fɔ i ye.»

²⁰ O la, Zɔbu wilila k'a ka fani faran dusukasi bolo, k'a kuun li, k'a kunbiri gwan

²¹ k'a fɔ Ala ye ko: «Ne bolo lakolon le wolola, ne fana bena segi ka taga ten. Masaba le y'u di, Masaba le y'u minɛ. A tɔgɔ ka tanu.»

²² O n'a ta bɛɛ, Zɔbu ma kojugu kɛ, a fana ma baga Ala ma foyi la.