Sam fɔlɔ 25 - ALA KA KUMA

Nabali be ban ka Dawuda dɛmɛ

¹ Samuyɛli sara. Isirayɛlidenw bɛɛ ye ɲɔgɔn lajɛn k'a suu koɲa kɛ, k'a suu don a ka soo Arama. O tuma na, Dawuda wilila ka taga Paran mara kongokolon kɔnɔ.

² Cɛɛ dɔ tun be Maŋɔn dugu kɔnɔ, baara dɔ tun b'a fɛ Karimɛli, nafolo tun b'a fɛ kosɔbɛ, saga waa saba ni baa waa kelen tun b'a fɛ. A tun tagara Karimɛli janko a k'a ka sagaw sii tigɛ.

³ Cɛɛ nin tɔgɔ tun ko Nabali, a muso tɔgɔ ko Abigayɛli. Muso nin tun ye hakilitigi ye, a fana tun cɛɛ ka ɲi, nga a cɛɛ ka koo tun ka gwɛlɛ, a tun ka jugu. Kalɛbu kɔmɔgɔ tun lo.

⁴ Ka Dawuda to kongokolon kɔnɔ, a y'a mɛn ko Nabali b'a ka sagaw sii tigɛra.

⁵ A ye kanbelen mɔgɔ tan ci a fɛ, k'a fɔ u ye ko: «Aw ka taga Karimɛli, ka Nabali fo n ye.

⁶ Aw k'a fɔ a ye ko Ala ka sii d'a ma, ka hɛrɛ kɛ a n'a ka somɔgɔw, n'a bololafɛnw bɛɛ ye.

⁷ Sisan ko ne ko ne y'a mɛn ko a ka sagaw sii tigɛwaati sera. Ko a ka sagadɛndɛbagaw do tun be n'anw ye, an ma kojugu kɛ u la, u ka fɛɛn si fana ma tunu kabini an be n'u ye Karimɛli.

⁸ Ko a yɛrɛ k'a ka baaradenw ɲininga, u ben'a fɔ a ye. Ko ne ko a ka n ka kanbelen nunu minɛ ka ɲa, bari u nan'a fɛ lonba la. Ko ne ko a ka sabali, fɛɛn min be sɔrɔ a bolo kɔrɔ, a ka o dɔ di a ka baaradenw n'a dencɛ Dawuda ma.»

⁹ Dawuda ka ciden nunu sera tuma min na, u ye Dawuda ka kuma nunu bɛɛ fɔ ka ban Nabali ye, u jera.

¹⁰ Nabali y'a fɔ Dawuda ka baaradenw ye ko: «Dawuda ye jɔn ye? Zese dencɛ ye jɔn ye? Bii nin na baaraden caaman be boli ka bɔ u kuntigiw fɛ.

¹¹ Ne ka ne ka dumuni ni ne ka jii, ani ne ye begɛn minw faga ne ka saga sii tigɛbagaw ye ta k'o di mɔgɔw ma n te minw bɔyɔrɔ lɔn wa?»

¹² Dawuda kɔmɔgɔw segira ka taga o kuma bɛɛ fɔ Dawuda ye.

¹³ O la, Dawuda y'a fɔ a kɔmɔgɔw ye ko u kelen kelen bɛɛ k'u ka murujanjanw siri u cɛɛ la. U y'o kɛ, Dawuda fana y'a ta siri. Mɔgɔ kɛmɛ naani ɲɔgɔn le tugura Dawuda kɔ. Mɔgɔ kɛmɛ fila tora u ka minanw kɔrɔ.

Abigayɛli be Dawuda dɛmɛ

¹⁴ Nabali ka baaraden dɔ y'a fɔ a muso Abigayɛli ye ko: «Dawuda ye mɔgɔ dɔw ci ka bɔ kongokolon kɔnɔ ka na an kuntigi fo. An kuntigi ma kumaɲuman fɔ u ye.

