Tim fɔlɔ 2 - ALA KA KUMA

Ala daaliko

¹ Ne fɛ, ne be fɛɛn fɔlɔ min ɲini mɔgɔw fɛ, o ye nin ye: ko u ka Ala daali ni daalili sifa bɛɛ ye, ani ka barika la Ala ye mɔgɔ bɛɛ kosɔn,

² ka daalili kɛ masaw ni fangatigiw ye, waasa an ka se ka to ɲasuma ni hɛrɛ la, ka se ka kɛ mɔgɔsɔbɛw ye Ala ni mɔgɔw ɲana.

³ O le ka ɲi, an'a ka di an Kisibaga Ala ye,

⁴ ale min b'a fɛ mɔgɔ bɛɛ ka kisi ani ka se ka tiɲɛ lɔn.

⁵ Bari Ala kelen le be yen, ani soronanikɛla kelen dama le be yen Ala ni mɔgɔw cɛ. O ye Yezu Krista ye, min ye mɔgɔ ye.

⁶ A y'a yɛrɛ saraka mɔgɔ bɛɛ kunmabɔli kosɔn. Ala y'o yira waati latigɛnin na.

⁷ O le kosɔn, ne welela ka kɛ ciden ani waajulikɛla ye, ka siya wɛrɛw kalan u ka la Yezu la, ani ka tiɲɛ lɔn. Ne be tiɲɛ le fɔra, ne te galon tigɛra.

Pɔli be cɛɛ ni musow ladi

⁸ O la, ne b'a fɛ cɛɛw ka Ala daali yɔrɔ bɛɛ, k'u bolo kɔrɔta sanfɛ ka Ala daali ni dusugwɛ ye, dimi ni sɔsɔli kana sɔrɔ u kɔnɔ.

⁹ O cogo kelen na fana, ne b'a ɲini musow fɛ ko u k'u yɛrɛ masiri cogo bɛnnin na, ka fani don minw b'u sutura. O ɲaji kana caya u ka masirifɛnw la, i n'a fɔ u kunsigi labɛncogo, walima ka sanu don, ani kɔnɔkisɛ ani fani sɔngɔgwɛlɛnw.

¹⁰ Nga u ka masirifɛnw ka kɛ koɲuman kɛli ye, i n'a fɔ a bɛnnin be musow fɛ cogo min na olu minw ko u be siran Ala ɲa.

¹¹ Musow ka kan k'u yɛrɛ majigi ka je ka mɛnni kɛ kalan na.

¹² Ne te sira di muso ma ka mɔgɔw kalan, walima ka kuntigiya kɛ cɛɛ kan, a ka kan ka je,

¹³ bari Adama le kɔnna ka dan fɔlɔ, o kɔfɛ, Awa sɔrɔla ka dan.

¹⁴ Adama fana ma kɔn ka sɔn nigɛli ma, nga muso le kɔnna ka sɔn a ma ka ban Ala ka fɔta ma.

¹⁵ O bɛɛ n'a ta, muso bena kisi a ka denwolo kosɔn, n'a jigi tora Ala kan, ka to kanuya la, ani k'a taamacogo bɛn Ala sago ma.