Tim fɔlɔ 5 - ALA KA KUMA

Mɔgɔkɔrɔba minɛcogo

¹ N'i be cɛkɔrɔba ladi tuma min na, i kana kuma gwɛlɛman fɔ a ye. Nga i k'a ladi i n'a fɔ i faa. I ka kanbelenw ladi i n'a fɔ i kɔrɔw, walima i dɔgɔw.

² Muso minw kɔrɔla, i ka olu ladi i n'a fɔ i bamusow, muso minw ma kɔrɔ, ka olu ladi i n'a fɔ i kɔrɔmusow, walima i dɔgɔmusow, cogo bɛnnin na.

Ladili, firiyamusow ka koo la

³ Mɔgɔ te firiyamuso minw fɛ, i ka olu minɛ ni boɲa ye.

⁴ Nga ni deenw, walima mamadenw be firiyamuso min fɛ, o deen nunu le ka kan k'a dɛmɛ u ka Alaɲasiran kosɔn. O la, u ben'a yira u wolobagaw la k'olu le ka kan ka lɔ n'u ka koo ye, bari o le ka di Ala ye.

⁵ Min kɛra firiyamuso ye sɔbɛ la, mɔgɔ te a fɛ ka janto a la, ale b'a jigi bɛɛ la Ala kan. A be Ala daali ka dɛmɛ ɲini suu fara tile kan.

⁶ Nga firiyamuso min be miiri farisogo nisɔndiya dama la, ale sara ka ban hali k'a to nii na.

⁷ I ka kan ka min fɔ u ye waasa u ka se ka to jalakibali ye, o filɛ nin ye.

⁸ Mɔgɔ o mɔgɔ te janto a ka somɔgɔw la, o tigi banna lanaya la. Mɔgɔ min ma la Ala la, ale yɛrɛ ka fisa n'a ye.

⁹ I ka kan ka firiyamuso min jati k'a fara firiyamusow kan k'a tɔgɔ sɛbɛn, ale ka kan ka saan bi wɔɔrɔ ɲɔgɔn sɔrɔ, ani a ka kɛ muso ye min tun furula cɛɛ kelen dama fɛ.

¹⁰ Ani a tɔgɔɲuman ka fɔ a ka kɛwaliɲuman kosɔn, a ka kɛ muso ye min y'a deenw lamɔ ka ɲa, ka kɛ lonan ladonbaga ye. A ka kɛ Ala ka mɔgɔw dɛmɛbaga ye. A ka kɛ mɔgɔ ye min y'a hakili to dɛsɛbagatɔw la k'u dɛmɛ, ani ka kɛwaliɲuman sifa bɛɛ kɛ.

¹¹ Nga firiyamuso minw ma kɔrɔ fɔlɔ, i ka ban olu la, bari ni cɛko y'u minɛ tuma min na, u te Krista ka koo jati tugu, u b'a fɔ k'u be furu.

¹² Ani u b'u yɛrɛ bila jalaki la, bari u y'u ka dadili fɔlɔ cɛn.

¹³ Ani ka fara o kan, u be kɛ salabagatɔw ye, ka to ka yaalayaala sodaw la. O dama tɛ, u daa ka ca, u daa be don mɔgɔ ka koow la, u man kan k'u daa don minw na.

¹⁴ O le y'a to, ne b'a fɔ firiyamusow ye, minw ma kɔrɔ, k'u ka furu ka deenw sɔrɔ ani u ka janto u ka somɔgɔw la, waasa u kana yɔrɔ di an jugu ma a ka se ka kumajugu fɔ an koo la,

¹⁵ bari firiyamuso dɔw ye siraɲuman bila, ka tugu Sutana kɔ.

¹⁶ Muso min lara Yezu la, n'a kɛra ko firiyamusow be ale ka mɔgɔw cɛma, ale yɛrɛ k'a janto olu la, a kana u to u ka kɛ Krista ka jama kunnadoni ye waasa olu ka se ka firiyamusow dɛmɛ, mɔgɔ te minw fɛ.

Ladili, Krista ka jama ɲamɔgɔw ka koo la

¹⁷ Krista ka jama ɲamɔgɔ minw b'u ka baara kɛ ka ɲa, olu ka kan ni boɲa ye kosɔbɛ, janko minw be waajuli kɛ ani minw be mɔgɔw kalan.

¹⁸ Bari a fɔra Ala ka kuma na ko: «Ni misi be suman gosira, kan'a daa siri,» ani «Baarakɛla ka kan n'a ka sara ye.»

¹⁹ I kana sɔn ka Krista ka jama ɲamɔgɔ jalaki, n'i m'a ka koo kɛnin mɛn seere fila, walima mɔgɔ saba daa la.

²⁰ Ni mɔgɔ min ye hakɛ kɛ, i k'o tigi jalaki mɔgɔ bɛɛ ɲana waasa ni tɔɔ nunu y'o ye, olu be siran.

²¹ Ne b'i daali Ala ni Yezu Krista ɲana, ani mɛlɛkɛw, ko i ka koo nunu bɛɛ kɛ, i kana mɔgɔ bɔ mɔgɔ la.

²² I kana teliya k'i bolo la mɔgɔ si kan, k'o tigi don Ala ka baara la. I kana jɛn ni mɔgɔ si ye ka hakɛ kɛ. Ele ka to k'i yɛrɛ saniya.

²³ I kana to ka jii dama min tugu, i ka to ka duvɛn min dɔɔni dɔɔni i ka kɔnɔdimimisɛnw n'i ka banamisɛnw kosɔn.

²⁴ Mɔgɔ dɔ ka hakɛ be lɔn sanni kiti ka tigɛ, nga dɔw ta be lɔn kɔfɛ le.

²⁵ Kɛwaliɲuman fana be ye joona, hali minw yeli ka gwɛlɛ, u si te se ka to dogo la.