Sam fɔlɔ 5 - ALA KA KUMA

Ala ka layidu taamasiɲɛ kɛsu be filisiw fɛ

¹ Filisiw ye Ala ka layidu taamasiɲɛ kɛsu minɛ tuma min na, u y'a ta Ebɛnezɛri ka taga n'a ye Asidɔdi.

² O kɔ, joo min tɔgɔ ko Dagɔn, u y'a ta ka ta'a bila ale ka soo kɔnɔ joo nin gɛrɛfɛ.

³ O dugusagwɛ, Asidɔdikaw wilila sɔgɔmada joona k'a sɔrɔ Dagɔn tun bennin be duguma, Masaba ka layidu taamasiɲɛ kɛsu ɲafɛ. U y'a ta k'a bila a nɔɔ na yen.

⁴ Dugusagwɛ tugu, u wilila sɔgɔmada joona ka Dagɔn nin bennin ye duguma, Masaba ka layidu taamasiɲɛ kɛsu ɲafɛ. A kuun n'a bolow tun kari la ka taga ben soo daa la, a tun tora a juu dama.

⁵ O le y'a to, fɔɔ ka na se bii ma, Dagɔn murutigiw ani mɔgɔ minw be don Dagɔn ka soo kɔnɔ Asidɔdi, olu te sɔn k'u seen la a ka soo daa la.

⁶ Masaba y'a bolo barikaman la Asidɔdikaw kan, ka cɛnniba kɛ u fɛ. A y'u tɔɔrɔ ni kookoo ye, Asidɔdi dugu kɔnɔ n'a lamini na.

⁷ Asidɔdikaw y'o ye tuma min na, u y'a fɔ ko Isirayɛlidenw ka Ala ka layidu taamasiɲɛ kɛsu tena to olu fɛ, ko bari a y'a bolo barikaman la olu, n'u ka joo Dagɔn kan.

⁸ U ye filisiw ka ɲamɔgɔw bɛɛ wele k'u lajɛn u fɛ yen, k'u ɲininga ko: «An ka kan ka mun le kɛ ni Isirayɛlidenw ka Ala ka layidu taamasiɲɛ kɛsu ye?» Ɲamɔgɔ nunu y'u jaabi ko u ka kɛsu nin ta ka taga n'a ye Gati. U y'a ta ka taga n'a ye o yɔrɔ la.

⁹ U y'a ta ka taga n'a ye ka ban tuma min na, Masaba y'a bolo la o dugumɔgɔw kan fana, fɔɔ u jigi tigɛra kosɔbɛ. A ye dugumɔgɔw tɔɔrɔ ni kookoo ye, a mɔgɔkɔrɔba fara denmisɛn kan.

¹⁰ O la, u y'a bila ka taga Ekurɔn. A sera Ekurɔn dɔrɔn, o yɔrɔ mɔgɔw ko: «U nana ni Isirayɛlidenw ka Ala ka layidu taamasiɲɛ kɛsu ye an fɛ, janko k'an faga, an n'an ka jama.»

¹¹ U ye filisiw ka ɲamɔgɔw bɛɛ wele k'a fɔ ko: «Aw ka Isirayɛlidenw ka Ala ka layidu taamasiɲɛ kɛsu nin bila, a ka kɔsegi ka ta'a yɔrɔkɔrɔ la, janko a kana an n'an ka jama faga.» Bari mɔgɔw tun sara fɔɔ bɛɛ jigi tigɛra. Sabu Ala tun y'a bolo barikaman la u kan kosɔbɛ.

¹² Mɔgɔ minw tun ma sa, kookoo tun ye olu minɛ. A kɛra ten, dugu mɔgɔw kulekan bɔra fɔɔ ka se sankolo la.