Abidiyasi 1 - ALA KA KUMA

Edɔmuw halakiko

¹ Abudiyasi ka yelifɛn filɛ nin ye: Matigi, Masaba be edɔmuw koo fɔra. Masaba y'a ka ciden ci siyaw fɛ. An y'a ka kuma mɛn, a ko: «Aw ye wili ka taga siya nin kama k'a kɛlɛ!» Masaba ko edɔmuw ma:

² «Ne bena aw barika ban siyaw cɛma. Aw lɔgɔ bena bɔ kojugu!

³ Aw ka yɛrɛboɲa y'aw ɲagami. Aw minw siginin be farawow kɔnɔ, aw minw siginin be kuluw kan, aw minw b'a fɔra aw yɛrɛ kɔnɔ ko: ‹Jɔn le be se k'anw jigi duguma?›

⁴ Hali n'aw panna sanfɛ i ko sɛgɛn, hali n'aw tagara aw ka ɲaga la lolow cɛma, n bena aw porokoto ka jigi duguma.» Masaba le ko ten.

⁵ «Ni soonw donna i ka soo sufɛ, walima benkannikɛlaw, u makoya be fɛɛn minw na, u tena olu le ta wa? Ni sumantigɛlaw nana i ka foro la, u bena mun le to yen ni fɛfɛta tɛ? Nga aw bena halaki pewu!

⁶ Unhun, Ezawu kɔmɔgɔw! Aw ka soow fonna, aw ka nafolo dogoninw bɔra kɛnɛ kan.

⁷ U bena aw gwɛn ka bɔ aw ka jamana na. Aw jɛnɲɔgɔnw bɛɛ bena aw janfa. Aw teriw bena se aw kɔrɔ. Aw dumunikɛɲɔgɔnw bena jaan la aw ɲa, ko hakili t'aw fɛ!»

⁸ Masaba ko: «O loon yɛrɛ la, ne bena lɔnnikɛlaw tunu ka bɔ Edɔmu kɔnɔ, ne bena hakilitigiw tunu ka bɔ o mara kulu kunna.

⁹ Temankaw, aw ka kɛlɛdenw hakili bena ɲagami siranyakojugu fɛ, fɔɔ mɔgɔw bɛɛ bena faga ka bɔ aw ka mara kulu kan.

Edɔmuw filiyɔrɔ

¹⁰ «Aw ye juguya min kɛ aw balima Yakuba kɔmɔgɔw la, o kama, maloya bena se aw ma. Aw bena halaki pewu!

¹¹ Loon min na u juguw sera u kɔrɔ, aw tun be yen. Loon min na lonanw donna u ka dugu kɔnɔ ka Zeruzalɛmu nafolo tilan, aw fana tun be i ko olu dɔ.

¹² Aw tun man kan k'aw badenw filɛ ni nisɔndiya ye u ka sigɛnlon na. Aw tun man kan ka nisɔndiya Zuda mara halakilon na. Aw tun man kan ka dabayakuma fɔ kojugu loon na.

¹³ Aw seen tun man kan ka don ne ka mɔgɔw ka dugu kɔnɔ u halakilon na. Aw tun man kan k'u filɛ ni nisɔndiya ye u ka bɔnɛko la u halakilon na. Aw tun man kan ka maga u ka nafolo si la u halakilon na.

¹⁴ Aw tun man kan ka taga lɔ sirakun na k'u ka bolibagaw faga. U ka mɔgɔ minw sera ka kisi, aw tun man kan k'olu don u juguw bolo u tɔɔrɔlon na.

¹⁵ Tiɲɛ na, Masaba ka loon surunyana, siyaw bɛɛ ɲagwan kama. Aw ye min kɛ, o ɲɔgɔn le bena segi aw ma. Aw ka kɛta ɲɔgɔn le bena kɛ aw la.»

Isirayɛli mɔnɛ bena bɔ

¹⁶ Masaba ko: «Aw Isirayɛlidenw ye tɔɔrɔ min sɔrɔ ne ka kulu senuman kan ne ka dimi fɛ, siyaw bɛɛ bena o tɔɔrɔ ɲɔgɔn sɔrɔ kudayi. U bena tɔɔrɔ kosɔbɛ. U bena tunu pewu!

¹⁷ Mɔgɔ minw sera ka kisi, olu bena to *Siyɔn kulu kan. O yɔrɔ bena kɛ ne ka yɔrɔ ye. Yakuba kɔmɔgɔw bena u ka jamana sɔrɔ tugu.

¹⁸ Yakuba n'a deen Yusufu kɔmɔgɔw bena kɛ i ko tasuma, edɔmuw bena kɛ i ko kala, nunu bena u jɛni. Hali mɔgɔ kelen tena kisi edɔmuw na.» Masaba le ko ten.

Isirayɛli sigicogokura

¹⁹ Edɔmuw ka mara bena kɛ Zuda kɔmɔgɔw worodugu ɲafan fɛ mɔgɔw ta ye. Minw siginin be kulujukɔrɔ mara la, filisiw ka dugukolo bena kɛ olu ta ye. Efarayimu ka dugukolo ni Samari ta bena kɛ u ta ye fana. Galaadi mara bena kɛ Bɛnzamɛn kɔmɔgɔw ta ye.

²⁰ Isirayɛli mara mɔgɔ minw tun minɛna ka taga jamana wɛrɛ la, o kɛlɛbolo nin ta bena kɛ Kanaan dugukolo ye fɔɔ ka ta'a bila Sarɛpita dugu la. Zeruzalɛmuka minw tun minɛna ka taga Sefaradi, dugu minw be worodugu ɲafan fɛ bena kɛ olu ta ye.

²¹ Sesɔrɔbagaw bena yɛlɛ *Siyɔn kulu kunna ka edɔmuw ka mara kiti. Masaya bena kɛ Masaba ta ye!