¹⁵ Nga o mɔgɔ nunu y'an minɛ ka ɲa. K'an to kongokolon kɔnɔ n'u ye, an ye waati min bɛɛ kɛ yen, u ma kojugu si kɛ an na, an ka fɛɛn si ma tunu fana.

¹⁶ An ye waati min bɛɛ kɛ n'u ye k'an to an ka sagaw dɛndɛ la, suu fara tile kan olu le tun kɛra i n'a fɔ kogo k'an lamini.

¹⁷ Sisan i ka miiri o la, i ka kan ka fɛɛn min kɛ, i k'o filɛ. N'o tɛ, an kuntigi n'a ka somɔgɔw bɛɛ halakituma le sera. Ale do ye mɔgɔkolon ye, a te mɔgɔ ka kuma mɛn.»

¹⁸ Abigayɛli teliyara ka burukun kɛmɛ fila ni duvɛnforoko fila ta, ani saga duuru sogo tobinin ni suman yirannin sinsin duuru, ni *ɛrɛzɛnjanin bɔɔrɔmisɛnw kɛmɛ, ani gato minw dilanna ni torojanin ye, olu kɛmɛ fila, k'o la faliw kan,

¹⁹ k'a fɔ a ka baaradenw ye k'olu ka bila ale ɲa, ko ale be na kɔfɛ. Nga a ma foyi fɔ a cɛɛ Nabali ye.

²⁰ A yɛlɛla fali dɔ kan ka sira minɛ n'a be jigira kulu furancɛ la. O y'a sɔrɔ Dawuda n'a kɔmɔgɔw fana tun be jigira kulu dɔ kan a ɲafɛ, fɔɔ u tagara ɲɔgɔn kunbɛn.

²¹ Dawuda tun y'a fɔ ka ban ko ale ye cɛɛ nin ka bololafɛnw kɔlɔsi kongokolon kɔnɔ gwansan, fɔɔ foyi ma tunu u la, ko a ye ale ka koɲuman sara ni kojugu ye.

²² A ko ni dugu gwɛra k'a sɔrɔ ale ye Nabali n'a somɔgɔw dɔ to yen, ko Ala kana ale to.

²³ Abigayɛli ye Dawuda ye tuma min na dɔrɔn, a jigira joona joona a ka fali kan k'a ɲaa biri duguma k'a kunbiri gwan Dawuda ɲakɔrɔ,

²⁴ k'a fɔ a ye ko: «Ne matigi, a cɛnna ne le fɛ! Sabali ka mɛnni kɛ i ka baaraden darakan na fɔlɔ.

²⁵ Ne matigi, kana mɔgɔkolon Nabali filɛ. A tɔgɔ be cogo min na, a yɛrɛ fana be ten. A tɔgɔ ye Naloman ye, a fana be to a ka nalomanya la. Ne matigi tun ye mɔgɔ minw ci, ne, i ka baaraden, tun ma olu ye.

²⁶ Ne matigi, Masaba kosɔn, n'i yɛrɛ kosɔn, Masaba yɛrɛ le y'i bali ka mɔgɔ faga ani k'i yɛrɛ mɔnɛ bɔ i yɛrɛ ka fanga barika la. I jugu minw b'a fɛ ka kojugu kɛ i la, fɛɛn min be Nabali sɔrɔ, o ɲɔgɔn k'olu fana sɔrɔ.

²⁷ Sisan i ka baaraden nana i fɛ ni fɛɛn minw ye, i ka olu minɛ k'u di i kɔmɔgɔw ma.

²⁸ Ne b'i daali ko i k'i ka baaraden ka hakɛ yafa. Tiɲɛ na, Masaba bena barika don ne matigi n'a somɔgɔw ka masaya la, bari a be kɛlɛ kɛra Masaba ye. A fana ma kojugu si kɛ a sii bɛɛ la.

²⁹ Ni mɔgɔ dɔ wilila ka tugu ne matigi kɔ ko u b'a faga, Masaba i ka Ala bena i mara, k'i jugu nunu nii bɔ i n'a fɔ kabakuru min bonna ni bɛrɛbonnan ye.

