Tes fɔlɔ 5 - ALA KA KUMA

Matigi ka nako

¹ N balimaw, o koo nunu bena kɛ waati min na, aw mako t'a la an ka sɛbɛ ci aw ma o la.

² Aw yɛrɛ b'a lɔn sɛbɛ la ko Matigi bena na loon min na, o bena bali mɔgɔw la i ko soon be na sufɛ cogo min na.

³ Tuma min na mɔgɔw ben'a fɔ ko hɛrɛ ni jigisigi be yen, o tuma na, tɔɔrɔ bena ben u kan fɔɔ u te se ka bɔyɔrɔ sɔrɔ, i n'a fɔ muso ka tiin be cun a kan cogo min na.

⁴ Nga n balimaw, aw te dibilamɔgɔw ye, n'o loon be na bali aw la i n'a fɔ soon.

⁵ Aw bɛɛ ye yeelen mɔgɔw ye, kɛnɛ kan mɔgɔw. An te dibilamɔgɔw ye.

⁶ O la, an man kan ka sinɔgɔ i n'a fɔ mɔgɔ tɔɔ nunu. An k'an yɛrɛ kɔlɔsi an labɛnnin ka to ɲana tuma bɛɛ,

⁷ bari mɔgɔ be sinɔgɔ sufɛ le, dɔrɔtɔw fana b'u ka dɔrɔtɔya kɛ sufɛ le.

⁸ Nga an minw ye kɛnɛ kan mɔgɔw ye, an k'an yɛrɛ labɛn, ka jigi ni kanuya kɛ i n'a fɔ nigɛkunbɛnnan, k'o don an kaan na, ani k'an jigi la an ka kisili kan i n'a fɔ nigɛfugulan.

⁹ Bari Ala m'a latigɛ ko a ka dimi ka se an ma, nga a y'a latigɛ ko an ka kisi an Matigi Yezu Krista barika la le,

¹⁰ ale min sara an kosɔn, janko k'an to nii la, walima n'an sara, an ka se ka to n'ale ye.

¹¹ O la aw ka ɲɔgɔn jigi tugu, ani ka ɲɔgɔn dɛmɛ, i n'a fɔ aw b'a kɛra ka ban cogo min na.

Pɔli ka ladili laban

¹² N balimaw, mɔgɔ minw b'aw ɲafɛ Matigi ka sira la, n'u be jija k'aw ladi, an b'aw daali ko aw ka olu jati kosɔbɛ.

¹³ Aw k'u koo diya aw ye, k'u boɲa kosɔbɛ, u ka baara kosɔn. Hɛrɛ ka to aw ni ɲɔgɔn cɛ.

¹⁴ An b'a ɲini aw fɛ n balimaw, ko aw ka mɔgɔkolonw ladi, ka siranbagatɔw jaa gwɛlɛya, ka barikatanw dɛmɛ, ani ka muɲu bɛɛ kɔrɔ.

¹⁵ Aw k'aw yɛrɛ kɔlɔsi, aw la mɔgɔ si kana kojugu juru sara ni juguya ye, aw ka koɲuman kɛ tuma bɛɛ ɲɔgɔn ye ani tɔw ye.

¹⁶ Aw ka nisɔndiya tuma bɛɛ.

¹⁷ Aw kana Aladali dabila.

¹⁸ Koo bɛɛ la, aw ka barika la Ala ye, bari o le ye Ala sago ye aw faan fɛ, k'aw to Yezu Krista ka jɛnɲɔgɔnya la.

¹⁹ Aw kana Nii Senuman ka baara bali.

²⁰ Aw kana kirayakuma lɔgɔbɔ.

²¹ Nga aw ka koo bɛɛ sɛgɛsɛgɛ, koo minw ka ɲi aw ka sɔn olu ma.

²² Aw k'aw yɛrɛ kɔlɔsi kojugu sifa bɛɛ ma.

Foli laban

²³ Hɛrɛtigi Ala yɛrɛ k'aw kɛ mɔgɔ senumanw ye, juguya si kana sɔrɔ aw la, aw farisogo faan fɛ, n'aw dusu, ani aw hakili la, a k'aw bɛɛ mara jalakiyɔrɔ kana sɔrɔ aw la an Matigi Yezu Krista nalon na.

²⁴ Ala min y'aw wele, ale ye kantigi ye, ale lo bena o kɛ.

²⁵ N balimaw, aw ka to ka Ala daali an ye.

²⁶ Aw ka balimaw bɛɛ fo kosɔbɛ ni kɔnɔgwɛ ye.

²⁷ Ne b'a ɲini aw fɛ kosɔbɛ Matigi tɔgɔ la ko bataki nin ka kalan balimaw bɛɛ ɲana.

²⁸ An Matigi Yezu Krista ka nɛɛma kɛ aw ye.