³⁰ Masaba y'a fɔ ko a bena koɲuman min bɛɛ kɛ i ye, waati min na a bena o bɛɛ kɛ, k'i kɛ Isirayɛlidenw ka masacɛ ye,

³¹ n matigi ten'a fɔ ko n'i tun y'a lɔn, i tun tena mɔgɔ faga gwansan janko k'i yɛrɛ mɔnɛ bɔ. Ni Masaba nana koɲuman kɛ ne matigi ye tuma min na, ne b'i daali ko i k'i hakili to ne, i ka baaraden na.»

Nabali ka sayako

³² Dawuda y'a fɔ Abigayɛli ye ko: «Masaba, Isirayɛli ka Ala barika, ale min ye i ci ka na ne kunbɛn bii nin na.

³³ Ne be ele fo fana i ka hakilitigiya kosɔn, e min kɛra sababu ye bii ne ma se ka mɔgɔ faga janko ka n yɛrɛ mɔnɛ bɔ.

³⁴ Nga Masaba, Isirayɛli ka Ala kosɔn, ale min barika la ne ma se ka kojugu kɛ i la, n'i tun ma teliya ka se ne fɛ, yanni dugu ka gwɛ, foyi si tun tena to Nabali ka somɔgɔw cɛmanw la.»

³⁵ Abigayɛli tun nana ni fɛɛn minw ye k'u di Dawuda ma, a y'o minɛ k'a fɔ a ye ko: «I ka taga i ka soo hɛrɛ la. Ne y'i ka kuma mɛn ani ka sɔn i ma cogo min na, i yɛrɛ y'o ye.»

³⁶ Abigayɛli kɔsegira Nabali fɛ, o y'a sɔrɔ Nabali tun be dumuniba kɛra soo kɔnɔ i n'a fɔ masacɛ. A nisɔn tun diyanin be kosɔbɛ, a fanin tun be dɔrɔ la. Abigayɛli ma foyi fɔ a ye fɔɔ dugu gwɛra.

³⁷ Sɔgɔmadafɛ, a ka duvɛn bɔr'a ɲaa na tuma min na, Abigayɛli ye koo nin fɔ a ye. O yɔrɔnin kelen, a dusukun tigɛra, a kɛra i n'a fɔ kabakuru.

³⁸ Tile tan ɲɔgɔn tɛmɛnin kɔ, Masaba ye Nabali faga.

³⁹ Dawuda y'a mɛn ko Nabali sara. A y'a fɔ ko: «Ne be barika la Masaba ye kosɔbɛ, ale min ye ne bali Nabali ka kɛwalijugu tuma na, ne ma kojugu kɛ. A y'a kɛ Nabali ka juguya benn'a yɛrɛ kunna.» O kɔ, Dawuda ye mɔgɔw bila ka ta'a fɔ Abigayɛli ye ko ale b'a fɛ a ka kɛ a muso ye.

⁴⁰ Dawuda ka baaradenw sera Karimɛli, Abigayɛli fɛ k'a fɔ a ye ko: «Dawuda ko ale b'i fɛ, i ka kɛ a muso ye.»

⁴¹ A wilila k'a ɲaa biri duguma k'a kunbiri gwan k'a fɔ ko: «I ka baaraden bena kɛ i ka jɔnmuso ye ka to k'a matigi ka baaradenw seen ko.»

⁴² Abigayɛli teliyara ka yɛlɛ fali dɔ kan, ka tugu Dawuda ka cidenw kɔ, ka taga kɛ Dawuda ka muso ye. A ka baaraden musoman mɔgɔ duuru tun tugur'a kɔ.

⁴³ Dawuda tun ye Ayinowamu furu ka bɔ Zizireyɛli. U fila bɛɛ kɛra Dawuda ka musow ye.

⁴⁴ O y'a sɔrɔ Sayuli denmuso Mikali, min tun ye Dawuda muso ye, Sayuli tun y'ale minɛ k'a di Layisi dencɛ Paliti ma ka bɔ Galimu.